Huez a suspende directornan di Aruba Airlines

ORANJESTAD – Huez diaranson a suspende directornan di Aruba Airlines Onno de Swart y Esteban Valles pendiente un caso sumario, y a apunta accountable manager Hubert Zievinger como director interino di e compania. Esaki ta a consecuencia di un desacuerdo formal den e compania entre partidonan cu a pone cu huez mester a tuma un decision asina drastico. Mirando cu abogado di de Swart a informa cu no ta necesario pa impone un medida di orden pasobra partidonan lo tene nan mes na e orden di huez, no a dicta tal.

DEMANDA DI SEASTAR HOLDING

Den corte ayera e compania Seastar Holding NV a demanda pa huez impone e medida di orden contra de Swart, pa te ora cu e caso sumario tuma lugar entre partidonan, de Swart no por mete cu e asuntonan di e compania Aruba Airlines, y cu e tin cu deshaci di e cambionan haci den e directiva manera cu el a haci den registro di Camara di Comercio. De Swart a protesta inicialmente, pero e abogadonan a priminti cu lo cumpli cu e peticion ey.

DIFERENCIA DI OPINION

Tabata hopi cla den Corte cu partidonan, incluyendo Esteban Valles cu tabata un di e directornan (cu a wordo baha), tin un diferencia di opinion grandi di ken ta manda den e compania oficialmente registra como Arubaanse Luchtvaart Maatschappij, conoci comercialmente como Aruba Airlines. Pega na esey, partidonan tin un diferencia di opinion di kico e necesidadnan financiero di e compania ta, con por cumpli cu esaki, y si mester ubica accionnan nobo y si mester aumenta e capital di e compania.

DIRECTOR INTERINO

Huez a mustra den Corte cu ta bisto cu no solamente e partidonan sino e compania mes lo mester haya un director interino. Durante e caso, Hubert Zievinger a mustra di ta dispuesto pa keda nombra den e funcion. Su funcion actual ta accountable manager. Y a compronde for di documentonan cu Directie Luchtvaart Aruba tambe tin confiansa den Zievinger.

VEREDICTO FINAL

Como veredicto na final, huez a pues suspende tanto de Swart y Valles di tin cualkier funcion den e compania y ta prohibi nan di actua como hefenan den e compania. Mes momento e huez a pasa pa nombra Zievinger como director interino cu autoridad di director statutario y unico miembro di directiva. Ademas a prohibi pa yama cualkier reunion di accionista di e compania, y a dicta tambe cu asina cu tin un otro sentencia den e proximo caso sumario riba e tema, cu e veredicto actual ta vence. Lesa e sentencia aki.