ORANJESTAD – KPA no kier a cambia e orario di parada na Playa diadomingo, cu a pone cu e gruponan ultimo a yega Vondellaan den scuridad. Presidente di SMAC Randy Thiel a confirma na NoticiaCla.com cu despues di a experencia e situacion di diasabra na San Nicolas (mas hende a participa cu originalmente a registra), a pidi polis pa cambia e orario di diadomingo pa cuminsa mas tempran. “Lamentablemente nos a bin tende di KPA cu no por a cumpli pa cambi’e (e orario) ayera (diadomingo)” Thiel a bisa NoticiaCla.com. Di parti di polis, Lito Lacle a mustra cu minister di husticia Arthur Dowers lo reacciona riba e parti di polis, pakico nan no por a cambia e orario manera cu SMAC a pidi.
CARNAVAL MAS CHIKITO
Segun Thiel, ora cu a papia aña pasa cu stakeholders, a bin tuma nota cu e carnaval e aña aki lo tabata bay ta mucho mas chikito cu normal. “E ora a dicidi pa cambia e ora pa 1’or, pa no tin cu sali 11’or y yega final 3’or (di atardi)” Thiel a bisa. Pa sorpresa a bin resulta diasabra cu tabatin un carnaval grandisimo na San Nicolas, y no tabatin forma pa bisa cu no tin carnaval 1’or. “E mesun anochi ora cu e gruponan a yega laat na San Nicolas, di biaha mi persona a acerca cuerpo policial na nomber di gruponan di carnaval pa toch purba hala e orario di diadomingo pa 12’or. Y ayera un biaha mas, mas tabata e sorpresa ora e carnaval a resulta di ta mas grandi cu esun di San Nicolas. “Dus eynan bo ta mira cu no tabata den nos man pa pone 1’or sino hunto cu e gruponan di aña pasa a purba cambi’e orario mirando cu e lo a bira mas chikito” Thiel a bisa. Pero polis no tabata por a cambia e orario.
VERSION DI POLIS
Di part di polis, vocero Lito Lacle a confirma na NoticiaCla.com cu tanto na San Nicolas como na Playa, e parada a sali exactamente 1’or y e ultimo grupo a drenta su final pa cuarto pa 8 anochi y na Playa e ultimo grupo a drenta 20 pa 8. Pero pa mas comentario riba e orario, Lacle no por a duna mas comentario, y a referi nos pa minister di husticia cu lo duna e comentario oficial. De hecho, e orario cu Lacle a duna di e yegada di gruponan final, ta confirma cu ambos gruponan a drenta ya ora cu tabata scur, sin cu e gruponan tabata prepara pa esey.
KEHO PUBLICO RIBA ORARIO LAAT
Riba rednan social (Face Book), gruponan tabata keha (sigur e ultimo gruponan) cu e tabata unsafe, y nada bunita pa drenta Vondellaan den scuridad sin cu tabata prepara pa esaki. Tabatin esnan cu tabata biba y para wak den Vondellaan cu tabata critica cu pa 4:45 pm ainda e parada no a ni yega nan dilanti. Pues a tarda basta prome cu esaki a sosode.
PUNTONAN DI ACUERDO ENTRE SMAC Y POLIS
Ora cu a puntra Lacle riba e acuerdo, el a comparti e 10 puntonan cu polis a acorda cu SMAC prome cu e paradanan final a sali. Esta net prome cu esun di lus na San Nicolas.
" 1. Nos no ta dirigi carnaval. Nos ta juda SMAC sac'e na ora.
2. Nos ta pone Polis pa percura pa e orden publico
3. 1 hende di SMAC pa cada grupo ta percura pa cordina (trek) e grupo.
4. Lider di grupo di e gruponan y e lider di grupo di KPA tin contact cu otro. E lider di e grupo mester ta disponibel na tur momento.
5. Representantenan di SMAC mester percura pa cera buraco.
6. Cada grupo mester tin su mesun personal di siguridad.
7. Cantantenan, bailarinanan y 2 bendedo di CD ta wordo permiti pa cana banda di e truck.
8. Vergunning di Parada di Lus ta di 20.00 pa 02.00, parada di San Nicolas 13.00 pa 19.00 y parada di Oranjestad di 13.00 pa 19.00 y mester cumpli cu e condicionnan stipula den e permiso sino KPA ta actua.
9. Lider di grupo di KPA mester comunica na e hefenan prome cu tuma un accion drastico.
10. Preventief fouilleren/ Faya Bo Haya ta conta pa tur hende inclusief participante.”
Te ey e condicionnan y acuerdo cu SMAC tabatin cu polis.
POLIS TA PUSHA CARNAVAL TOCH
Na varios momento Lacle a sigura NoticiaCla.com cu no ta polis ta esun cu ta ‘pusha’ y ‘pura’ carnaval, ya cu esey no ta nan trabou. Di otro banda, na algun ocasion por a mira polis p.e. diasabra ta ordena e carnavalistanan pa pura, mirando su holoshi. No ta conoci kico por a pasa eynan cu polis toch a opta e ora pa instrui e carnavalistanan pa ‘haci lihe pasobra tin un schedule pa tene nan mes na dje’. Di otro banda, e trabou di polis a duna un ambiente di trankilidad y seguridad rond di esnan cu tabata participa y tambe mirones. “Nos ta sinti nos mes safe”, algun mirones a declara. Por a mira un combinacion di polis den uniform reglamentario, otronan den uniform di bicicleta, mobiele eenheid, y K9. Tur pa mantene orden y trankilidad
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.