ORANJESTAD – Diabierna awor Corte ta trata e caso cu aña pasa a hala hopi atencion ora cu autoridad a desmantela un operacion di traficacion di placa ilegal for di Hulanda pa Aruba, scondiendo placa den galiña y transporta esaki den container. E caso ta tuma lugar diabierna mainta 10’or na Aruba.
E CASO
Manera por corda, tabata na juni di aña pasa cu RST (Recherche Samenwerkingsteam) a tuma alrededor di 2,8 miyon euro den beslag den un investigacion grandi di labamento di placa. E placa tabata scondi den pakinan di carni di galiña den un container. A keda deteni den e investigacion aki, e sospechosonan R.H., R.G. y H. van R. na Aruba. Van R. a wordo deteni riba peticion di husticia Hulandes. Den e varios huiszoekingnan cu a tuma lugar den casnan y negoshinan na Aruba, Hulanda y Belgica, a wordo haya y tuma den beslag riba diamars casi 1,1 miljoen euro. Na Aruba mas cu 400.000 euro a wordo tuma den beslag durante huiszoekingnan e dia ey. En total e placa cu a wordo tuma den beslag ta alrededor di 3.9 miyon euro den varios biyete.
Investigacion
Riba peticion di Ministerio Publico di Aruba, Landelijk Parket di Ministerio Publico na Hulanda y Polis Hulandes a cuminsa un investigacion riba 13 di april 2015. E investigacion aki ta sali di un investigacion di labamento di placa, cu ta tumando lugar actualmente y den forma paralelo na Aruba.
Huiszoekingnan
Polis Hulandes a tene huiszoeking diamars den tres cas y tres negoshi na ciudad di Roermond, den un cas na e lugar Lanklaar Stokkem na Belgica y na un negoshi na e lugar Bree na Belgica. Ey a tuma den beslag un total di 700.000 euro den cash, administracion di negoshi y dos computer. Na Aruba, simultaneamente cu e huiszoekingnan na Hulanda y Belgica, a ristra na cuatro cas y cuatro negoshi. Ey a haya y a tuma beslag alrededor di 440.000 euro. Tambe a tuma den beslag entre otro, tres holoshi Rolex, tres auto di luho y dos motorcycle.
Labamento di placa
E sospechosonan ta wordo sospecha di, den organisacion of no, labamento di placa procedente di crimen. E placa aki tabata wordo ricibi door di nan mes of otronan, maneha, cambia y scondi na lugarnan desconoci pa otronan. E sospecho ta cu e negoshi di productonan di carni di e sospechoso H. van R. tabata wordo uza pa manda placa cash di Hulanda pa Aruba.
Detencion
Contra un di e sospechosonan deteni na Aruba, huez-comisario na Hulanda a saca un ordo di detencion. Contra e otro dos sospechosonan cu a wordo deteni aki na Aruba, esta, R.H. y R.G., detencion a wordo pidi na Aruba mes.
ORANJESTAD – Gobierno un biaha mas a haya orden di Corte pa cumpli cu sentencia anterior cu medidanan pa drecha e situacion na e planta di purificacion di awa, esta e RWZI na Bubali, sino mester paga otro multa (a paga uno caba di 710 mil florin) halto total di mas di 3 miyon florin si no cumpli. E ta un sentencia largo y complica, unda cu Corte a tene cuenta cu e situacion di e planta, e capacidad real di Gobierno pa resolve e problema y e situacion legal pa cu e proceso di privatisacion di e planta proximamente.
ORANJESTAD – Corte Superior otro siman dialuna ta inicia e caso di Avestruz, cu scuchamento di testigo. Mas informacion a bira conoci diamars di kico tur lo sosode specificamente e proximo dos simanan, cu Corte Superior tin reserva pa e caso. E caso mes lo cuminsa dialuna pa 9’or di mainta dialuna 13 di mei. Lo scucha 4 testigo entre 13 y 14 di mei (tin mas pero nan a wordo scucha caba pa Huez Comisario). Despues ta sigui dia 15, 16, y 17 cu repaso di e dossiernan y circumstancia personal di cada sospechoso.
WILLEMSTAD – Dialuna ultimo Hof a celebra su di 155 aña di existencia. Oficialmente sinembargo e fecha ta 1 di mei, pero a dicidi pa combina e celebracion di e dia di liberacion. Den cuadro di esaki, tur establecimento di Hof riba tur e respectivo islanan a ofrece coleganan un almuerzo, prepara pa Koninkrijksbrede Freedom Meals. E almuerzo no solamente a simbolisa e union den Reino, pero tambe e apreciacion intenso pa e diversidad y forza di nos comunidadnan di tur e 6 islanan cu ta cay bou di Hof. Prome cu e almuerzo, Allan van der Ree di WWII Museum Curaçao a tene un lectura na Corsou, y na Aruba e lectura a keda presenta pa Luc Alofs, antropologo cultural. Como parti di e celebracion, Hof a comparti un video cu e mensahe di e presidente di Corte Comun di Husticia, Mauritsz de Kort. Pa wak e mensahe, click AKI.
ORANJESTAD – Corte di apelacion a reserva dos siman di luna di mei 2024 pa trata e apelacionan di caso Avestruz. Specificamente lo tin tres huez pa scucha y trata e 7 sospechosonan. Noticiacla a compronde cu e caso ta cuminsa pa 8:30am tur dia y caba 5’or di atardi. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. E hecho cu tin dos siman reserva, no kier kier men cu tur dia lo tin caso, ya cu hueznan por programa algo durante e prome dianan y dicidi eynan, con ta usa e dos simanan mas optimalmente.
ORANJESTAD – Corte di apelacion a mantene e sentencia original di expropiacion di ex minister Paul Croes diahuebs como parti di e caso Ibis, cu un cambio si. Envez di paga AWG 183.489,10 bek, e ta haya un reduccion di 20 mil. Pues e mester paga e suma di AWG 163.489,10 mil florin, of sinta un castigo di prison di 18 luna extra di loke e ta sintando aworaki caba. No ta conoci si Croes lo apela, y e abogado Desiree Croes lo a comunica y delibera cu su cliente mas laat awe riba esaki.