Oduber: Falta algun detayes pa introduci parkeermeter na Palm Beach

ORANJESTAD – E intencion ta pa medio maart, enbes di 1 di maart (lesa articulo anterior) extende e proyecto di parkeermeter pa e zona hotelero na Palm Beach. Asina e mandatario encarga cu transporte a bisa durante e contestacion di pregunta den Parlamento dialuna. Mes momento a nota cu tin varios asunto ‘habri ainda’ prome cu por sigura e comienso di e di ‘dos fase’ di e proyecto. Entre nan, ainda tin cu sigura terenonan pa parkeer pa trahadonan, y mas otro asunto prome cu implementa e proyecto. A sigura cu unabes cu e implementacion cuminsa, por spera un extra entrada di entre 1 pa 1.2 miyon florin extra.

HOTELNAN OK CU E PROYECTO

Lo bira 6 luna despues di introduccion di e prome fase di parkeermeter, cu e zona hotelero na Palm Beach tambe lo conoce e ‘fenomeno’ aki. Segun Oduber, tur hotel y AHATA na tur ta cla y ok cu e proyecto. Mientras cu hotel lo ‘take care’ di su trahadonan, tin cu sigura tereno ainda pa por aloca e trahadonan di tienda y otro facilidadnan eybanda pa e asina yama ‘social parkeren’. Asina nan tambe por wordo ofreci e posibilidad pa paga nan lugar sea cerca of un poco mas leu, manera ta e caso na Playa.

TERENO NECESARIO

Pa loke ta empleo, e fase ey lo rekeri mas personal y ekipo cu de hecho ta cla caba. “Tur cos ta cla” Oduber a bisa, refiriendo na e ekiponan y parkeerwachters cu tin cu traha na e zona ey. A inverti caba den e parti ey inicialmente ora cu a introduci e proyecto. Ta solamente tereno falta y tambe un oficina pa e compania por opera mas eficiente for di e zona ey mes. Esey sinembargo no ta cla y ta trahando riba esey. Unabes cu tur cos keda cla, lo tin 5 parkeerwachter extra cu lo keda ubica eynan pa haci e trabou di control necesario.

FECHA INICIAL TABATA 1 DI MAART

Den di dos siman di januari, e compania a bisa cu tur cos tabata mustra cu pa 1 di maart proximo, e area di hotel lo conoce un total di 383 vak di parkeer pa cual clientenan mester paga. Segun vocero di Aruparking Sanin Daou, tin cu determina exactamente cuanto espacio lo mester wordo marca geel tambe. Actualmente ta deliberando y marcando e areanan geel, ya cu e otronan regular ta cla caba, segun Daou. Asina cu tur cos ta cla, lo bin afo cu e informacion di cuanto espacio exacto lo ta disponibel pa e area hotelero.

ESPACIO GEEL MARCA PA TRAHADO?

Mescos cu na Playa, tin e aspecto di trahado vs cliente, pero aki e situacion ta diferente segun Daou. El a splica cu den e caso di hotel, nan mes (e hotel) ta provee e trahadonan cu espacio pa parkeer, aunke cu NoticiaCla.com no por a confirma si esaki ta e caso pa tur trahado di tur e hotelnan riba e strip. Ta conoci cu varios hotel aworaki tin nan parkeerplaats controla pa medio di un hefboom, y ta cobra esnan cu no ta huesped, un suma. Huespednan ta haya un token, pero no ta conoci con trahadonan ta anda cu esaki. Segun Daou pues, hotelnan mes lo ‘take care’ di nan hendenan, cu ta pone cu no mester tin e dolor di cabez ey manera na Playa, unda cu mester a asigna lugarnan special, unda cu hendenan por cumpra nan espacio di parkeer mensualmente. No obstante esey, Daou a confirma cu lo tin espacionan geel, pero cu aworaki ainda esey no ta cla y pinta, pues no por bisa cuanto espacio esaki lo ta.