Fondonan BAZV 'up-to-date' pero menos cu a presupuesta

ORANJESTAD – Mientras cu 'Uitvoeringsorgaan Algemene Ziektekosten Verzekering (UO AZV)', a ricibi tur su placa di gobierno pa 2015, e suma no ta loke a keda presupuesta. Director di e organo medico, Anko Ringeling ta desmenti na NoticiaCla.com cu lo tin un atraso den ricibi fondonan di BAZV di aña pasa. “Nos ta 'up to date',” Ringeling a bisa. Di otro banda si ta admiti pues, cu e suma ta mas abou di loke cu a presupuesta, ora cu nan a prepara e presupuesto pa 2015. A confirma tambe cu pa e aña aki, esey a nifica cu a presupuesta mucho mas ‘conservativo’, esta cu a pone mucho menos placa compara cu aña pasa. E director no tabata dispuesto si, pa comparti kico e suma ta cu ta papiando di dje, cu mester a ricibi vs loke a ricibi na 2015.

FONDO SPECIAL PA AZV

Manera ta conoci, a introduci e BAZV pa por a genera fondo mensual, pa AZV por a sigui opera mas trankil y pa reduci e deficit di e fondo medico aki. Pero dado momento, a surgi un problema entre finanzas y AZV, cu a crea un tardansa den e traspaso di fondo di financien pa AZV. Esey aworaki a keda soluciona y segun Ringeling a sigura NoticiaCla.com, tur cos ta ‘ok’, pero cu e placa ta menos.