Ningun keho a keda entrega contra tata di baby di aña

ORANJESTAD – Tin indicacion cu e tata di e baby di aña, cu a haya yiu cu e mama di 15 aña, lo no wordo persigui penalmente. Manera NoticiaCla.com a indica ayera caba, diaranson Ministerio Publico lo por a duna informacion riba e caso aki. Segun su vocero, Ann Angela, el a confirma na NoticiaCla.com cu no tabatin ningun keho entrega contra e tata. Ademas, informacion cu e portal aki tin ta bisa cu e ora ey aunke cu e tata a comete un acto contra ley, tin chens grandi cu no ta persigui e tata pa e motibo ey. “Tene relacion sexual cu un persona bao 16 aña di edad ta castigable pa ley. E ta un crimen,” e fiscal mayor a laga sa. Pero tin cu wak con ta trata esaki.

KICO TA PRUDENTE

“Loke fiscal tin pensa di haci ta pa wak, hunto cu voogdijraad, kico lo ta prudente den e caso aki,” Angela a bisa. Como tal, den esey lo considera e bienestar di e mucha y e baby. “E aspecto 'ontuchtig' ta hinca particularmente den e gran diferencia di edad, entre e mama y e tata di e baby,” asina e fiscal di Zeden (asunto di mucha) a reacciona pa NoticiaCla.com. Segun Ministerio Publico, ta di opinion cu e hecho enberdad ta castigabel, pero cu mester wak kico ta oportuno.

CASO CU SI A WORDO PERSIGUI

Como ehempel a duna e caso di un situacion casi similar. Aki tambe un homber mayor di edad a tene relacion sexual ‘supuestamente’ voluntario cu un mucha di 15 aña. Den e caso aki si, e mayornan di e mucha a cay aden y a haci denuncia. Y como tal e persona aki, a haya castigo di prison di 15 luna pa e crimen cu el a comete.

ACTUA CONTRA LEY

Manera cu a raporta ayera caba, informacionnan cu NoticiaCla.com tin di su fuentenan fidedigno, ta cu mientras cu e mama tin 15 aña, e tata lo tin 30. Esaki ta pone cu un homber mayor di edad a tene relacion sexual cu un mucha menor di edad, y sake na estado. Segun Wetboek van strafrecht, e articulo specifico aki ta bisa cu ‘un persona cu comete ‘actonan lascivo’ (ontuchtige handelingen) cu un persona di 12 pero no a yega e edad di 16 aña ainda, cu a resulta den penetracion sexual di e curpa di e dama, tin un castigo di prison di 8 aña of un multa’.

OPORTUNIDAD PA MAMA REACIONA

Di otro banda, e articulo den ley tambe ta bisa si cu, Ministerio Publico, -prome cu pasa pa persegui e homber-, ta duna e menor di edad (e mama) e oportunidad pa duna su comentario riba posibel persecucion di e persona cu a comete e acto. Pues ta keda na Ministerio Publico pa tuma e siguiente paso, cu ta nifica si e ta persigui e tata di e baby. Te cu awe mainta, e fiscal mayor na Ministerio Publico, no tabata disponibel pa papia riba e caso ainda segun vocero di Ministerio Publico, Ann Angela.

STATUS LEGAL DI DAMA

Otro informacion cu NoticiaCla.com por a haya, ta cu e damita lo ta illegal na Aruba. Esey ta trece un otro situacion unda cu ta puntra e ora, cu si esey ta e caso, si ta nan mes a cubri e parto na hospital, of si ta AZV mes a cubri esaki, siendo cu e persona aki ta illegal. Intento pa haya confirmacion di AZV no a duna resultado, pero ta conoci tambe cu mas probable e informacion lo no wordo duna mirando cu ta trata di informacion di cliente/pashent. E matutino Bon Dia Aruba, a raporta den su edicion di awe, cu hospital di su banda a opta pa no duna comentario di e caso. Ademas, tin informacion cu e damita lo a casa (no na Aruba) y cu esey lo cambia su status pa un persona ‘mayor di edad’. Informacion cu NoticiaCla.com a haya, ta cu si e (persona) a casa mes cu 15 aña na otro lugar (cu no ta Aruba), no por ‘schrijf’ e matrimonio ‘in’, pasobra e ta contra nos orden publico.

REACCION DI E MAMA HOBEN

For di momento cu e noticia di e edad di e damita a keda conoci, y a keda publica, comentarionan tabata hopi te cu e damita mes a dicidi pa reacciona riba e pagina di Facebook di noticiacla.com. Esaki tabata e comentario di e mama hoben. “Pues danki Dios y por lo menos mi a duna luz na e baby, y no manera otro muhernan cu pa solamente papiamento di hende ta tuma e caminda facil di haci un aborto. Mi baby no ta impedi mi nada. Mas bien e ta dunami mas forza di sigui dilanti. Kizas mi ta un mucha ainda, pero mi ta mas responsabel cu hasta muhernan di 25 y 30 aña cu pa motibo di ta core caya y trip, ta kita bida di un baby via aborto. Esey si ta parcemi desagradabel. Danki na e comentarionan. Boso no ta bay dunami nada pa cria mi baby. Como tal e no ta afecta mi. Feliz dia y sigui papia, ya cu esaki no ta afecta mi.” Te ey e comentario di e mama hoben di e baby di aña