Naufragonan venezolano di boto gesink tabata biniendo Aruba

ORANJESTAD - E grupo di 7 naufrago, tabata di nacionalidad venezolano, na caminda pa Aruba for di Bonaire, cu e intencion di bende whisky. Asina e representante di Kustwacht, Patty Duncan a confirma na NoticiaCla.com diasabra anochi. For di dia 17 di december nan a sali rumbo pa Aruba, y mester a yega nan destinacion for di ayera. "Pero ora cu nan no a yega, agencia (di e bapor) a notifica nos y nos a saca boto y helicopter pa busca nan," Duncan a bisa. Pero ta te awe, a localisa e naufragonan sobreviviente riba un tankero, cu a rescata nan riba laman. Aworaki ta atendiendo cu e 4 venezolanonan cu a keda interna na hospital, pendiente kico ta haci cu nan.  Segun Duncan, ta custumber cu e barco aki, Doña Mathilda, ta haci e biahenan entre Venezuela, Colombia y e islanan aki, pa entre otro, cumpra y bende whisky. Den e caso aki, e carga a resulta mucho pisa, cu a pone cu e boto lo a sink. 

E DRAMA RIBA LAMAN

Tabata awetardi a bati alarma, pa un boto cu tabatin problema cu nan boto, Don Mathilda, riba cual tabatin 7 tripulante na bordo. Lamentablemente prome cu por a yega na e boto pa por a rescata e tripulacion, esaki a sink matando dos di e tripulantenan. Un di tres tripulante a keda seriamente herida, despues cu e la keda ataka y mordi pa tribon. Pa ora cu helicopter a yega hospital cu e victima, e persona lamentablemente a fayece. E otro 4 tripulante, si a logra sali di e boto y a wordo rescata pa otro bapor, segun Patty Duncan di Kustwacht. Fotos cortesia Kustwacht.