Cobransa di number di auto via accijns probabel na 2017

ORANJESTAD – Ta definitivo cu pa 2016, lo no conoce e cobransa di number di auto, via e sistema di pago di accijns. Minister di Finanza, mr. Angel Bermudez, a bisa NoticiaCla.com awe tardi, cu esey ta un hecho, y cu ta trahando awor pa e keda cla pa introduccion pa 2017. Manera ta conoci den curso di dia, Departamento di Impuesto cu pues, a presenta e alternativa di pago di number di auto, den forma di un sticker, enbes di paga pa un plachi nobo. E mandatario awetardi a confirma na NoticiaCla.com, cu e leynan no a keda cla na tempo.

PAKICO NO TA SIGUI CU E CAMBIO PA ACCIJNS

“Nos a haci un proposicion, na Conseho di Minister, pa inclui e cobransa di motorrijtuigenbelasting den accijns. Nos a procesa, henter e idea ey, den un concepto di ley,” e mandatario a admiti. Problema ta cu ora, cu a bay haci ehercicio cu ne, a bin topa cu algun forma di exceso, cu e por genera pa cierto gruponan den comunidad. Entre nan e tranportenan profesional. No a bin cla ainda, cu e procedura y e ehercisio pa nan, pa reduci e problema ey. Como tal a dicidi, pa otro aña, usa e sistema di stickers y muy probable pa e proximo aña, si sigui cu e proposicion pa incluye den accijns. “Otro aña ta keda e sistema di sticker. Bo ta keda cu e plachi blauw cu blanco manera cu ta na Corsou”.

KICO TA HACI ORA CU CUMPRA AUTO NOBO?

Un persona cu haya un auto nobo, ta bay belastingdienst, ta registra, ta haya un afgifte di un number nobo y ta haya un plachi manera cu e ta, e aña aki, esta di 2015.

Scucha aki e entrevista cu Angel Bermudez riba introduccion di accijns na 2017.