ORANJESTAD – Un carta cu peticionnan marca como ‘urgent’ a sali pa Minister di Transporte Otmar Oduber, riba e asunto di parkeermeter, cu un ultimatum di 3 di december (awe). Den e carta, -cu a cay den man di NoticiaCla.com-, tin sugerencianan cu ta varia for di cambio di tarifa pa parkeer, orario di parkeer te re-uso di e lugarnan di parkeer ‘geel’. E carta ta firma pa miembronan di e asina yama ‘parking committee', cual comision a nace despues di e reunion entre comerciantenan cu e mandatario, dia 12 di november ultimo. Den e mesun carta e comision ta pidi pa confirma 5 dia di parkeer gratis (gobierno a duna 8 mientrastanto).
CAMBIO NA LEY DI PARKEER
E comision ta pidi pa gobierno haci cambio urgentemente na e ley di parkeer mes, y kier wak esaki pues haci ‘a corto plazo’. Ta pidi entre otro pa reduci e tarifa di parkeer den cierto area, (areanan frecuenta pa local) na 25 cen pa 15 minuut. Tambe ta pidi pa cambia e orario di parkeer di envez di 7’or di mainta pa 7’or di anochi, pa 9’or di mainta pa 5’or di atardi. Esey, -segun e comision-, ta motiva negoshinan cu ta opera mainta, pa promove nan desayuno, y ta motiva otro negoshinan pa keda habri mas laat anochi y genera mas trafico, despues di ora di trabou. Y finalmente, ta pidi pa ofrece e lugarnan di parkeer ‘geel’, pa tur hende riba diasabra, o sea converti nan den lugarnan gratis e dia ey. Motivacion ta cu nan ta pa hendenan di oficina cu no ta traha riba diasabra.
CAMBIO DI STRUCTURA DI BOET
E comision no a para eynan, y a sigui pa pidi pa cambionan, -tambe a termino corto-, riba e structura di boet/multa. A mustra cu klem auto ta funcionando den un forma contra productivo. Como tal, a sugeri un medida mas practico. Aki ta pidi pa reduci e multa inicial di AFL 75 te na AFL 25 pa un periodo cortico di parkeer (ora cu pasa ora). Despues di tres di e tipo di multanan aki den curso di un aña, of si e persona no paga su multa(nan) den 90 dia, e por haya su auto geklem, y un multa mesora di AFL 200 (mas cu e multa actual di AFL 175). Y e medida di klem, por wordo uza solamente como ultimo recurso. Pa loke ta pagamento di multa, esaki mester por sosode via ATM machine, online banking y na tur banco y e oficina di Aruparking. Tur boet mester wordo paga dentro di 90 dia. Paga laat, ta nifica un aumento di multa mesora tambe.
PARKEER DEN ESPACIO GEEL
Y finalmente, e structura di parkeer den espacio 'geel' tambe mester wordo restructura segun e comision. E reparticion actual no ta corecto, y ta causa un deficiencia di espacio ‘blanco’ disponibel pa clientenan. E hecho cu no tin suficiente espacio 'geel' pa trahado, tambe ta crea un problema serio pa trahadonan den centro. A mustra cu espacionan priva actualmente ta wordo cobra tambe, y ta limita e area di parkeer pa trahado. E sugerencia ta pa, manera cu a planea inicialmente, traha garashi pa parkeer mesora, den termino corto. E comision a splica cu ta spera cu gobierno (minister) cumpli cu e peticion di e comision, pa cu su implementacion. E carta tabata firma pa 7 comerciante miembro di e comision. (lesa e carta completo aki)
ORANJESTAD - ATIA kier sa kico pueblo ta haya a cambio di e indexering pa trahadonan publico . Asina e gremio comercial ta bisa como prome reaccion riba e hecho cu gobierno a firma pa duna trahadonan publico indexering. E gremio ta bisa di a tuma nota den medianan social cu tur ambtenaar y gelijkgestelden lo bai haya un indexering den dos taza, uno na juli di 6% y pa 1 januari 2025 di 5.7%. Como gremio comercial representanto companianan priva y semi-gubernamental, nos di Aruba Trade and Industry Association (ATIA) tin algun pregunta over di kico nos como pagado di impuesto lo haya a cambio di e indexering. “No mester compronde robes, nos ta pro cu tur empleado na Aruba merece nan debido salario, pero mester tambe bin a cambio di “performance”, aumento di productividad. Den e acuerdo no tin nada cu Gobierno, como representante di pueblo, ta pone a cambio di un indexering” e director di ATIA, Herrick Henriquez ta sigui bisa.
ORANJESTAD - Conforme e ley di A.T.A., tur aña tin dos momento importante, e prome ta ora di entrega e Rapport Anual cu e resultadonan di e aña anterior y e di dos ta ora di haci entrega di e presupuesto pa e aña siguiente. Segun ATA, tur aña A.T.A. nan a sa di cumpli debidamente cu entrega di e Rapport Anual, incluyendo resumen di resultadonan y di trabao haci, como tambe e relato financiero cu su respectivo ‘goedkeurende verklaring.’
ORANJESTAD - Riba Diabierna 19 di april 2024 den su reunion general di miembrecia, a elegi e hunta di directiva di Aruba Trade and Instustry Association (ATIA). Durante e prome encuentro di e hunta di directiva nobo a elegi e hunta di directiva diario esta e “Daily Board” pa 2024 - 2025.