Ta haciendo tramite pa tripulantenan di La Rumbera bolbe Aruba awe

SAVANETA - Ta haciendo tur tramite diplomatico pa logra trece e 9 personanan riba e boto La Rumbera bek Aruba awe mes si ta posibel. Prome minister Mike Eman durante un conferencia di prensa na centro di Warda Costa diadomingo atardi, a splica NoticiaCla.com. "Tin cu wak con lihe ta keda cla cu e control medico, y tambe wak e buelonan regular cu tin disponibel awo, of si tin cu charter un avion pa nan" Eman a bisa. Pues no ta conoci ainda ki ora of dia, e 9 tripulantenan di e boto bolbe Aruba. Tabata un rato prome cu capitan  di e boto Robert Dirkz  a papia cu prome minister Eman diadomingo atardi, cu enberdad a haya tur hende riba e boto La Rumbera, y cu tur hende ta bon di salud. "Y nan ta contento cu a caba cu e odisea aki". E mandatario a duna un splicacion riba e ultimo informacion durante un conferencia di prensa na Warda Costa na Savaneta. A mustra cu e canalnan diplomatico a yuda hopi entre e paisnan. A haci uso di hopi aparato tecnologico y conocimento, pa por a traha riba e plan aki, y toch e boto riba propio forma a yega na e sitio cu el a yega. Loke a resalta ta e teamwork cu a prevalece den e ultimo dos dianan aki, te awor cu e boto a keda localisa y e hendenan a keda rescata. Keda pendiente di e detayenan di e conferencia aki rato.