Cantidad di cliente cu cuenta di awa atrasa a triplifica

ORANJESTAD – Cu e compania di utilidad WEB ta manda carta pa pagadonan laat cu mensahe cu ta corta nan awa, no ta nada nobo. De hecho, e ta algo normal. Loke ta haci e asunto diferente, cu mester a bin cu un mensahe general, ta pasobra e cantidad di pagado di awa na WEB cu ta paga laat, a triplifica awor. Asina vocero di e compania Asja Dongen a confirma na NoticiaCla.com diahuebs. Ta papia di 30% di e clientenan cu tin cuenta di awa atrasa, y cu ta nifica mas of menos 12.000 cliente. Nan lo haya un notificacion e fin di siman aki cu nan por keda sin awa otro siman si no paga dentro di 48 ora despues di ricibi e recibo.

RECIBO TA YEGA DIASABRA

Segun Dongen, clientenan cu tin cuenta di awa atrasa, entrante diasabra awor lo haya un carta di advertencia mara na nan meter di awa. E clientenan aki tin dos dia di trabou pa bin paga nan debe na loket di WEB na Balashi. Esaki ta un ultimo advertencia di WEB pa clientenan cu no ta paga nan cuenta di awa of tin cuenta cu a vence. Esnan cu no reacciona riba e carta, tin chens di keda sin awa entrante diaranson dia 2 di december proximo.

PROBLEMA INICIAL CU E SISTEMA

Desde introduccion di e sistema di cliente nobo di ELMAR, e compania di awa WEB a pospone cortamento di awa di clientenan cu tin cuentanan di awa atrasa. Manera conoci e compania ruman ELMAR a encontra problemanan inicial cu nan sistema. Esaki a refleha tambe riba e sistema di cliente di WEB door cu nan ta interconecta cu otro. Pa e motibo aki WEB a tene consideracion y a keda sin adverti clientenan cu no ta paga algun luna tras di otro.

CLIENTE TA IGNORA FECHA DI VENCEMENTO

Sinembargo e hecho cu no a manda carta di advertencia, no ta motibo cu clientenan por keda sin paga nan debe. Experiencia ta mustra cu clientenan ta ignora e fecha di vencemento riba e cuenta di awa y ta warda te ora nan haya un carta pega na nan meter cu advertencia cu ta bay corta suministro di awa. ‘Ta lamentabel cu mester yega asina leu cu ta corta awa; con cu bay bin awa ta un prome necesidad di bida y no ta responsabel pa keda sin cumpli cu pago di cuenta di awa.’, asina Dongen ta opina.

A PAGA PERO TOCH TA HAYA CARTA

Debi na e problemanan cu interconexion cu e sistema di ELMAR, ta posibel cu cierto cliente lo haya carta di advertencia siendo cu nan si a paga, pero WEB no por verifica esaki. Ta pidi e clientenan pa pasa cu nan prueba di pago na loket di WEB na Balashi. Tambe por email un scan di e prueba di pago via info@webaruba.com. Entrante diasabra awor ta bay pone carta di advertencia na meternan di awa di clientenan pa urgi nan pa paga nan cuenta atrasa dentro di dos dia di trabou. Por haci e pago di cuenta atrasa solamente na loketnan di WEB y ELMAR y na oficinanan di gobierno, pero no na banco of online banking. Riba e carta di advertencia ta menciona mas detaye.

EXTRA LOKET PA YUDA MASA DI CLIENTE

WEB ta spera un cantidad grandi di cliente desde dialuna 30 di november pa bin cancela nan debe. Pa e motibo ey lo habri loket extra pa asina por minimalisa tardansa. Ta pidi tur cliente cu tin cuenta atrasa pa bin paga esaki. Clientenan cu no reacciona riba e carta di advertencia ta core e riesgo cu ta corta suministro di awa desde diaranson 2 di december proximo. P’esey ta pidi tur cliente concerni pa evita e inconveniencia y pa cancela nan debe na WEB Aruba.