CITGO ok pa sigui cu siguiente fase di exploracion

CITGO ok pa sigui cu siguiente fase di exploracion

Posted on 11/25/2015 9:28 pm AST | Updated on 11/26/2015 2:07 am AST

ORANJESTAD – Minister di energia Mike de Meza a confirma awe nochi na NoticiaCla.com cu el a haya informacion di CITGO, cu nan a duna luz berde pa continua pa e siguiente fase di negosiacion pa cu reapertura di e refineria. Segun e mandatario, tur informacion cu a sali for di entre otro e ‘due diligence’ ta mustra positivo cu CITGO a dicidi cu nan ta continua pa e siguiente parti. Esey ta nifica cu e proximo luna ta continua cu e proceso cu tin cu determina si ta finalmente dicidi pa opera e refineria. E no ta e decision final, pero ta un paso mas cerca. Como tal e mandatario ta cautelosamente optimista cu e di dos fase tambe lo resulta positivo. Como tal e noticia a bin un siman prome cu ora, cu sigur ta indica cu cosnan tabata canando bon. 

UPDATE PA PARLAMENTO

Tabata na october ultimo cu e mandatario a reuni cu parlamento y duna nan un update riba e situacion.  “E proceso di 'due diligence' di e compania petrolero CITGO ,– esta e evaluacion economico y tecnico di e refineria Valero –, ta canando satisfactoriamente. Tin un cooperacion estrecho entre CITGO, Gobierno di Aruba y tambe Valero cu ta facilita e proceso aki”. Asina e mandatario encarga cu e.o. asuntonan di energia Mike de Meza a bisa e comisionnan fiho di parlamento riba compania estatal na october.

META DI REUNION

E meta di e reunion aki tabata pa informa Parlamento di Aruba riba e ultimo desaroyonan di un posibel reapertura di refineria na Aruba, como tambe e 'Memorandum of Understanding' (MoU) cu Gobierno di Aruba a firma cu e compania mericano CITGO.

DESPUES DI 'DUE DILIGENCE' TA NEGOSIA

Den un forma extenso Minister de Meza a duna splicacion riba e ultimo desaroyonan encuanto e posibel reanudacion di actividadnan di refinahe na Aruba, despues cu a firma e 'memorandum of understanding' cu CITGO. “E MoU aki a habri caminda pa cuminsa haci estudionan tecnico y economico pa posibel participacion di CITGO den operacion di e refineria,” minister de Meza a splica. Segun ing. De Meza, mester conclui e fase di 'due diligence' prome cu inicia e negosiacionnan riba e operacion di e planta na Aruba. E 'due diligence' ta cubri detayenan manera e historia di diferente parti y ekipo di e refineria.

DEADLINE CITGO

Manera ta conoci, fin di luna (otro siman) e prome ‘deadline’ tabata poni pa vence pa CITGO, unda cu nan mester a informa gobierno di nan interes y e resultado di e ‘due diligence’ y si tin necesidad mas investigacion. Si esey tabata e caso, e fase dos mester cuminsa cu ta termina fin di december. Y si esey sigui, ta bin e fase final cu ta e fase unda cu ta cera posibel dealnan. No ta conoci si esey ta encera tambe negosiacion caba cu e doño di e refineria, esta Valero. Te awor, Valero mes ta hopi keto publicamente y ta continuando tambe cu su proceso di desmantelacion, aunke di un nivel cu e no ta afecta cualkier intento di reapertura si esey bira un hecho.

  • Powered by SETAR