Parlamento a haya ‘avance’ riba medidanan contra 'turistanan' Venezolano

ORANJESTAD – Parlamento a haya un ‘avance’ di cambionan na caminda pa evita cu e situacion di ‘turista' Venezolano cu ta swipe y causa problema’ bay for di man. Por lo menos esnan den e comision central di turismo y husticia. E varios cambionan avisa y proponi pa tanto ministernan Benny Sevinger di integracion y Arthur Dowers di husticia dialuna mainta, a ‘trankilisa’ e comision fiho di parlamento di turismo y husticia. Tanto Jennifer Arends como Desiree Croes a keda satisfecho di e loke nan a tende riba e situacion preocupante cu tin na Aruba di ‘Venezolanonan' cu ta swipe na Aruba’. Asina nan a sigura NoticiaCla.com despues di e reunion. “E reunion tabata hopi informativo” Arends a bisa NoticiaCla.com.

NO MESTER GENERALISA E SITUACION

Segun Arends y Croes, tur miembro kier a sa kico e ahustenan riba maneho ta ora di entrada, di e.o. Venezolanonan. Como tal a yama e reunion den comision central dialuna cu e ministernan menciona. Y ta durante e reunion aki tur e ‘avancenan’ a keda presenta. “Si lo tin pre-screening, kico por haci pa no generalisa y afecta nos turismo y economia, si lo tin mas campaña pa concientisa pueblo di e riesgonan di coopera cu practica ilegal manera taxi pirata, huur camber, raspa carchi etc”. Tambe a papia riba e maneho di extension di estadia, di kico tin awor y kico lo por haci pa asina tin un miho bista.

MAS TANTO CAMBIO PRESENTA TA SEVINGER

Esun cu a presenta mas informacion y posibel cambio, tabata minister Benny Sevinger. “E tabatin basta cambio concreto” Arends a bisa. Kier introduci entre otro mas control. “Nan a introduci un call center pa controla adresnan caminda e personanan (posibel Venezolanonan cu ta raspa) ta kedando” Arends a bisa. Nan (gobierno) kier introduci un tarifa na momento cu kier pidi extension di estadia. “Tambe nos a haya sa cu e cantidad cu ta pidi pa extension ta yega un 1000 hende compara cu 250 mil cu ta bin y bay” Arends a bisa. Ora cu a puntra Arends riba e critica di oposicion cu a haci mencion di e cifra di 4000, a mustra cu esaki ta un cifra cu ta den sistema berdad, pero cu no ta di e aña aki so. Awe oposicion den varios forma a critica e aspecto aki, indicando cu minister ta purba ‘praat’ e situacion ‘goed’, door di haci e comparacion ey.

PRE SCREENING ESTILO ‘ESTA’

Un otro medida cu kier introduci, pues ta evaluando pa bin un tipo di pre-screening estilo ‘ESTA’ manera cu Merca tin aworaki (un sistema cu ta laga un persona cu kier drenta Merca, aplica y duna su datonan riba cual Merca ta determina si e persona por drenta of no). Lo bay wak ki efecto esaki por tin riba turismo, prome cu tuma e decision final. Tambe lo evalua na momento cu un persona pidi extension di estadia y wordo gara ta traha, cu su permiso ta caduca mesora y e por wordo deporta. Tur ta puntonan cu ta evaluando pa introduci proximamente.

CAMBIONAN PRESENTA PA DOWERS

Di parti di husticia, tambe a compronde cu ta haciendo varios ehercicio unda cu ta conta cu cooperacion di comunidad pa tipnan valioso. “Ta haci un yamada tambe na comunidad pa no coopera cu practica ilegal cu na final ta na desventaha di nos isla” Arends a sigui bisa. “Na Aruba ta trahando mas tanto cu boet, y ta trahando riba e cobransanan” Arends a bisa riba e parti di multa cu kier sigui ariba pa castiga esnan cu comete infraccion riba e tereno aki. “Nos ta contento y lo keda monitor e situacion di cerca” Arends a finalisa bisando.