Confrontacion sindicato y mediado pa tene referendum

ORANJESTAD – Tin un confrontacion entre mediado di gobierno Anselmo Pontilius y presidente di STA Diego de Cuba, riba un referendum pa midi popularidad di director di ANSA, esta Nilknarf “Nilki” Kock. Segun De Cuba, Pontilius a yuda stroba e referendum di tuma lugar, mientras cu e ultimo ta mustra cu no por tene e referendum, pasobra no tin base legal pa haci esaki.   “E situacion ta uno hopi di lamenta. E propio empleadonan no kier wak e (Kock) mas eynan”. De Cuba a bisa. Pontilius ta mustra cu e ta lamenta loke ta tumando lugar.

TRAFICO DI CARTA

Segun de Cuba, a manda un carta pa mediado di gobierno, como quiera cu el a papia cu empleadonan di ANSA. “Pero lamentablemente mediado di gobierno no a splica nan debidamente manera e cos aki mester ta” de Cuba a bisa. De hecho, de Cuba ta bisa cu Pontilius a gaña e trahadonan di ANSA, cu elo por conduci un referendum. “Siendo cu e tabata sa masha bon den ki direccion e empleadonan kier a bay, pasobra e trahadonan kier a vota cu nan no kier e Kock mas como CEO di ANSA NV”.

REACCION DI CORESPONDENCIA

Ora cu, segun de Cuba ta sigui splica, STA a manda carta pa mediado, e ultimo aki (mediado) a manda un carta bek (lesa e carta aki), via email rechasando e peticion (pa tene e referendum pidi). E ta lamenta e situacion, aunke a mustra cu awor nan lo cana un otro caminda pa nan toch organisa un referendum riba nan mes, cu presencia di un abogado of notario, cu ta certifica tur documento y ta mira cu tur cos bay conforme e forma cu e mester tuma lugar pa evita un posibel fraude. “Cu e documento ey, nos lo bay ministerraad pa splica MR e ora pa bisa nan cu asina no por continua”.

RASON PA TENE REFERENDUM

Pontilius den un reaccion na NoticiaCla.com, ta mustra cu e unico forma pa tene un referendum ta ora cu un sindicato pidi reconocemento den un compania como representante di trahado. Pontilius ta admiti di a ricibi carta di de Cuba cu e peticion. Y Pontilius ta mustra cu a informa de Cuba personalmente despues pakico no por tene e referendum manera solicita. Ademas a mustra de Cuba e opcionnan cu e tin pa tene tal referendum. “No tin nada di stroba ningun hende” Pontilius ta bisa.”Mediado di gobierno no por haci nada cu no tin un base legal”. Ademas e mediado di gobierno a bisa cu de Cuba como dirigente sindical mester ta hopi cla cu su mes, y cu e trahadonan pasobra ‘tipo di weganan asina nos no ta aden’. “Mi funcion no por wordo uza pa ningun actividad cu no tin un base legal”.

TINTE POLITICO?

De Cuba ta compronde e actitud di mediado Anselmo Pontilius, mirando cu ta gobierno a pone Pontilius na su funcion. E acusacion aki, Pontilius a refuta mesora. “E ta di lamenta, y mi a bisa sr de Cuba hopi biaha cu ora cu bo ta un lider sindical, bo mester ta honesto, pasobra si bo no ta honesto cu bo mes, bo ta un peliger pa e trahadonan”. E mediado di gobierno riba e tendencia politico, tambe a haya reacciona. “No ta cuestion cu minister a nombra y San Pedro a nombra. Nos a huramenta pa nos trabou y nos ta cumpli cu ley. Ni mas ni menos” Pontilius a finalisa bisando.