• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Minister a reuni cu FTA riba ley laboral awe tardi

ORANJESTAD – Gobierno lo laga haci un estudio mas riba impacto cu e cambio di ley 1613x tin riba hobennan desemplea specifico, prome cu esaki keda trata den parlamento. Ademas sindicato FTA lo bin cu sugerencia con pa por aporta na e cambio di e ley aki. Durante un reunion diamars atardi yama pa Minister di Labor Paul Croes, esaki a keda trata cu presidente di sindicato FTA Hubert Dirksz, unda cu mediado di gobierno Anselmo Pontilius tambe tabata presente. Croes a bisa NoticiaCla.com cu e ta considera cu e reunion tabata bon, y a admiti cu lo haci un estudio mas. Sindicato di otro banda, a wak e situacion diferente y no ta considera cu tabatin mucho cambio. Como tal despues di e reunion, nan a bisa NoticiaCla.com cu cos ta ‘status quo’.

PUNTO SINDICAL

Durante e reunion FTA, representa pa su presidente y su consehero Legal, a reitera un biaha mas su posicion cu ta ensera cu bou ningun circumstancia e lo bai di acuerdo cu eliminacion di un articulo di ley cu tin como meta protehe e clase trahador for di abuso di parti di e dunadornan di trabou. Di parti di minister a wordo treci dilanti cu e intencion tras di su proposicion ta pa crea mas espacio pa emplea personanan den cierto gruponan di nos comunidad (hobennan cu ta drenta mercado laboral, personanan cu edad halto cu ta enbusca di trabou, personanan cu tin cu reintegra na e mercado laboral, entre otro), kendenan den su opinion tin dificultad pa drenta e mercado laboral door e limitacionnan di articulo 1613x di Codigo Civil.

DESACUERDO CU GOBIERNO

FTA a indica cu e no ta di acuerdo cu e ponencianan aki. FTA na prome lugar a trece dilanti cu no por asumi sin mas cu hustamente e articulo aki ta esun cu ta dificulta entrada di e gruponan antes menciona den mercado laboral. Mester tin estudionan profundo cualnan ta wordo sosteni door di cifranan concreto pa por saca e tipo di conclusionnan aki. Te asina leu cu FTA por a saca afo e estudionan aki te ainda no a wordo hasi, of en todo caso no wordo hasi na e profundidad necesario pa por saca conclusionnan concreto. A palabra cu esakinan lo wordo hasi, despues di cual e resultadonan lo wordo comparti.

RESULTADO ESTUDIO

Si acaso por resulta a base di e estudionan aki cu en berdad mester hasi cierto modificacionnan, FTA ta dispuesto na duna su contribucion na pensa riba posibel alternativanan. Pero hamas lo por ta asina cu e alternativanan aki ta trece cu nan cu e proteccion general cu articulo 1613x ta duna ta wordo elimina. Cualkier alternativa pa yuda cualkier grupo lo mester ta manteniendo e proteccion cu articulo 1613x ta proporciona na e clase trahador en general.

REACCION MINISTER

Pa loke ta e mandatario, e diferencia di opinion ta uno simple. Manera cu e situacion ta aworaki, hobennan no tin proteccion ora cu nan tuma un trabou cu contracto di uitzendbureau. E cambio di ley segun Croes, ta netamente duna mas proteccion na e grupo aki. No por retira un persona di un dia pa otro, contrario cu tin aworaki. Specificamente cu loke a discuti segun Croes, ta e 4 doelgroep. Y e mandatario ta admiti cu FTA a bay di acuerdo cu nan tambe lo bay busca un solucion pa e grupo aki. El a sigura cu e meta di tanto gobierno como FTA ta igual cu ta emplea mas hende posibel riba e tereno laboral. E diferencia ta keda cu FTA ta pensa cu e cambio lo afecta tur trahado, siendo cu gobierno ta mira cu ta brinda oportunidad pa mas trabou. Lo continua cu e dialogo, segun minister, cu e dialogo aki, aunke no tin fecha exacto pa bolbe sinta na mes. E mandatario no tabata di acuerdo cu no tin estudio haci at all, pero cu simplemente lo haci un estudio mas riba e parti di desempleo hubenil, y e ora lo por tin un bista mas cla si enberdad por resolve e problema cu e cambio di articulo aki.