ORANJESTAD – Fraude masal cu e mashinnan ‘di swipe’, a pone cu banconan a cuminsa colecta esaki bek di comerciantenan cu a presta nan mes pa esaki. Ta trata di ‘transaccion financiero entre comerciantenan y cliente venezolanonan so” e fuentenan a sigura NoticiaCla.com. Fuentenan bancario a confirma awe mainta na NoticiaCla.com cu e situacion ta hopi alarmante. Loke ta mas lamentable, ta e hecho cu ta companianan renombra, conoci, cu ta presta nan mes pa comete e fraude aki. For di dos siman pasa, banconan a cuminsa tuma e mashinnan bek den beslag.
CON E TA FUNCIONA
E caso ta cu comerciantenan ta laga e cliente swipe nan carchi pa un suma. E suma ta pasa anochi riba e cuenta di e comerciante, cu su manise, ora e credit of debit clear, ta colecta e suma completo y ta paga e cliente e suma di placa. Claro, cu su comision. Asina tur dos ta logra haya beneficio di e transaccion aki. Segun e fuente, e transaccion aki ta wordo considera como fraude, mirando cu esey no ta e intencion pa uso di e machine di swipe.
COOPERACION ENTRE BANCONAN
E fuente a confirma tambe cu danki na e cooperacion y protocol cu tin entre tur e banconan, nan ta comunica hopi serca cu otro riba e asunto aki y ta monitoria e situacion hopi di serca. “E ta un caso hopi serio y alarmante, sigur si mira cua negoshinan ta presta nan mes pa e servicio aki. “E no ta discrimina. Tur tipo di negoshi ta haciendo esaki. Restaurant, retail, supermercado, tur ta envolvi. Y e cantidad ta grandi, tanto di e clientenan como e sumanan cu ta wordo uza” e fuente a bisa. Riba 60 pa 80 negoshi cu ya caba a perde nan machine di swipe, y no lo haya esaki bek. Esey ta nifica cu e negoshinan aki ta bin riba un blacklist y for di awor tin cu cuminsa haci transaccion a base di cash so.
ORANJESTAD - ATIA kier sa kico pueblo ta haya a cambio di e indexering pa trahadonan publico . Asina e gremio comercial ta bisa como prome reaccion riba e hecho cu gobierno a firma pa duna trahadonan publico indexering. E gremio ta bisa di a tuma nota den medianan social cu tur ambtenaar y gelijkgestelden lo bai haya un indexering den dos taza, uno na juli di 6% y pa 1 januari 2025 di 5.7%. Como gremio comercial representanto companianan priva y semi-gubernamental, nos di Aruba Trade and Industry Association (ATIA) tin algun pregunta over di kico nos como pagado di impuesto lo haya a cambio di e indexering. “No mester compronde robes, nos ta pro cu tur empleado na Aruba merece nan debido salario, pero mester tambe bin a cambio di “performance”, aumento di productividad. Den e acuerdo no tin nada cu Gobierno, como representante di pueblo, ta pone a cambio di un indexering” e director di ATIA, Herrick Henriquez ta sigui bisa.
ORANJESTAD - Conforme e ley di A.T.A., tur aña tin dos momento importante, e prome ta ora di entrega e Rapport Anual cu e resultadonan di e aña anterior y e di dos ta ora di haci entrega di e presupuesto pa e aña siguiente. Segun ATA, tur aña A.T.A. nan a sa di cumpli debidamente cu entrega di e Rapport Anual, incluyendo resumen di resultadonan y di trabao haci, como tambe e relato financiero cu su respectivo ‘goedkeurende verklaring.’
ORANJESTAD - Riba Diabierna 19 di april 2024 den su reunion general di miembrecia, a elegi e hunta di directiva di Aruba Trade and Instustry Association (ATIA). Durante e prome encuentro di e hunta di directiva nobo a elegi e hunta di directiva diario esta e “Daily Board” pa 2024 - 2025.