ORANJESTAD – Aruba Radisson Hotel, lo por keda cu su nomber original (Aruba Caribbean) si e keda den man di Aruba Growth Fund. NoticiaCla.com a confirma awe mainta cu pendiente e sentencia di dia 17 di juni, y saliendo di punto di bista cu AGF keda cu e propiedad, nan lo cambia e nomber pa Hilton Aruba Caribbean Hotel & Casino. E cadena prestigioso lo ta e cadena cu lo opera e hotel pa AGF. E motibo di e nomber, ta pasobra AGF ta considera e nomber ‘Aruba Caribbean Hotel como un icono hopi importante pa nos, e arubianonan’, un fuente serca di AGF a confirma na NoticiaCla.com diamars. Como tal lo ‘brand’ e hotel manera a bisa.
WARDANDO E SENTENCIA
Mientrastanto e wardamento pa e sentencia (di dia 17 di juni) ta sigui. Ta notable cu den tur dos campo, esta tanto esun di Aruba Growth Fund (AGF) y esun di Carlson Group, partidonan no ta para keto y ta continua cu nan plannan. Sea ta divulga esaki of ta traha riba nan tras di cortina.
SENTENCIA PA AGF
E sentencia tin cu trece claridad pa ambos partido, unda cu huez tin cu dicidi si ta duna AGF of Carlson Group rason. Citando na banda di AGF lo nifica cu e deal entre Carlson Group y RIU ta wordo rechasa y para, y ta pone AGF sinta bek na mesa cu Carlson Group y posiblemente termina e deal cu nan tabata trahando ariba.
SENTENCIA PA CARLSON
Di otro banda, un sentencia na fabor di Carlson Group, ta pone cu e deal (cu Carlson Group mes a confirma den corte cu nan a sera cu RIU) ta continua. Y si esaki ta e caso, e hotel ta cambia di doño dentro di apenas un luna, manera cu abogadonan di RIU a informa e.o. e sindicato FTA e siman cu a pasa. A informa cu lo pone e nomber e ora riba e edificio asina cu esaki keda cla fin di e luna aki mes posiblemente.
DAÑO Y PERHUICIO
Den caso cu Carlson Group gana, AGF a bisa caba cu nan no ta interesa den daño y perhuicio, manera cu Carlson Group a sugeri den corte dia cu a trata e caso. E socio director di AGF, Rene Kan a bisa ainda e dia despues di e caso cu nan ta interesa solamente den haya e yabi di e edificio, y cu despues lo e compania bendedo haya e placa. Kan a sigura cu nan ta considera e edificio uno di Aruba y cu e mester keda den man di Aruba y nos arubianonan. Y cu bista riba esey, kier mantene e nomber Aruba Caribbean como un simbolo di arubianonan, ora cu e cadena Hilton cuminsa opera e hotel.
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.
ORANJESTAD - Den su conseho recien tocante di e di dos modificacion di presupuesto stipula 2023 (BW), e colegio di supervision financiero CAft a indica cu e ta anticipa resultadonan positivo inespera adicional. Cu e di tres raportahe di ehecucion (UR) ta confirma e imagen aki. CAft ta anticipa cu Aruba lo por cera e aña cu un surplus di financiamento di mas cu AWG 200 miyon pa e sector colectivo, loke ta 3 porciento di e producto nacional bruto (bbp). CAft ta conseha Aruba pa emplea e resultadonan positivo inespera pa amortisacion di debe, loke ta necesario pa baha e presion presupuestario di e gastonan di interes y pa crea espacio pa otro gastonan necesario. Enbista di e hecho cu e resultado lo sigui impacta na 2024, CAft ta pidi boso pa adapta e presupuesto na e dato aki den e prome BW 2024.
ORANJESTAD – Gobierno di Aruba ta sigui den incumplimento ora cu ta trata p.e. entregamento di documento. Recientemente e colegio di supervision financiero CAFt a bolbe hala orea di gobierno riba e tardansa. “Riba 29 di februari 2024, Colegio di supervision financiero di Aruba (CAft) a ricibi e informe di implementacion (UR) di Aruba tocante di e di tres kwartaal di 2023” e colegio ta cuminsa na bisa. Y no ta prome biaha cu gobierno ta laat, y no solamente cu e UR, sino cu otro temanan tambe. Notable ta cu na comienso di aña aki caba, CAFt a reclama caba riba un situacion asina, cu Noticiacla tambe a raporta e tempo ey. Y ainda gobierno ta sigui cu e tardansa.