WILLEMSTAD - Ayera 2 di mei a kumpli nèt 54 aña ku e avion di ALM buelo 980 a baha den laman djis pega ku St. Croix, oséano Atlántiko. E buelo a sali for di New York John F Kennedy International Airport pa bai St. Maarten Juliana Airport. Riba e buelo tabatin komo miembronan di kabina e yunan di Kòrsou Tobias (Tito) Cordeiro, Wilfred (Boy) Spencer i Margareth Abraham. E dosnan ku a keda bibu tabata Tito Cordeiro i Boy Spencer (a fayesé algun aña pasá. Un total di 23 persona a muri den e aksidente aki miéntras 40 a sobrebibí.
Ayera a honra Margareth Abraham ku un mural na Airopuerto di Kòrsou.
“Tin asina tantu kos di e historia akí ku nos ke preservá i sigurá ku lo e sigui keda kontá pa generashonnan benidero. Su akto noble no tin mag di ser lubidá nunka. Nos ta kere ku esaki ta muchu mas ku solamente un evento trágiko”, asina sr. Jonny Andersen, CEO di CAP a bisa.
P’e motibu akí, durante un seremonia spesial dia 2 di mei 2024, konmemorando e 54 aniversario di su fayesimentu trágiko, CAP orguyosamente a desvelá un mural koutivante honrando Margareth Abraham. Situá prominentemente riba e fachada di aeropuerto pafó di e Sala di Yegada, e mural pintá pa nos artista lokal Bagira, ta mustra detayadamente e kara di Margareth basá riba un di su portrètnan faborito. Ademas, e mural ta inkorporá un QR code lokalisá na man drechi, kual ta hiba tur esnan ku mira e mural na e webpage dediká di CUR, p’asina por siña mas tokante Margareth su historia remarkabel: https://curacao-airport.com/history-margareth-abraham/
Durante e seremonia di konmemorashon, e lista di oradónan a inkluí figuranan notabel manera sr. Jeffrey Abraham, representando e famia komo e yu hòmber mas chikitu di e defuntu ruman hòmber ohochi di Margareth, Carol Abraham, i tambe sr. Tobias ‘Tito’ Cordeiro, e úniko steward sobrebibiente di e buelo. Ademas, sr. Robby Schouten, prometido di Margareth, kende ta biba den eksterior, a manda un mensahe di video for di su kurason, kual a ser pasá durante e
seremonia. Alabes sra. Margy Bond, Kònsùl General di Merka, sr. Ruisandro Cijntje, Minister di Desaroyo Ekonómiko i sr. Charles Cooper, Minister di Tráfiko, Transporte i Planifikashon Urbano tambe a duna spich durante e seremonia. NOTA: Texto ta scirbi na Papiamento fonetico di Corsou.
WILLEMSTAD – Varios hungadornan professional Hulandes a ignora e carta di invitacion cu e entrenador pa seleccion di Corsou Dick Advocaat a manda pa nan. Hungadornan manera Justin Kluivert, Tahith Chong, y Riechedly Bazoer a haya un carta y ningun di tres a reacciona. Kluivert awe a tende cu e no ta selecciona pa hunga pa Hulanda pa Copa Europa. Porta awor e por cambia di opinion. Pero manera Advocaat a bisa, nan a nenga pasobra nan ta kere cu nan ta suficiente bon pa e seleccion Hulandes. Awe Advocaat a haya razon. Corsou mientrastanto a publica un lista di hungadornan pre selecciona y nombernan di Kluivert, Chong, yBazoer no tabata aden. E prome wega di cualificacion ta dia 5 di juni contra Barbados y dia 8 di juni contra di Aruba.
VELA DE CORO – Den un aña , La Vela de Coro a exporta 3.155 ton di producto pa Corsou. ASina e vicepresidente di Camara de Comercio di La Vela de Coro, Juan Gotopo, ia informa e siman aki. Esaki ta for di momento cu na 2023 a cuminsa manda e prome productonan pa Corsou. Mayoria di e productonan ta fruta y vegetables, aunke tin tambe carbon vegetal, y material di construccion.
WILLEMSTAD – Minister Pisas huntu ku Jandino Asporaat durante un reunion djaluna atardi a deliberá tokante e daño ku e proyekto Hòfi Mango a sufri durante e áwaseru eksesivo ku a kai djasabra último.
PHILIPSBURG .- Na Sint Maarten djabièrnè mainta a instalá gobernashon nobo, bou di liderazgo di promé minister Luc Mercelina. E kabinèt di minister no ta kompleto ainda; e prosedimentu di ‘screening’ di dos posibel minister no a terminá despues di mas ku dos luna. Partido di gobernashon PFP ta demandá klaridat tokante esaki.
BANDA BOU – E parke Nacional Hofi Mango, un parke di naturalesa crea pa e comediante Jandino Asporaat y su ruman, a keda destrui den fin di siman pa e inundacion a consecuencia di awacero torencial den fin di siman. E dam na e sitio a kibra cu a pone cu practicamente tur cos a keda destrui. E manehador di e parke y su famia por a keda evacua na tempo. Mientras cu e daño ta enorme, Asporaat ,- cu a bula bin Corsou mesora for di Hulanda -, a priminti cu lo reconstrui e parke y hacie aun mas bunita. E parke ta situa na e parti mas afecta pa e inundacion y awacero na Banda Bou. Segun Asporaat, e inundacion ta debi na mal mantencion di e damnan riba nos isla. “Si no ta tuma medida cu ta importante pa infrastructura y seguridad, ta cos di hiba awa laman”, Asporaat a critica den direccion di gobierno.
WILLEMSTAD – E fotonan ta papia pa nan mes. Un destrukshon formal áwaseru a laga atras den área di Banda Abou djasabra último, prinsipalmente playanan. Esaki ta motibu ku GMN i CTB a saka un konseho pa por lo pronto no hasi uso di e playanan menshoná te un próksimo aviso.