- Tromp ta kibra silencio pakico a abstene di vota pa ley di matrimonio mesun sexo
- Ley di matrimonio pa pareha di mesun sexo a keda pega!! Parlamento a vota 10-10
- Hulanda a cera contract temporal cu Medicair pa ambulance flights entre islanan BES, Corsou y Aruba
- Segun Elmar, blaas di helium atrobe awe a causa interupcion di coriente na varios bario di Aruba
- Corte: Gobierno mester cumpli cu sentencia pa drecha problema di RWZI
Agente di biahe Mericano a estafa grupo di turista cu a paga pa bin Aruba pa dia di mama
MINESOTA – Un grupo di biahero cu a paga bon placa pa nan vacacion na Aruba, a keda defrauda pa un agente di biahe di Minesota cu a haci esaki mas biaha. Ta trata di e agente di biahe Monica Faulker. E agente aki a laga un grupo di 71 biahero desampara na Costa Rica, sin hotel. Un otro grupo a keda pega ora cu nan a yega riba waf pa subi un barco crucero, solamente pa tende cu e agente no a paga e barco nan placa.
ARUBA
Un grupo di biahero cu tabata planea pa pasa dia di mama na Aruba, a haya sa dos siman prome cu nan vacacion a keda cancela. Despues cu e grupo no a ricibi confirmacion di nan hotel for di Faulkner, nan mes a yama e hotel cu nan lo mester tabatin reservacion, pa tende cu nunca e hotel a keda reserva. Esaki mientras cu e biaheronan a paga Faulkner por lo menos 2.500 dollar pa camber. “Mi a duna e hotel e nomber di cada persona den nos grupo, y nan a bisa cu ningun hende tabatin un camber reserva. Esaki ta loco pasobra nos a duna e muher (Faulkner) un total di 5.600 dollar!”. Diadomingo pasa, Faulkner a yama algun di e biaheronan pa Aruba, pa bisa nan cu e biahe a cancela, mientras otronan no a tende nada mes. Te cu awor, ningun di esnan cu mester a bay Aruba, a haya nan placa bek.
Studiantenan Arubiano di Merca na palabra pa empodera studiantenan na Aruba
WASHINGTON - Minister Plenipotenciario na Merca hunto cu Education USA, ta ofrece diabierna awor, dia 10 di mei 2024 un sesion virtual pa studiantenan cu ta bayendo Merca pa nan estudio. Durante e sesion aki studiante- y graduadonan Arubiano na Merca lo hiba palabra y lo comparti nan experiencia cu hobennan cu ta desea di haya mas informacion.
Tur cos ta cla pa inicio di Eurovisie Songfestival na Suecia awe
MALMÖ – Awe nochi e festival popular Europeo Eurovisie Songfestival ta inicia, e biaha aki pa di tres biaha, na Suecia. Esaki ta un festival cu a propulsa carera di hopi artista den pasado internacionalmente, manera esun mas popular 'ABBA' cu na 1974 a participa cu nan cancion Waterloo. Paisnan Europeo ta participa y si nan clasifica, nan ta pasa pa e final cu ta e evento musical mas mira di Europa. Hopi atencion ta e biaha aki riba e participante di Hulanda Joost Klein, debi na su forma exentrico di presenta y su cancion Europapa diferente cu ya a bira hopi popular. Diahuebs awor e ta riba tarima. Mes momento tin hopi seguridad pa e festival aki, completo cu francotirador tur caminda.
Merca a sanciona empresanan Colombiano pa a facilita transporte maritimo di migrantenan iregular
WASHINGTON – Merca a tuma medida dialuna pa impone restriccion di visa contra ehecutivonan di varios empresa Colombiano di transporte cu tabata traslata migrantenan via laman ilegalmente. “E empresanan aki a probecha di e migrantenan vulnerable operando servicio diseña principalmente pa facilita e migracion irregular pa Merca” departamento di estado Mericano a bisa.
Polis di Israel a invadi studio di canal Al Jazeera den Jerusalem
JERUSALEM – Polis Israeli a invade e studio di e canal di noticia Al Jazeera, despues cu a bira conoci cu e gobierno lo a laga cera e oficina di e canal mas prome. E invacion tabata di un oficina di e canal den un hotel den Jeruzalem. Comunidad internacional ta wak e localidad como un lugar ocupa pa Palestina. Inspectornan di gobierno y polis a drenta den un sala di redaccion y a confisca aparato di transmission. Mientrastanto e canal a stop di transmiti na Israel.
Gobernador di Los Angeles cu critica riba actuacion laat di polis contra demonstracionan
LOS ANGELES – Gobernador di estado Mericano di California a critica e reacciona laat di polis riba un confrontacion entre demostrantenan rival riba University of California (UCLA). Un grupo pro Israel a invadi un campo di tent di demonstrantenan pro Palestina riba e campus di e universidad. Polis lo a reacciona apenas algun ora despues, cual e gobernador Gavin Newsom a yama un reaccion ‘limita y laat’ y inaceptabel di parti di polis. Varios otro ciudad tambe ta tin studiantenan universitario protestando awe riba e tema di e guera na Gaza actualmente. .
Petro: Colombia a kibra relacion diplomatico cu Israel
BOGOTA – Presidente di Colombia Gustavo Petro a kibra relacion diplomatico cu Israel entrante awe 2 di mei. Esaki e la anuncia un dia prome durante un discurso. E presidente ta contra e accionan di Israel na Gaza, Y ta sostene esnan di Palestina.
Follow NoticiaCla
