ORANJESTAD - Tin varios tipo di virus di computer pasando rond na Aruba e dianan aki. Segun e compania di telecomunicacion SETAR, algun compania na Aruba a detecta cu tin varios tipo di virus ta aparece den nan e-mail. Entre otro tin un virus cu ta replica su mes y ta manda mail pa otro hende cu nomber y e-mail di usuarionan cu no a manda nada. Esaki por bin di un e-mail di un hende cu bo conoce, pero cu no a manda nada pero su mail ta wordo uza.
VIRUS SECUESTRO
Tambe tin un virus cu ta secuestra bo informacion den bo computer y ta pidi pa click y sigui instruccion pa haci un pago di placa pa nan por manda e clave pa dunabo acceso na bo filenan bek. Esaki hopi bes tin un nomber di un persona cu bo no conoce, e topico ta straño y e ta cuminsa cu un saludo. E tipo di e-mailnan aki ta poco straño y tur tin un attachment of un link cu ne. Di esnan cu tin attachment, e attachment ta sea e ta un .zip of .exec
POSIBEL VIRUS
Usuarionan di e-mail y social media manera Facebook, mester pone hopi atencion.
E-mail of posts cu ta contene un of mas di e siguientenan ta sospechoso:
· un solo liña skirbi, hopi biaha cu spelfout of Ingles mal skirbi;
· un topico (“Subject”) poco straño of desconoci;
· un e-mail adres desconoci cu ta manda e e-mail;
· ora pidi pa click riba link of attachment pa tuma nota di contenido importante (portret, video etc.);
· ora un compania pidi pa update bo informacion;
· ora no tin remitente poni full abou den e e-mail.
YAMA DEPARTAMENTO IT
Ora bo ta duda ta consehabel pa tuma contacto mesora cu departamento di IT of yama e colega of e amigo cu a manda e contenido. Pa preveni infeccion di cualkier di e virusnan aki den computer cu por daña full un sistema di computer, no tuma risico di habri ningun file si bo no ta wardando riba esaki.
KICO PA HACI
Si acaso bo realisa cu bo a habri un file asina, kita e plug di network di bo computer mesora for di bo sistema na bo trabou, si bo ta usando un network di trabou y contact bo departamento di IT mesora. Alerta otro coleganan di biaha di e fenomeno pa nan por reconoce esaki den nan mail, debi cu e ta bin den diferente forma.
WORMS Y VIRUS DEN EMAIL
Virus – Un virus di computer ta un programa di computer scirbi pa replica su mes y pa haci cambionan den e manera cu e computer ta opera, sin permiso of conocemento di e usuario. Apesar cu e terminologia ta usa comunmente e ta referi na varios sorto, un berdadero virus mester replica su mes, y mester ehecuta su mes. E ultimo aki ta un virus cu ta reemplaza filenan existente cu un copia cu ta infecta. Mientras cu e virus por ta intencionalmente destructivo—door di destrui data, por ehempel—hopi virus ta benigno y molestioso.
Email Worms – mayoria bes ta referi na wormnan multiple. Na momento cu bo habri un attachment cu tin worm aden, tin Infection. Hopi bes un attachment por aparece algo normal como cu e ta bin di un contacto cu bo conoce, sinembargo, e e-mail di e contacto a keda infecta door di e worm. Ora bo habri e attachment cu e worm, e email ta keda infecta y ta cuminsa manda worm pa tur contacto den bo address book. E worm por keda reparti via Internet na un gran escala.
ORANJESTAD - Habitantenan di Bucutiweg a comparti nan rabia y disgusto cu nan tabatin pa e hecho cu bishitantenan di e concierto latino diasabra anochi a blokea nan casn y di bisiña. Segun e relato di e habitantenan, tabata alrededor di 8:30 diasabra anochi riba Dia di Rey cu e bisiñanan a nota cu algo straño ta pasando den nan bario. Un cantidad di auto a cuminsa aglomera canto di e caminda riba Bucutiweg cu ta un caminda sin continuidad, pues e ta limita na mas direccion pasobra cu e ta caba na e cura di Aeropuerto. Bisiñanan no tabata tin un idea di kiko tabata pasando y a cuminsa puntra otro ken sa di algo cu por tin den nan bario cu normalmente ta hopi trankil. Pero despues di un rato e cantidad di auto a bira asina hopi cu nan casnan a keda blokea.
ORANJESTAD – Awe nochi e invitado di e programa Noticiacla LIVE ta Prome Minister di Aruba Evelyn Wever-Croes. E programa lo ta uno en bibo manera semper, cu preguntanan skerpi lansa pa periodista Tito Laclé, y e lo cuminsa pa 9’or di anochi riba tur Plataforma di noticiacla.com esta e website, e app y e pagina di Facebook. Un cantidad di topico lo keda trata, y bo ta keda invita pa wak e desenlace di e programa. No perde! Awe nochi 9’or!.
ORANJESTAD – E fundacion Aruba Birdlife Conservation (ABC), conoci pa ta defende naturalesa, pahra y tur otro aspecto di medio ambiente di Aruba, kier claridad riba e tema di Isla di Oro. Pa medio di un rapport cu nan a publica recientemente, yen di informacion y documentario existente, e kier ‘claridad mei mei di misinformacion’. “Mei mei di debatenan recien y malinformacion riba e status di Isla di Oro, e rapport aki ta boga pa claridad” e conclusion di e documento ta bisa. “E ta enfoca e urgencia constante pa proteha Isla di Oro y ta confirma su tarea den mantencion di e salud di Aruba su estado ecologico”.
ORANJESTAD - Diasabra 27 di April, riba dia di rey, un grupo di cuidadano concerni a protesta durante e protocol di gobierno. E mensahe cu e grupo kier a trece dilanti ta entre otro: pa duna naturalesa un prioridad, pa para e construccion di hotels, pa tuma e crisis di medioambiente na serio, pa relfeha riba e efecto nan colonial di Hulanda, y pa tin accion pa cambio di clima.