FBI: Aruba tin un di e miho cuerponan di polis den region di Caribe

ORANJESTAD - “Aruba police is probably one of the best law enforcement entities that I’ve seen in the region”, asina Jerry Granderson, kende ta un agente special di Federal Bureau of Investigation (FBI) y un instructor na FBI Academy a expresa dialuna den un entrevista durante e seminario cu e tema “Klantgerichtheid en Dienstverlening” organisa pa Cuerpo Policial di Aruba. Special Agent Granderson tabata un di e oradonan invita pa tabata orado durante e seminario aki.

Jerry Granderson a bishita hopi di e islanan den nos region pa su trabao y awo ta na Aruba pa ofrece un curso special tocante e relacion entre e comunidad y “law enforcement” en general, pero en particular Cuerpo Policial. Hefenan di diferente otro departamento cu ta pertenece na e cadena hudicial tambe a wordo invita pa participa na e cursonan aki cu ta organisa pa Cuerpo Policial di Aruba y lo wordo atendi pa mas of menos 400 Polis durante e tres dianan di e seminario. E agente special a splica cu su presentacion ta dirigi riba e tema di integridad pa cu con casonan ta wordo investiga y loke e meta ta pa reenforsa loke ta existente caba. El a observa cu e coleganan di Aruba ta hopi participativo. El a comenta cu ta importante pa “law enforcement” tin un relacion cu comunidad y pa comunidad ta envolvi den e proceso pa resolve crimen. E seminario a enfoca riba establecimento y reenforsa e relacion entre comunidad y Cuerpo Policial y e cadena hudicial en general.