- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Aparato cu Edward Cheung a diseña, a bay perdi den explosion di cohete 'Antares'
MARYLAND – E cohete (raket) 'Antares' cu mester a transporta toneladas di ekipo pa e laboratorio espacial diamars anochi, a rementa 20 seconde den pleno lansamento. Y cu e explosion aki, un obra fabrica y lidera pa e arubiano Edward Cheung, tambe a bay perdi. Cu esaki, e incidente aki ta yega ‘mas serca di cas’. No ta kita afo cu e explosion di e cohete, tabata induci pa e personal mes. E hecho ta cu un aparato cu nos arubiano a traha, awor a bay perdi. E aparato, diseña pa detecta fuga di cierto gas, tabata parti di e ekipahe pa e nave. Awor tin cu ekipa un otro cohete, cu e replica cu Cheung a traha. E la confirma na NoticiaCla.com cu enberdad tin dos, y cu nan ta prepara pa algo asina.
Cheung, despues di a biaha 3 ora pa e sitio di lansamento, tabata (hunto cu su famia), serca di loke a sosode. “E prome seconde di e lansamento a bay sin ningun incidente”Cheung a conta NoticiaCla.com. “Nos por a mira e motor di e prome fase start, y e cohete a keda lansa ariba, for di e toren di lansamento” Cheung ta sigui conta. Manera ta norma, un cantidad di huma ta sali for di e cohete. “Mi a spera di mira e cohete sali for di e huma ey. Ora cu esey no a sosode 4 seconde den e lansamento, mi a realisa cu algo tabata robes” Cheung a bisa.
Mientras cu otronan a keda sinta, Cheung a lanta para y pone su mannan riba su cabes, den estado di shock. 31 seconde despues di e explosion, e onda di e choque a alcansa e area unda cu Cheung y demas persona tabata. “Mi por a corda cu nos a tende un boom duru. E por tabata un echo di e explosion” Cheung a bisa. Mesora nan a haya instruccion pa bandona e sitio pa medio di busnan special ubica. Mes momento tabatin hopi vehiculo di emergencia cu sirena, moviendo cu velocidad halto pa e sitio.
Ta despues a bira conoci cu e explosion tabata induci pa un personal di seguridad ( Un RSO (Range Safety Officer) di e area. “No compronde mi malo. E ta entrena pa esey. Ora cu e la mira cu e cohete no kier a sigui subi, e la primi e boton di propio destruccion ( pa evita un otro problema mas grandi)” Cheung a bisa. E tabata un anochi traumatico, pero ningun hende a sali herida, cu ta e punto mas principal. “Nos a traha uno di spare, y lo ta preparando esaki pa un proximo lansamento” Cheung a finalisa bisando. Nota. Tur e potretnan ta di Edward Cheung, cu e mes a saca durante e lansamento y tambe di e aparato cu e la diseña.
Cabaynan Real Britanico a scapa y core pa loco den centro di Londen
LONDEN – Cabaynan Real di Inglatera a scapa durante un entrenamiento y a core pa loco den centro di Londen diaranson mainta. Mientrastanto tur e 5 cabaynan a wordo gara bek. Por lo menos 4 persona a keda herida, y e cabaynan tambe. E cabaynan ta pertenece na un stal di e cas Real Britanico. E problema ta cu nan tabata den entrenamiento ora cu nan tur a scapa y drenta e ciudad. E cabaynan, den panico a core dal den taxi, bus y mas, lagando nan destrui. No ta conoci kico a sosode cu e cabaynan a logra scapa.
Inteligencia Hulandes investigando politica Venezolano cu bista riba islanan ABC
DEN HAAG - Agencianan di inteligencia Hulandes, e inteligencia militar y seguridad (MIVD), y e servicio general di inteligencia y seguridad (AIVD) a uni forza pa investiga e panorama politico y militar Venezolano. Nan enfoke ta extende pa implicacionan pa Reino Hulandes cu atencion particular na e paisnan Aruba, Corsou y Bonaire. Entre e investigacionan aki, tin e regimen di Maduro pa solidifica su poder y stragecia pa e proximo eleccion na juli di e aña aki. Tambe tin e situacion fronteriso cu pais bisiña Guyana esta Essequibo. Internamente ta bisa cu e regimen militar ta marginalisa, y cu e oposicion ta bringando otro tambe. Ta mustra segun e investigacion inicial cu e regimen no ta mucho habri pa consesion pa eleccion honesto.
Baby di 15 luna na Italia a wordo mordi y mata pa dos pitbull
SALERNO – Dos pitbull a morde y mata n baby di 15 luna na Italia recientemente. E incidente a sosode den Salerno, un pueblo den sur di Italia. E mucha di e baby a keda herida durante e atake. E baby tabata den brasa di e tio, ora cu e cachonan a ranca e baby for di e brasa. E mama a purba rescata e baby, y a keda herida den e intento ey. E pitbulnan tabata di un famia cu ta biba den e mesun bario. Den un otro relato separa, dos luna pasa, un hoben di 15 aña, tambe na Italia, a wordo mata door di tres rottweilers. E cachonan a scapa di un cura den Manziana na Roma. E curpa a wordo haya door di un peaton den un parke. Den ambos caso, no tin informacion di kico precies a conduci na e atake di e cachonan aki.
Tin hopi incertidumbre riba supuesto atake di Israël riba Iran marduga
TEHERAN – Mientras cu tin informacion cu Israël a ataca Iran durante diabierna marduga, tur dos pais ta keto riba e atake aki. Iran ta bisa cu e la saca algun drone di Israël for di shelo, pero ta desmenti cu tabatin un atake di raket. Algo cu prensa Mericano si ta raporta. Iran no ta yama Israël como e culpable tampoco, dus tin hopi incertidumbre riba e atake aki. Recientemente Iran a haci un atake specifico y calcula riba Israël, y despues Israël a keda keto. Esaki ta un noticia den proceso.
Cantidad grandi di Dominicano bibando illegal na.Aruba a bolbe nan pais boluntariamente
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
Maduro: Venezuela ta sigui cu of sin licensia Mericano pa alivia sancion petrolero
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
Follow NoticiaCla
