RdA ta garantisa cu Aruba no por keda sin producto petrolero

RdA ta garantisa cu Aruba no por keda sin producto petrolero

Posted on 02/12/2019 3:05 pm AST | Updated on 02/12/2019 3:06 pm AST

ORANJESTAD – Refineria di Aruba (RdA) ta garantisa cu Aruba no por keda sin producto petrolero. Y cu esey, nan kier men suministro di gasoline. Asina e presidente di RdA Alvin Koolman ta bolbe sigura den un comunicado diamars. NoticiaCla a referi na esaki caba diabierna despues di e conferencia di prensa di e compania. Sinembargo diamars e compania a bin cu datosnan extra pa splica e situacion den un intento pa trankilisa comunidad. 

Aruba su consumo diario ta 7 mil bari di producto petrolero reparti entre 50% Fuel Oil y 50% Gasolin, Diesel y Jet Fuel. CEO & Managing Director di RdA Sr. Alvin Koolman: “Normalmente bo ta mantene 45 pa 70 dia di inventario, awor aki 19 di Februari ta bin e siguiente cargo… pa abastece 85 dia di Gasolin, Diesel y Jet Fuel”, garantisando cu Aruba no tin problema cu suministro di 3.5 mil bari di Fuel Oil pa WEB pa dia, y 3.5 mil bari di Gasolin, Diesel y Jet Fuel pa dia. 

E importacion di e productonan petrolero di Aruba ta wordo importa pa Fuels Marketing & Supply Aruba N.V. (FMSA), cu ta un subsidiario di Refineria di Aruba N.V. (RdA), e fuel aki ta keda almacena den tankinan di Citgo Aruba Terminal (CAT). CAT ta un subsidiario di Citgo Aruba Holding, cu ta cumpli cu su lease na RdA y pago di impuesto mensual na pais Aruba. CEO di RdA Sr. Alvin Koolman a splika prensa recientemente e procedura den parti technico y financiero pa compra na un forma responsabel di productonan petrolero, cu mester yega cu tankeronan prome cu e inventario yega na un minimo di 14 pa 16 dia, dependiendo di factornan externo.

E strategia di FMSA ta pa garantisa 14 pa 16 dia minimo den tanki almacena na e momento cu e barco yega Aruba, na Fuel Oil 70 dia pa WEB y 45 dia na Jet Fuel, Gasolin y Diesel. Aruba no ta core ningun peliger na e momentonan aki. Medida di precaucion a keda tuma cu compra di extra producto petrolero garantisando e.o. 85 dia di Fuel Oil pa WEB. 

Financieramente nos ta papiando di un suma grandi “Bo ta papiando di basta placa. Imaginabo 7 mil bari pa dia x 14 dia x $70, esey ta placa cu nunca nos por uza”, ta palabranan di CEO di RdA Sr. Alvin Koolman. Na un forma diligente y repsonsabel ta monitoria compra, consumo y proceso di entrega garantisando asina cu semper tin inventario disponibel. 

  • Powered by SETAR