ORANJESTAD – Departamento di impuesto ta sugeri clientenan (sigur esunan di mas edad) pa bin paga y of busca nan plachi di number di auto den oranan di atardi envez di mainta. Asina nan ta bisa riba un post riba nan pagina di Facebook diabierna. Nan ta mustra cu despues di a observa y scucha e comentarionan ayera y awe en conexion cu otorgamento di plach'i number, nan por bisa cu tin mas aglomeracion di hende parti mainta. Ya despues di 12'or no tin rij largo mas y ayera despues di 4'or atardi tawata mas keto ainda.
YUDA
“Nos kier yuda tur cliente, pero si dado momento hopi cliente yega pareu, e ta dificil pa yuda tur pareu y esey ta causa e tempo largo di espera” e post ta cuminsa na bisa. “Den caso cu ta hopi druk, nos ta pidi nos clientenan - specialmente esnan cu ta diabetico of tin algun problema di salud - pa evalua pa bay bin bek mas laat pa evita cu ta warda largo”. Segun DIMP, durante dia berdad ta calor, pero atardi pa anochi ta bira hopi fresco. No lubida cu den siman nos ta cera te 8'or anochi. No ta necesario pa keda para largo durante dia. “Pa nos clientenan cu no por cu e molestia di solo, nos ta recomenda pa acudi cerca nos entre 4'or y 8'or anochi” e post ta sigui bisa.
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.