- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
BCA: Crecemento economico marginal proyecta pa 2019
ORANJESTAD – Banco Central di Aruba ta proyecta un crecemento economico marginal Aruba pa 2019. Asina e instituto financiero a bisa den un comunicado diahuebs. Awe Banco Central di Aruba (BCA) a publica un ‘Economic Outlook’ di proyeccionnan pa 2019. E publicacion aki tambe ta inclui un actualizacion di calculacionnan pa 2018 reflehando e desaroyonan y datos mas reciente.
E economia di Aruba ta proyecta pa cai den termino real cu 0,5 porciento na 2018. Compara cu e proyeccion anterior, publica na april 2018, e tasa di crecemento a wordo ahusta abou cu 0,8 punto di porcentahe. Un crecemento marginal di 0,1 prociento ta proyecta pa 2019.
E produccion economico pa 2018 y 2019 ta principalmente impulsa pa exportacion turistico. Consumo modera y incertidumbre den e ehecucion di varios proyecto di inversion lo impedi crecemento significante di produccion economico. E introduccion di e ‘crisisheffing’ na juli 2018 probablemente lo impacta actividadnan economico pa medio di consumo reduci na tanto 2018 como 2019.
Actividadnan di exportacion turistico, e motor principal di crecemento economico, ta proyecta pa aumenta cu 1,5 porciento (den termino real) na 2018. E subida aki ta refleha e aumento proyecta den e cantidad di bishitante procedente di e mercado Mericano. E perspectiva pa turismo pa 2019 ta positivo cu un crecemento den exportacion di servicionan turistico di 0,9 porciento (den termino real), atrobe impulsa principalmente pa e mercado Mericano.
Varios proyectonan grandi cu ta den ehecutacion of ta planea pa wordo na 2018 ta inclui e continuacion di e renovacion di e Dr. Horacio E. Oduber hospital, continuacion di Watty Vos Boulevard, actividadnan di mehoracion na aeropuerto, y varios otro proyecto relata na turismo. Ta estima cu inversion na 2019 lo aumenta significantemente. E expansion premira ta primiordialmente atribui na e proyecto ‘Gateway 2030’ (expansion y modernisacion di aeropuerto), fasenan final di tanto e hospital como e Watty Vos Boulevard, y inversionnan significante di WEB. Sinembargo, ehecucion di proyectonan di inversion ta suheto na retraso y incertidumbre.
E promedio di inflacion ta proyecta na 3,4 porciento y 2,3 porciento pa 2018 y 2019, respectivamente. E embargo comercial di Venezuela a causa un subida den e prijsnan di cuminda durante e prome trimester di 2018, cual probablemente lo tin un efecto durante e resto di aña. E ‘crisisheffing’ lo aumenta inflacion cu 0,9 punto di porcentahe na tanto 2018 como 2019.
Ta premira un surplus riba e cuenta coriente di e balansa di pago na Aruba na 2018 y 2019, basa principalmente riba e entrada di turismo. Sinembargo, e surplus ta premira pa ta chikito (menos cu Afl. 11 miyon) compara cu e ultimo tres añanan. Ta anticipa cu e cuenta di capital y finansa di e balansa di pago lo registra un deficit mas chikito durante ambos aña compara cu 2017, Afl. 33 miyon y Afl. 44 miyon, respectivamente. Ingresonan neto pa proyectonan di inversion, real estate y benta di timeshare probablemente lo conduci na un ingreso neto di inversionnan directo, mientras ta anticipa cu gobierno lo emiti menos debe externo den futuro.
Consecuentemente, na 2018, e reserva di divisanan neto (excluyendo revaluacion) ta proyecta pa cai cu Afl. 33,5 miyon te na Afl. 1.651,3 miyon y sigui baha te na un nivel bou di Afl. 1,6 biyon na fin di 2019 si no tin un cambio den maneho monetario, di divisa, y economico. Ta proyecta cu reservanan total lo yega na un nivel na tanto 2018 como 2019 cu ta igual na 5,0 luna di pagonan di e cuenta coriente (incluyendo petroleo).
Pa fomenta crecemento economico y pa reduci presion riba e reservanan internacional, ta rekeri inversionnan significante y esfuersonan di maneho pa expande actividad economico y fortalece e resistencia economico contra shocknan externo. E crecemento economico proyecta ta pues suheto na riesgonan considerabel.
SETAR a tene su Avigilon ALTA Launch Event cu enfoke riba e futuro di seguridad
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
Follow NoticiaCla
