ORANJESTAD – Banco no ta bay cobrabo 6% riba tur transaccion, sino solamente riba transaccion cu ta genera entrada. Asina un fuente bancario na Aruba a confia na NoticiaCla. Oficialmente mientrastanto e presidente di asociacion di banco na Aruba (ABA) Elvin Maduro a informa NoticiaCla cu nan ta den ‘combersacion cu gobierno riba e tema’ y cu ‘ora cu nan ta cla, lo bin afor pa duna un declaracion mas concreto’.
COBRA USO ATM?
Bek pa e fuente, a mustra cu p.e cu banco no ta cobrabo pa lanta bo propio cen. Pues si bo ta lanta bo placa di ATM, aunke cu e ta considera como un transaccion, banco no ta cobrabo. Pero si bo ta na caha, y bo haci un transaccion, y tin un gasto, e ora si bo tin cu paga e 6%. Si un banco ta cobra cliente di un otro banco pa hasi uso di su ATM 1florin, anto e lo cobra 1 florin +6% pa e servicio.
DISCUSION RIBA TRANSACCION
E asunto a bira un discusion algun siman atras ora cu un declaracion cu e presidente electo di ABA a haci, cu lo cobra pa transaccionnan bancario. Minister di Finanza Xiomara Ruiz Maduro a bin dilanti y sigura cu esey ta un informacion incorecto. Despues a reuni cu ABA y a dicidi cu ta bay atende e asunto interno y ora cu ta cla, ABA mes lo bin afo pa duna un declaracion kico ta kico exactamente.
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.