Menu

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Wever: Plan multi frontal mester yuda reduci deficit di Gobierno

ORANJESTAD - Manera NoticiaCla a anuncia anteriormente) awe a anuncia un plan di urgencia multi frontal, cu e fin di drecha e situacion financiero di Aruba. Entre e puntonan cu a resalta, ta e crisisheffing temporal di 2.5% cu ta drenta na vigor dia 1 di juli. E plan ta un plan multi frontal, pasobra e ta atende cu varios dimension na mes momento segun Wever, cu a bisa cue plan tin 4 meta:

Pa crea e condicionnan pa coregi e rumbo negativo cu nos pais ta aden, Pa stabilisa e crisis principal, Pa suavisa e efectonan pa esnan mas vulnerable den nos comunidad, a trabes di compensacion nan y Pa inverti den stimula inversion y desaroyo nobo den nos economia.

AUSTERICACION

Den e plan financiero pa 2018, Wever a bisa cu haci tur lo posibel pa acapara e efectonan di e refineria cu no ta habri, den e presupuesto mes, atravez di austerisacion. Segun Wever, nan a baha gasto di operacion di gobierno, gastonan di personal a baha, gastonan di biahe y gastonan di propaganda y promocion. A instrui austerisacion tambe pa e companianan estatal y pa institutonan di Gobierno. Wever a sigura cu a instrui nan pa nan tambe hala faha mara y pa asina por duna dividend mas halto na Gobierno. “Den e cuadro aki nos ta contemplando tambe pa introduci un maximo, un norm, riba e salario di directornan di companianan di Gobierno. Na Hulanda nan conoce un maximo cu un director por gana na 150% di e salario di Minister President, y nos ta contemplando pa introduci esaki na Aruba tambe”.

PLACA RIBA CAYA

Wever a bisa cu a inicia e proceso pa cobra tur placa cu ta riba caya y di esnan cu no ta pagando. Tanto esnan cu tin debenan atrasa na Gobierno, como esnan cu nunca a declara nan entrada of ta manda nan ganashi den exterior. “ Pasobra no ta husto cu nan no ta contribui na e fair share na caha di Gobierno”.

AUMENTA ACCIJNS

Wever a mustra cu a implementa un plan di desaroyo economico agresivo, pa crea varios pilar economico y crea mas cupo di empleo. Esaki sinembargo lo tuma mas tempo pa duna su frutonan. “ Pesey nos ta haya nos obliga pa tuma cierto decisionnan urgente, den forma di e accijns” Wever a bisa. E ta referi na un decision di aña 2007 cu Gobierno e tempo ey a baha e accijns cu 10 cen, y awo, debi na e crisis cu nos ta aden, a dicidi di tuma e accijns bek, tumando 2 cen ora prijs di gasoline baha. Pues e decision aki lo no conduci nunca cu prijs di gasolin ta subi.

CRISISHEFFING

Tur e loke a keda menciona, Wever a bisa, lamentablemente no ta suficiente. Especialmente debi na e sumanan halto cu nos mester paga na e proyectonan PPP, Gobierno ta anuncia cu lo introduci un CRISIS HEFFING temporal di 2.5%, entrante 1 juli 2018.

Pa evita abuso cu prijs, lo implementa control di prijs riguroso y lo amplia e canasta basico. E medida ta temporal pasobra momento cu nos logra e reforma fiscal y logra haci e sistema di belasting mas husto, esta cu schoudernan hancho ta carga mas pa e schoudernan smal, por elimina e crisisheffing . Sinembargo, e parti cu ta pa paga e PPP’nan, lamentablemente lo mester keda existi te ora nos caba di paga e proyectonan PPP.

COMPENSACION

Wever a sigura mes momento cu nan lo brinda compensacion na esnan mas vulnerable den nos comunidad.

Aumento di reparatie toeslag: Esnan cu ta gana 2,400 florin of menos, lo haya un aumento di e reparatie toeslag Rebaho di prima di AZV pa pensionado: Pensionadonan cu awor ta paga 10.5% lo bay paga 6.5% di prima AZV Introduccion di vrijstelling pa BBO pa comerciante chikito: esnan cu ta gana 12.000 florin of menos pa aña, no lo paga BBO mas. Aki nos ta pensa riba e persona cu ta bende pastechi, cu no ta gana mas cu 12 mil florin pa aña, y no ta cobra bo e BBO tampoco Ayudo na famianan cu no tin awa ni coriente, pa motibo di problemanan social, pa nan haya conexion bek di awa y coriente.“ Y mes momento, nos ta cumpli cu nos vision, y lo inverti den e area social, infrastructura y siguridad” Wever a sigui bisa.

CRISISPLAN

Den e presupuesto aki, apesar di e austeridad, Wever a bisa di a inclui e crisisplan social di 32 miyon florin, reparti riba añanan 2018 y 2019. Pues lo inverti den mas personal y mas material den e area social pa combati problemanan social y yuda esnan mas vulnerable den nos comunidad: nos hendenan special, nos muchanan cu ta wordo abusa, nos hobennan cu ta wordo gebullied, nos adultonan cu ta wordo agredi emocionalmente y fisicamente y nos grandinan cu ta wordo neglisha.

INVERSION

Tambe den e presupuesto aki tin inclui inversionnan den infrastructura, pa construi vivienda. Maneho di Gobierno ta pa promove pa tur aña un minimo di 1000 cas wordo constru a trabes di terenonan di Gobierno cu lo wordo otorga, incluyendo un minimo di 200 cas social pa esnan mas den necesidad. Asina famianan por construi nan propio cas y forma nan hogar. Y lo concentra riba drecha camindanan den barionan cu a keda sin haya atencion pa hopi tempo.

SEGURIDAD

Un otro parti importante inclui den e presupuesto ta inversion den siguridad, den cual ta inclui e inversionnan den equiponan moderno pa combati criminalidad, manera radar, den drones, y den mas auto di polis, pa haci Aruba mas sigur. Segun Wever pues, no solamente austerisacion, sino tambe inversion pa pone e ser humano central realmente.

TEMPO

“Esaki ta duna nos mas tempo e ora pa prepara e reforma fiscal miho, pa cambia e sistema di belasting pa uno mas husto. Y tambe pa nos desaroya nos economia, pa crea mas cupo di empleo” Wever a sigui bisa. “Asina hunto como pais nos ta evita di perde nos credibilidad financiero internacional. Nos ta elimina e riesgo di haya un KB, aanwijzing. Y nos ta contribui colectivamente pa crea condicionnan necesario pa mehora nos perspectiva di futuro”.

FAHA

Locual nos ta pidi di comunidad no ta facil, pero no tin otro forma. Nos ta hala faha mara awo, y mes momento ta haya e compensacionnan, y nos lo mira e frutonan hopi lihe di e sacrificionan cu nos ta haci awe. Awe nos ta haci esaki pa nos yiunan y nan yiunan, pa nan tin e oportunidadnan cu tanto nos ta desea pa nan. Pa e debe nacional no strangula nan y kita di nan oportunidadnan pa futuro.