ORANJESTAD – Un atraco arma a tuma lugar awe nochi na Caya Danza. Tabata diaranson anochi pa 21:40 cu central di polis a haya un yamada cu un atraco a caba di tuma lugar na WEI PAU SUPERMARKET na caya danza. Na yegada di patrulla a bin compronde di e señora cu un rato prome 2 hoben a drenta cu un arma di candela cada un y a pidi pa placa. Un di atracador a hinca man den e caha di placa y purba ranke bay cune. E otro atracador a ranca tas y un cadena di un señora cu tabata den e negoshi ne momento ey y a bay cu ne .E atracadornan a huy na pia direccion pabao . E descripcion di e atracadornan ta como lo siguiente. E prome atracador tin un pechi preto , t-shirt blanco, jeans blauw. E otro tin mea preto riba su cabez, t-shirt berde y jeans blauw. Tur dos ta color di cuero bruin licht y ta papia bon papiamento. Nan a bay cu mas o menos afl 300,- di e caha di placa y den e tas tabata tin mas o menos $300. Atraco team tin e caso bao investigacion. BFTO y slachtofferhulp tambe a yega na e sitio di e sucedido. Cuerpo Policial ta pidi ken cu por a wak algo jama tiplijn 11141.
SAVANETA – Dialuna marduga, riba dia di Himno y Bandera, Aruba a conoce su di 2 morto di trafico pa 2024. Tabata dialuna marduga despues di 4or cu un accidente hopi grave a tuma lugar riba caminda grandi di San Nicolas pa Playa na altura di Savaneta. Un motorciclista a dal frontal contra un auto Nissan march, ora cu e motorciclista tabata bin di pabou. E impacto tabata fuerte lagando e brommer destrui y e manehador, basta leu riba. Informacion ricibi ta mustra cu e chauffeur di e march lo a pasa un truck, y topa frontal cu e motociclista, cu e consecuencia conoci. Informacion cu Noticiacla a ricibi, ta cu e motorciclista cu ta esun cu a perde su bida tabata Maximilian Thomas Hernandez Pinedo (20) , naci na Aruba . Noticiacla ta manda palabra di condolencia na famianan di e fayecido.
MACUARIMA - Diasabra awor dia 16 di maart 2024, polis di districto di San Nicolas ta invita tur persona cu a haci nan peticion pa temporada di campamento pariba di brug, cu lo mustranan e sitio cu nan lo campa. Lo cuminsa 9’or di mainta den e area di Santana di Cacho, despues pa Baby Beach, Rodgers Beach y por ultimo pa e area di Zwat Mangel y Grapefield. Pa 1’or di merdia lo sigui na Savaneta y Pos Chiquito.
MACUARIMA – Cuerpo policial di Aruba a ricibi un flota di 34 auto nobo nobo marca Ford diamars. E agencia cu a percura pa esaki ta R. E Yrausquin & Sons. Nan ta bay awor di e marca Isuzu pa Ford, specificamente e modelo Everest y Ranger. A haci un cambio radical for di e zwaailicht blauw y oraño pa blauw y cora. E cambio aki tabata ta pa miho visibilidad y seguridad pa e agentenan policial pero tambe pa comunidad. Tambe lo tin sonido di sirena diferente compara cu antes pa mihor sonido.