Ex tereno di zona franca na waf di Playa ta bira Port City

Posted on 03/19/2018 3:49 pm AST | Updated on 03/19/2018 3:50 pm AST

ORANJESTAD – E area actualmente bashi na waf na Playa, unda cu antes tabatin e edificionan di zona franca, ta haya un nomber nobo, esta Port City. Asina director di Aruba Ports Authority NV, Jossy Figaroa a bisa den un conferencia di prensa dialuna. Ta trata di un tereno di 200 mil m2, cu NoticiaCla a raporta ariba na mei di 2017. E tempo ey a papia cu 40% lo wordo usa como parke pa publico, mientras cu 60% lo wordo desaroya. E interes pa desaroyo ta hopi halto, pero e prioridad ta bay pa inversionista local. E tereno ta esun cu for di ‘pafo’ ta mira un lona cu ta tapa esaki pa publico, y ta un area cu ta yega te na e area unda cu tin e actual Coney Island.

DESAROYO

Segun Figaroa, lo tin un plan masha grandi mes pa full e tereno aki. “Nos ta kere cu na Aruba mes tin suficiente desaroyadornan pa bay desaroya” Figaroa a bisa. E ta haci enfasis riba e aspecto local mirando e interes grandi cu tin pa esaki, sigur local y internacional. No tin un plan defini ainda di con exacto lo desaroya esaki. Loke nan kier tin eynan, ta pa tur hende ta orguyoso di dje. E intencion no ta pa turistanan cu baha di e barconan crusero, y drenta mesora den e area ey. E intencion ta pa nan tin acceso na final di nan biahe. Figaroa a sigura cu pronto lo duna un presentacion publico riba dje, cu lo tin cu bira ‘masha bunita mes’.

GOBIERNO

Cu cambio di gobierno, tin chens cu por tin cambio den e maneho pa cu esaki. Como tal Figaroa a bisa cu ta duna gobierno tur espacio pa trece tur adaptacion cu gobierno ta kere cu mester tin. A mustra cu gobierno kier pa pronto e proyecto bay den ehecucion. Ta trata di algun luna prome cu cuminsa cu esaki. Pero segun Figaroa, esun cu ta keda cu ultimo palabra pa e.o. maneha y controla esaki, ta APA. Lo delinea criteria ken ta bin na remarke pe. “No ta gobierno cu ta bay duna tereno na hende, sino APA. Nos ta hacie mas obhetivo posibel, pa cual ta pone e criterionan hopi serio pa cu esaki” Figaroa a bisa.

 

 

 

 

 

 

  • Powered by SETAR