ORANJESTAD – Mama di e criaturanan asesina aña pasa , ta keda deteni te ora cu e caso bin dilanti. Awe mainta corte a trata e caso “Speeltuin” pro forma, osea no den contenido. Ta trata di e caso unda cu dos criatura ruman a fayece na man di nan padrastro. Mientras cu e mama, sospechoso F. si a presenta, e padrastro M. a haci uso di su derecho di no ta presente. E caso ta wordo trata cu contenido dia 15 di juni proximo.
E CASO
Huez a pidi pa pospone e caso segun vocero di ministerio publico Ann Angela, pasobra falta e procesverbal definitivo di polis, y tambe e rapport di psicologo y di reclassering. Ademas e rapport di autopsia lo wordo traduci pa un experto. “E trabounan ey tin cu wordo afgerond ainda” Angela a sigui bisa.
TRASLADO
Ademas Angela ta sigura cu ningun momento OM a priminti e sospechoso M. cu e lo por bay Hulanda. Esaki pasobra OM ta garantisa seguridad di M. den detencion. A splica cu M. ta sinta su so, y cu tanto e mama como padrastro ta keda den detencion te dia nan caso bin dilanti cu ta 15 di juni proximo. Cu esaki huez a rechasa e peticion id abogado pa e mama bay den libertad. Segun Angela, tin suficiente indicacion cu e lo a comete hechonan poni den e citacion contra dje (esta complecidad y laga yiunan desampara).
TESTIGO
Ademas huez a manda e caso bek pa huez comisario pa scucha dos persona (mama di mama y un amiga). Den caso speeltuin, abogado a trece pa dilanti cu e padrasto ta sintie unsafe den kia y hasta el a sinti un dia despues di come cu e lo a wordo venena. Un "storia" di dje, segun fiscal. Investigacion a mustra cu e ni a meld esey na ningun hende na kia of na dokter of algo asina, Angela a finalisa bisando.
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna. E propietario di e radio a sigura cu no ta cu nan no kier paga, sino cu nan tin problema cu e suma/tarifa.
ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe.
ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.
ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “