• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis di e prome 100 dia gabinete Wever-Croes

Despues di 100 dia di gabinete Wever Croes, e resultado di trabou ta mixto. Den e analisis di NoticiaCla, nos ta repasa e 100 dianan y splica kico tur nos a observa. Pa cuminsa, e gabinete tabata uno hopi ambicioso y a anuncia un sin fin di cos cu e kier a logra. Sinembargo manera cu prome minister Evelyn Wever Croes a bisa na hopi ocacion, nan a haya ‘hopi sopresa’ y mester a paga hopi candela. Esey sinembargo no por ta un excuus pa no a haci nada. Algun minister a logra varios cos, otronan no hopi y otronan practicamente nada (ainda). Un minister te hasta a admiti siman pasa ainda cu ‘no por a haci milager den 100 dia’. Tur esey debi na e sorpresanan cu e gabinete a bin haya.

SCORE

Manera indica, gabinete Wever Croes a cuminsa cu algun minister cu experiencia, otronan nobato completo, y esey a haci un efecto tambe. E minister cu mas experiencia den e gabinete, obviamente a luci mas. Minister Otmar Oduber tabata esun cu mas a ‘score’ den e gabinete, sigui pa prome minister Evelyn Wever Croes. Esun cu menos a score, tabata minister Chris Romero. Algun tabata hopi ambicioso y a anuncia yen di cos, pero debi na inexperiencia y situacionnan encontra, no a logra. Entre nan e minister di husticia Andin Bikker, cu den su prome salida como mandatario, a anuncia yen di cos cu e kier y lo a logra, pero no a materialisa. Nan ta den ‘pipeline’ y ta spera cu nan lo por logra ainda.

ACONTESIMENTONAN POSITIVO

Dos acontecimento cu merece atencion y mencion ta e situacion na Venezuela cu ciere di frontera, sigui pa e hecho cu a ‘logra aplasa e fecha pa duna Aruba espacio pa regla e situacion financiero. Gabinete Wever Croes a bin cu man duro unda cu e tabata por (e situacion di Venezuela ta uno di Reino pues Aruba por a actua limita), y mesora a pone man na obra pa mustra e pais bisiña cu no ta sinta man cruza. E parti di logra convence e colegio di supervision financiero CAFT pa aplasa e fecha pa keda cla cu e presupuesto y rapport financiero, a pone cu Aruba por a hala rosea y sigui traha pa regla su situacion cu mas ‘tempo’. CAFT mes a confirma na e portal aki cu nan a duna Aruba e espacio pa hala rosea, pero condiciona cu pa un cierto fecha, mester a entrega un plan con pa logra tur cos di e presupuesto 2018. Algo cu a keda logra y confirma pa CAFT. Awor ta keda na CAFT pa dicidi si e loke cu gobierno a entrega, ta valido y suficiente realistico pa evita un instruccion of un ‘aanwijzing’. Loke gabinete Wever Croes a score cune tambe, ta e decision pa trata e rehabilitacion di e refineria di un forma mas ‘realistico’ posibel, unda cu a entre otro laga esaki completamente for di presupuesto. E ta un situacion fastioso, for di man di gobierno y nan a mustra esey y actua conforme esey.

ACONTESIMENTONAN NEGATIVO

Manera indica anteriormente, un di e cosnan cu no a bay bon, aunke tabatin tur bon intencion, ta e decisionnan di actual minister di husticia Andin Bikker, cu a yega anuncia yen di cos pa haci, pero na final no a logra (pa e fecha inicialmente anuncia), debi cu a bin compronde despues cu no ta asina asina por haci cierto cambio. Cambio den top policial tabata sigur un di nan. Un otro cos cu gobierno no a score cune, tabata e casonan den corte unda cu porta pa falta di preparacion, gobierno a bin ta sea perde varios caso den corte, of no a logra loke nan a pone pa logra door di dicidi di bay corte. Tin un caso cu gobierno no mester a bay corte mes, pero a opta pa bay, a perde y awor a anuncia cu nan ta bay apela. Esaki ta indica cu gobierno su prioridad of decisionnan tabata incorecto y of no a analisa y actua corecto.

SCORE DI MINISTER

Ministernan cu a score halto tabata premier Wever Croes cu su maneho riba e situacion di Venezuela, y e otro (hunto cu minister di finanza Xiomara Ruiz Maduro ta cu a logra aplasa e termino pa drecha e situacion financiero di pais Aruba. Un minister cu sigur a demostra su abilidad y experiencia, tabata Otmar Oduber cu tabata actua mesora riba varios tereno (problema riba beach, intermedia cu proyectonan PPP manera Watty Vos Boulevard y Green Corridor). Tin te hasta e percepcion cu Oduber ta hopi biaha ‘outshine’ e miembronan di gabinete di partido MEP, debi na su makinaria publicitario y su astucia como minister. E tabatin un habilidad pa convence varios minister di otro partido pa logra cosnan, unda cu na final e ta(bata) luci.

Minister Dangui Oduber no a logra nada concreto ainda, pa bisa cu e la ‘score’ den e prome 100 dianan, fuera di actua y paga cierto candela den varios departamento. Un posibel score tabata e caso den corte cu miembronan di hunta di comisario di Lotto a entama contra dje. Aunke cu Oduber no a perde e caso, e no a logra convence huez pa baha e directiva, cu ta pone cu su posibel logro mas grandi, a cay na awa. Minister Glenbert Croes a actua cu hopi emocion, para varios maneho di su predecesor nan, pero no a haci algo grandi ainda pa bisa cu el a ‘score’. Un anuncio cu a gara tur hende pa sorpresa siman pasa tabata e aumento di salario minimo, y e forma con e la tuma lugar. Loke si e mandatario a logra, ta cu e la logra reaccion di varios gremio y instancia cu a bay contra di esaki. Si Croes ta logra aumenta e salario cu e forma cu el a priminti, tin cu mira ainda. Su ‘hefe’, premier Wever a admiti cu Croes ta hopi emocional, pero cu ta asina e ta actua y tin cu respeta esey. Croes mes siman pasa ainda a admiti cu e no a logra nada den e prome 100 dia pa considere un logro. Minister Bikker a tuma algun decision cu por a afecta algun departamento di dje, pero nada cu por bisa cu a ‘score’ pa un minister den e prome 100 dia. Manera indica anteriormente, e mandatario a mustra un postura di kier drecha tur cos cu e predecesor a ‘daña’ , pero a bin siña hopi lihe cu cos no ta bay 1-2-3. Tambe e mandatario a crea e impresion cu e tin un actitud di ta ‘user friendly’ y no kier ‘lanta stof’ y kier mantene tur hende ‘contento’, envez di tuma cierto decision cu no tur ora ta hacibo popular. E minister cu menos a score ta Chris Romero. Porta pa su falta di experiencia y e carteranan cu e tin, tin e percepcion cu e minister no a logra nada pa score, no ta profilando su mes como un mandatario cu confianza y ta mas bien un minister cu ta ‘suave’ y ta ainda ‘getting to know the ropes’. Hopi cos el a bin ta ‘analisa’ pero no a tuma ningun decision pa por bisa cu el a score. Esun pues cu a score mas abou ta Romero. Minister Rudy Lampe tin e cartera e.o. di enseñansa y a institui un comision pa introduci scol multilingual na Aruba tur caminda, y por considera (aunke e ta un logro) esaki como un logro sigur, si mira e impacto cu esaki tin riba nos enseñansa. Otro asunto cu sinembargo ta birando controversial, ta e anuncio cu ta bay cuminsa independiza e departamento di scol publico.

INTENCION VERSUS LOGRO

Varios minister a actua den un forma adhoc, cu e intencion pa un quick fix pa score, sin busca drechi y tabata mucho ambicioso. Esey a pone cu el a backfire riba nan. E loke falta, ta pa e gabinete actual mustra cu e ta uni, como coalicion y cu tin un solo programa/meta pa bay dilanti. Nan ta mucho adhoc, aunke no por culpa nan completamente pa esey ya cu constantemente nan ta pagando candela, pero esey ta pone cu nan kier resolve yen di cos pareu y aki cos ta daña na caminda. Manera indica caba, minister Otmar Oduber tin un well oiled pr machine, cu ta moviendo hopi bon pr wise. Su actuacion, ta duna di pensa cu e tin e control den gobierno, ta actuando riba tereno di hopi minister, y nan ta wordo uza of ta laga nan mes wordo uza. E forma di su maneho, ta pone e shine den varios proyecto cu originalmente no ta su tereno.

TEMPO

E forma con cos ta bayendo y kico tur e gabinete a bin haci y a bin haña, ta hacie dificil pa duna un ‘fair assessment’ aworaki di loke falta. Esaki pasobra tin varios comision lanta cu ta trahando aworaki y cu ainda no a keda cla cu nan trabou. Manera a anuncia, ta aki un par di luna/siman, lo por anuncia resulta di e trabou di comisionnan, manera Caya Grandi, Tram, Dump, y otro cosnan cu e gabinete a campaña fuertemente cune. Ta mas prudente e ora analisa e gabinete den 4 pa 5 luna enves di 100 dia di gobernacion. E consensus ta cu e gabinete tin bon intencion, ta hopi ambicioso, pero ta overdoing it den esaki. Kier score hopi lihe cu cosnan cu no por score lihe cune.

MEDIA

E percepcion pa loke ta publicidad, ta cu despues cu a critica e cantidad di pr cu tur minister anterior tabatin, y cu lo bay streamline tur cos via Buvo, ainda no ta sosodiendo. Cada ministerio tin un personal pa PR, cu ta duna e percepcion cu no mester di Buvo. Minister Otmar Oduber ta un bon ehempel di esey. Niun comunicado di su partido of ministernan ta biniendo via gobierno, sino via nan mesun hendenan. E unico comunicadonan cu ta bay via gobierno ta e audio y e textonan di e conferencianan di gobierno (di dialuna y diahuebs) , verder tur otro ta bay riba nan mes. Dus mientras a elimina 800 mil, e percepcion ta cu cos no a cambia mucho. Exito na e gabinete den su proximo 100 dia.