SETAR a repasa e 15 aña di e compania como NV y e bista pa futuro durante nan ‘Business Event 2018’

Posted on 02/23/2018 5:12 pm AST | Updated on 02/23/2018 5:13 pm AST

ORANJESTAD - Diahuebs anochi Setar NV a organisa e di 14 Business Event, cu a tuma lugar na Marriott Ballroom. Durante e evento anual aki Director di SETAR NV sr. Roland Croes a elabora di tur e logronan den SETAR 15 aña como compania NV. E la menciona tambe kico e situacion actual ta di SETAR y loke ta e posicion di SETAR den futuro. Manera custumber cu tin un orador special cada bes. E biaha aki e orador invita pa SETAR tabata Steve Brown, un persona cu 30 aña di experencia den “high tech” y actualmente ta yuda companianan internacional compronde con e futuro ta cambiando cu tecnologia.

Companianan rond di mundo lo ta transformando hunto cu e desaroyo tecnológico aki. E cliente mas y mas ta spera cu e por tin coneccion tur ora, tur caminda y cu tur ora e ta conecta. Tur aplicación moderno mester por traha cu e red. Den futuro lo tin interconeccion cu hende y machine. E desaroyonan aki ta forma e futuro.

Sr. Brown na su turno a duna un presentación sumamente impactante den cual e ta mustra e futuro sercano y tur locual ta spera di por traha riba tecnologianan moderno manera 5G, cual SETAR ta preparando pe. Ela enfatisa cu tur negoshi tin di cuminsa pensa desde awor aki caba kico e cambionan aki lo nifica pa nan cada un. “Cuminsa na colecta data, aunque bo no sa kico bo ta bai haci ainda cune. Ta yega e momento cu bo por bai usa e data pa mehora bo negoshi. Di e mandera aki bo por determina strategianan cu por usa pa haci uso di e oportunidadnan cu ta bai surgi pronto den futuro”, asina Brown a bisa.

Tur e invitadonan a keda impresiona di tur e desaroyonan cu ta tumando lugar actualmente y cu lo trece hopi cambionan den varios aspecto den e proximo 5 pa 10 aña. Despues a sigui un recepción hopi ameno den cual tur invitado por a intercambia di idea y combersa di e topiconan interesante y futurístico cu a keda desplega durante di e “Business Event 2018” di SETAR.

 

  • Zulo
  • Powered by SETAR