Trahadornan di ASTEC a pone trabou abou na Barcadera

Posted on 02/21/2018 5:32 pm AST | Updated on 02/21/2018 5:33 pm AST

ORANJESTAD – Trahadornan di waf na Barcadera a pone trabou abou pa 2 ora diaranson atardi, pa manda un señal pa gerencia di Astec, cu cos no por sigui asina pa loke ta e.o. nan negociacion di CAO. Presidente di sindicato STA Diego de Cuba ta exigi cu kier wak e contracto cu Astec tin, pa wak kico tur por haci cu e trahadornan, y kier pa Astec reanuda e negociacionnan di e CAO. Gerencia di Astec mientrastanto a sigura cu e negociacionnan lo continua pronto, y cu tin un diferencia di opinion riba aumento pa e trahadornan. Pero cu si no logra keda cla cu e negociacion, lo prolonga e CAO te cu december 2018. Algo cu e sindicato kier evita.

CAO

De Cuba a splica e portal aki cu e negociacionnan a stop na december y no a sigui mas. A mustra cu ora cu a para e negociacionnan na december, no a haya otro riba e parti financiero, specificamente e aumento cu nan no ta considera suficiente (compara cu antes). E hecho cu Astec ta un compania miyonario y poderoso, mester tin espacio pa por duna un aumento mas grandi cu loke e compania kier ofrece. E sindicato tin miedo cu e gerencia dicidi pa prolonga e CAO actual sin conoce un aumento berdadero den salario. Ademas e sindicato kier mira e contracto di Astec pa mira kico exactamente ta e derecho y kico tur ta e poder di e compania. A indica cu lo bay pidi inzage cerca gobierno (lesa minister) pa por wak e contenido di e contract ya cu ta trata di un NV 100% di gobierno.

REACCION ASTEC

E gerencia den persona di Randall Angela a mustra cu ta derecho di tur trahado pa bay den accion, y cu no ta prome biaha cu esaki ta sosode. A admiti cu e negociacionnan tabata bayendo bon te cu december, ora cu cos a cambia, pa e situacion financiero. Gerencia ta para ariba cu e loke cu nan ta ofrece ta husto y responsabel, mirando e situacion actual di Astec, unda cu mester a inverti basta placa pa cu e mudanza y sigura un operacion responsabel pa un periodo largo. Segun Angela, partidonan a yega hopi cerca na december, prome cu nan a bay for di otro. Berdad cu a para e negociacion mirando cu tabata dilanti dianan di fiesta y cu unabez aña bolter, lo a continua cu e negociacion. E diferencia basicamente ta riba e aumento cu Astec a ofrece, cu nan ta kere cu ta husto, pero cu e sindicato STA ta pensa otro.

  • Zulo
  • Alpina
  • Powered by SETAR