MIAMI – E compania hotelero internacional RIU ( cu tin dos hotel na Aruba) ta sigura cu su ehecutivonan ta ‘absolutamente inocente di cargonan cu nan ta wordo sospecha di dje’. Asina un comunicado emiti pa e compania ta bisa. Asina nan ta reacciona riba e hecho cu dialuna e doño Luis Riu y su vice presidente regional Alejandro Sánchez del Arco a entrega su mes na autoridad Mericano, keda deteni brevemente riba cargo di cu el a ofrece camber gratis a cambio di fabornan na director di construccion na Miami. Despues cu Riu y Sanchez a entrega nan mes, a presente e cargonan, Riu la paga un fianza y a keda den libertad. “ Nos ta confia cu e sistema hudicial Mericano lo conclui cu e acusacionnan aki ta totalmente infunda, y nos ehecutivonan ta desea impacientemente pa proba nan inocencia” e comunicado ta sigui bisa.
SUSESO
E informacion ta cu Luis Riu y su vice presidente regional a entrega su mes dialuna pa enfrenta alegacion di cu e lo a ofrece camber gratis di hotel na e tempo ey director di construccion di Miami Beach, y ‘a cambio ricibi asistencia pa cu renovacion na gran escala na su hotel na South Beach’. Pa esaki el a biaha voluntariamente for di Spaña pa presenta dialuna dilanti e tribunal unda cu a presente e cargonan. A permitie paga un fianza di 20 mil dollar mericano y a permiti biaha pa su cas na Mallorca Spaña. “E procedimento completo tabata un cuestion di algun ora y e huez no a prohibie di biaha. Ambos ehecutivo por sigui bishita e varios destinonan internacional di hotelnan RIU libremente. Entrante awe caba Luis Riu a bolbe na su actividadnan normal.
RIU ARUBA
E noticia ta hala atencion mirando cu na Aruba Luis Riu tin dos hotel riba Palm Beach, esta RIU Antillas y RIU Palace. Den pasado Riu tabata den noticia den corte ora cu tabatin posibilidad pa RIU cumpra un di tres hotel, e actual Hilton Caribbean Hotel, pero cu no a sigui. E ta un di e hotelnan mas exitoso riba e isla, cu un volumen di ocupacion practicamente 90% henter aña. Potret cortesia El Nuevo Herald di Riu y Sanchez yegando corte na Miami.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.
LOS ANGELES – Conocido personahe Mericano O.J. Simpson, a fayece na edad di 76 aña di cancer. Asina su famia a anuncia diahuebs. E tabata rondona pa su yiunan y nietonan. Na februari, Simpson a keda diagnostica cu cancer di prostaat, y tabata den cuido di hospice durante su tratamento di kimoterapia. E tabata hopi famoso pa su logronan como futbolista americano (rugby) durante 11 temporada. Pero e ta mas ‘conoci’ ainda pa e caso legal unda cu a culpe pa asesina su ex casa Nicole Simpson na 1994. E la keda absolve di e cargo ey, pero despues a drenta prizon toch pa otro cargonan di robo di memorabilia.