Maneho fiscal beneficioso pa San Nicolas revoca pa evita lista preto

Maneho fiscal beneficioso pa San Nicolas revoca pa evita lista preto

Posted on 02/6/2018 7:01 pm AST | Updated on 02/6/2018 7:06 pm AST

ORANJESTAD – Pa evita cu Aruba aparece (atrobe) riba e lista preto (black list) di paisnan cu no ta cumpli cu reglanan internacional, (den e caso aki riba tereno fiscal) , Aruba mester a revoca e areglo conoci como e maneho fiscal beneficioso pa San Nicolas. Asina minister di Finanza Xiomara Maduro a bisa den un conferencia di prensa awe. Maduro ta culpa gobierno anterior di no a regla e maneho bon den un ley cu ta pone cu awe nan a haya nan mes ta revoca e maneho aki, perhudicando un grupo di comerciante. Ex minister di Economia Richard Arends ta disputa esaki, sigurando NoticiaCla ‘e maneho a wordo crea segun standard di transparencia di OECD, pa loke ta contenido, rekerido obhetivo, y cu no a haci distincion entre companianan local of internacional’, pues cu nada malo no a sosode.

OECD

Aruba ta parti di e organisacion pa cooperacion economico y desaroyo (OECD), como un di su 35 miembronan. Y ora cu Aruba a informa e organisacion di e politica di beneficio di 28 di juni 2013, OECD, a informa Aruba cu e parti uno, e regimen fiscal beneficioso pa San Nicolas ta wordo considera como un competencia dañino pa e codigo di grupo di conducta di Union Europeo. Como tal mester a revoca esaki pa ‘evita cu Aruba por keda inclui riba e lista di hurisdiction no cooperativo di Union Europeo. Como cu tin 20 compania cu ya caba ta den e grupo aki na San Nicolas, nan por sigui usa e facilidad fiscal special aki te 31 di december 2020.

MADURO VS ARENDS

Segun e mandatario di Finanza y Economia actual esta Xiomara Maduro, gobierno anterior a haya notificacion for di 12 di juni aña pasa pero no a haci nada al respecto. Arends ta refuta esaki tambe pa e portal aki cu e comentario” E rapport (di OECD) a sali na december. Nos no tabata den gobierno mas!” Arends a bisa. Ademas, Arends ta desconcerta cua parti di e maneho beneficioso pa San Nicolas ‘no ta cumpli’. “E mester a simplemente cambia loke mester a wordo cambia envez di revoca (e maneho), Arends ta puntra su mes. El a reacciona mas amplio den dos diferente articulo. Lesa e reaccion completo di e ex mandatario AKI , sigui pa un di dos AKI.

 

  • A pidi CITGO reconsidera decision pa ‘slow down'

    A pidi CITGO reconsidera decision pa ‘slow down'

    ORANJESTAD – Gobierno di Aruba a pidi CITGO Aruba pa reconsidera nan decision di ‘slow down’ nan actividadnan di rehabilitacion di e refineria, y mantene tur trahado na trabou. Ademas a informa cu nan no ta haya permiso pa retira trahado. Asina minister di Labor Glenbert Croes a informa prensa diabierna atardi laat. No ta conoci si CITGO lo acepta y of cumpli cu e peticion di e mandatario.

  • Wever: Autoridad Mericano a bisa ‘We told you so’ riba CITGO deal

    Wever: Autoridad Mericano a bisa ‘We told you so’ riba CITGO deal

    ORANJESTAD – Autoridad Mericano a bisa gobierno di Aruba ‘We told you so!”, riba e deal cu gobierno anterior a cera cu CITGO na 2016, pa reapertura di e refineria. Segun prome minister Evelyn Wever na NoticiaCla awe mainta, (e no a menciona cu ken e la papia si), el a sigura e portal aki cu ta na telefon e la ricibi e informacion di ‘nos a bisabo’ (pa no cera un deal cu e hendenan aki refiriendo e deal di reapertura). Mes momento ehecutivonan di CITGO di Merca a bisa e portal aki mas tempran cu lo ta bon pa gobierno di Aruba intermedia hunto cu CITGO na gobierno Mericano pa splica e embergadura di e problema. Wever a confirma cu na nivel di embahada di Reino, e combersacion lo tuma lugar sea ta awe of mayan, pa haya claridad di kico tur ta envolvi cu e embargo y con por posiblemente sali for di dje of ki efecto esaki por tin a termino largo pa nos isla. Wever Croes a bisa e portal aki como un update riba e situacion di CITGO na Aruba, awor cu a anuncia un ‘slowdown’ di e trabounan di rehabilitacion di e refineria.

  • Premier Wever na gremionan: Papia ‘toontje lager’

    Premier Wever na gremionan: Papia ‘toontje lager’

    ORANJESTAD – Minister presidente Evelyn Wever Croes diahuebs mainta a aclaria e asunto di salario minimo, despues cu e declaracion di colega minister di Labor Glenbert Croes riba aumento ‘substancial’ di salario minimo a causa un ‘warwaru’ di reaccion dialuna. E mandatario a admiti cu e no a tende e declaracion completo di Croes, pero cu cualkier aumento lo bay man den man cu otro cambionan. Entre otro mester pensa cu di un banda ta subi e salario minimo pero ta ahusta e impuesto di un forma positivo pa comercio.

  • Gobierno a formaliza concepto di ‘Cas di Seguridad’ pa Aruba

    Gobierno a formaliza concepto di ‘Cas di Seguridad’ pa Aruba

    ORANJESTAD – Gobierno a formaliza e concepto di ‘cas di seguridad’ unda cu varios instancia ta bin hunto y purba guia y preveni cu esnan cu a comete fout den pasado, por drecha nan mes. E ta un iniciativa di ministerio publico, un concepto cu tin caba na otro paisnan manera Hulanda. E cas ta bay adresa pa reduci residivismo, y ora cu nan sali for di p.e KIA, guia nan pa evita cu nan ta bolbe bay den mal caminda.

  • Wever: Haci un hende un ‘fabor’ den gobierno lo pasa pa pasado

    Wever: Haci un hende un ‘fabor’ den gobierno lo pasa pa pasado

    ORANJESTAD – Haci un hende un fabor den gobierno, lo bira cos di pasado. Por ehempel, estilo di usa un persona como kruiwagen, pone un file of un ayudo mas halto pa motibo di ‘fabor’ pa un persona. Esey mester bira e resultado e.o. di un camber di integridad segun prome minister Evelyn Wever Croes. E mandatario a duna un actualisacion riba e tema ey awe mainta. A mustra cu ta bay tuma mesun strategia di Corsou (cu ta mucho mas avansa cu nos riba e tereno aki) y ta bin cu palabracion cu hendenan di Corsou (y Bonaire) por investiga casonan di integridad na Aruba y visa versa. Ta evita asina cu p.e hende na e bureau di integridad por haye cu famia ta envolucra.e.o. den un caso.

  • Croes: Gobierno lo aumenta salario minimo substancialmente e aña aki

    Croes: Gobierno lo aumenta salario minimo substancialmente e aña aki

    ORANJESTAD – Gobierno di Aruba ta bay aumenta salario minimo substancialmente. Asina minister di labor Glenbert Croes a anuncia dialuna mainta. E mandatario (riba pregunta di NoticiaCla) no tabata cla pa divulga e suma di aumento, aunke cu ‘e tine den mente si’ y a bisa si cu e ta riba 100 florin. Cu substancial e mandatario kier men cu e no por ta un suma ‘miserabel’ di 10 pa 25 florin sino algo mucho mas halto cu esey. E ta referi na den pasado cu tabatin aumentonan chikito di un banda, mientras cu di otro banda ta kita un suma mucho mas grandi. E ta ripiti atrobe cu e ta conciente cu gremionan lo lanta y haci fastioso, pero e ta dispuesto pa bay e guera ey. Basta cu nan tin argumento. Segun Croes, ta duna oportunidad na tur trahado cu ta biba na Aruba. Hunto cu esaki, pa apodera e posicion di tur famia na Aruba ta importante pa anuncia e aumento aki. E mester drenta na vigor e aña aki. Awe tardi lo informa kico ta su propio pensamento riba e aumento substancial. Nivel di bijstand ta mara na salario minimo. Esey kier meen cu si salario minimo ta subi, bijstand tambe ta subi. No kier bisa e suma, pasobra kier pasa e ronda di consulta. DAO ta cuminsa. Mi no ta worry pa bin problema. Mester por bringa pero cu argumento. “Un trahado cu tin salario minimo, aunke cu e tin trabou y salario, ta biba den pobreza. Algo cu no por” Croes a finalisa bisando.

  • Do It Center
  • Powered by SETAR