ARA: Programa 'Bo Aruba' tin riesgonan no cubri cu ta perhudica nos

ARA: Programa 'Bo Aruba' tin riesgonan no cubri cu ta perhudica nos

Posted on 02/2/2018 3:23 pm AST | Updated on 02/2/2018 4:50 pm AST

ORANJESTAD - Algemene Rekenkamer a publica su rapport ‘BO Aruba’. E investigacion di ‘BO Aruba’ a wordo haci pa por duna un bista riba e aspectonan financiero y di maneho relaciona cu e programa di inversion aki. Den e rapport ta duna un bista mas di acerca di e proyectonan y a base di e deficiencianan constata, ta indica e riesgonan. Pa e investigacion a incorpora e informacion disponibel di e periodo di 2010 te cu 2016. Algemene Rekenkamer ta lamenta e hecho cu e minister di e tempo ey, cu tabata encarga cu Infrastructura, no a reacciona riba e rapport di e investigacion. A dicidi di publica e rapport sin e reaccion ehecutivo di e minister concerni.

Conclusion principal

Conclusion principal di e investigacion aki tabata cu Pais Aruba ta core riesgonan cu ‘BO Aruba’ cu no ta suficientemente cubri. Investigacion ta mustra cu e programa ‘BO Aruba’ ta uno hopi amplio y segun su ultimo status tabata consisti di 10 proyecto principal, na cual tin mara den total 241 subproyecto. E programa aki lo bay tin tambe un impacto grandi riba e situacion financiero di e Pais den e añanan venidero. ‘BO Aruba’ tin un valuacion estima di aproximadamente AWG 1.6 biyon. Di e suma aki, a otorga aproximadamente AWG 1 biyon durante e periodo cu tabata haci e investigacion. E programa ta caracterisa pa proyectonan enorme di infrastructura, y di cua e sostenibidad di mayoria di e proyectonan no ta garantisa.

 

Algemene Rekenkamer ta preocupa pa e riesgonan cu a keda constata. Ta recomenda gobierno pa cubri e riesgonan aki miho. Considerando e embergadura financiero, cual ta considerabel, y e posibel consecuencianan liga na ‘BO Aruba’, cautela y transparencia ta obligatorio. Ademas, e minister mester tin na su disposicion suficiente informacion pa ahusta e rumbo na ora. Loke tambe ta di gran importancia ta pa suministra Parlamento cu informacion adecua y corecto.

 

Sugerencia di parti di Algemene Rekenkamer

Algemene Rekenkamer ta urgi e minister encarga cu Infrastructura pa formula reglanan di procedura prome cu cuminsa cu proyectonan grandi. Tambe mester envolvi Parlamento pa asina por incorpora nan necesidad pa informacion. Ta esencial cu e meta di un proyecto ta stipula di un manera transparente, caminda ta indica specificamente con un proyecto lo contribui na solucion di e problema cu a keda constata. Ademas ta esencial cu e aspecto financiero ta bon argumenta, motiva y funda. Tambe ta importante pa presenta scenarionan alternativo (cu ta reduci costo). Entre esakinan lo por haci un escogencia, dependiendo di e recursonan disponibel. Ademas ta recomenda pa haci uzo di planificacion a largo plaso. Trahamento di un plan integral pa infrastructura, den cua ta indica con ta garantisa sostenibilidad di e proyecto, ta di sumo importancia. Por ultimo, ta recomenda e minister pa duna cuenta y responsabilisa su mes pa ‘BO Aruba’, den e sentido cu tambe ta duna un bista den e aporte cu e subproyectonan a brinda na e solucion di un problema constata y un meta principal fiha. Algemene Rekenkamer ta haya cu ta importante pa Parlamento tin na su disposicion un bista general y amplio di e consecuencianan financiero y e riesgonan pa e Pais.

Cautela tambe ta imperativo pa Parlamento. Ta urgi Parlamento pa percura pa haya suficiente informacion di gobierno, prome cu nan duna aprobacion pa proyectonan grandi. Parlamento tambe mester pidi responsabilisacion, sin mas, di gobierno. Responsabilisacion di e proyectonan y e contribucion di e proyectonan na e solucion di un problema mester ta un exigencia basico.

E investigacion di ‘Bo Aruba’ a termina na comienso di 2017, pero e rapport no a wordo publica pa motibo cu e miembronan di Algemene Rekenkamer no tabata completo.

Awor cu Algemene Rekenkamer ta completo, ta posibel pa legalmente tuma decisionnan atrobe. Algemene Rekenkamer actual ta di acuerdo cu e mensahe di e rapport y ta desea di enfatisa e importancia di traspaso di informacion completo, tambe ora di cambio di gabinete. Door cu ta trata di proyectonan di un duracion largo, cu un embergadura financiero grandi, e maneho di e riesgonan existente ta sumamente importante.

E version digital di e rapport di Algemene Rekenkamer ta disponibel AKI

 

 

 

 

 

 

  • Departamento di Impuesto no ta acepta pago cu cheque mas

    Departamento di Impuesto no ta acepta pago cu cheque mas

    ORANJESTAD – Departamento di Impuesto ta participa cu entrante 16 di maart 2018 no ta acepta pago cu cheque mas. A tuma e decision aki teniendo cuenta cu implementacion di e sistema digital nobo y e decision di Asociacion di Banconan di Aruba pa descontinua uzo di cheque como metodo di pago. Departamento di Impuesto ta pidi su clientenan pa tuma nota di e participacion aki pa evita consecuencia indesea.

  • KVK: Gobierno baha bo gasto prome cu aumenta salario minimo

    KVK: Gobierno baha bo gasto prome cu aumenta salario minimo

    ORANJESTAD – Prome cu gobierno kier pensa di aumenta salario minimo, e mester pone baha su gastonan prome. Esey ta e prome reaccion di presidente di Camara di Comercio Ernst Mohamed riba e anuncio di minister di Labor Glenbert Croes cu kier aumenta salario minimo, considerablemente. Segun Mohamed, no ta cuestion cu no kier aumenta salario minimo, pasobra e tambe ta kere cu tur hende merece un miho calidad di bida. Pero mester tin un poder di compra bon. Pero Camara di Comercio kier pa e minister contesta algun pregunta prome, cu tuma e paso menciona. Entre nan, ki dia kier introduci e cambio, cu cuanto e cambio mester ta, y si a investiga e impacto di e cambio aki.

  • RDA: Slowdown CITGO no ta afecta ningun stacion di gasoline

    RDA: Slowdown CITGO no ta afecta ningun stacion di gasoline

    ORANJESTAD – Refineria di Aruba (RDA) ayera despues di e anuncio di CITGO riba nan ‘slow down’ di rehabilitacion di e refineria, a sigura cu “e noticia aki no tin ningun efecto ariba e operacion di Fuels Marketing & Supply Aruba N.V. (FMSA), ni tampoco e ta afecta ningun stacion di gasolin”. FMSA ta e distribuidor principal di combustibel ariba nos isla, tanto pa stacionnan di gasolin, companianan local, WEB Aruba N.V. y Aeropuerto. “RdA como ejecutivo di e propiedadnan di refineria lo mantene comunidad di Aruba al tanto di cualkier informacion adicional” e comunicado ta sigui bisa.

  • Interpark Coney Island ta sigi na Aruba cu orario nobo

    Interpark Coney Island ta sigi na Aruba cu orario nobo
  • Delegacion CITGO na caminda pa Aruba pa duna informacion

    Delegacion CITGO na caminda pa Aruba pa duna informacion

    ORANJESTAD – Tin un delegacion di CITGO di Merca na caminda pa Aruba pa papia cu e.o. Gobierno di Aruba proximamente. Mientras cu no a duna un fecha exacto pa e bishita tuma lugar, prome minister Evelyn Wever Croes a confirma e informacion di e bishita e siman aki. E bishita tin cu duna hopi claridad riba e situacion actual di e refineria. Segun Wever, gobierno ta ocupa cu dos trayecto riba e situacion di CITGO. Entre nan via un comision huridico a keda institui pa analisa e aspecto legal pa conseha gobierno su opcionnan pa cu e deal. E otro trayecto ta e adquisicion di e informacion necesario cu ainda falta manera kico ta e compromiso y inversionnan cu CITGO tin pensa di haci y lo a priminti.

  • EcoGas riba frontpage di revista internacional

    EcoGas riba frontpage di revista internacional

    ORANJESTAD - E prestigioso revista "Business View Caribbean" pa su edicion di December 2017-Januari 2018 a dedica atencion special, riba su frontpage na e compania EcoGas di Aruba. E revista ta sali mensualmente na Merca, Canada, den Caribe y Oceania. Den Caribe so e tin mas di 30 mil abonado y ta lesa pa e ehecutivonan cu mas influencia den tumamento di decisionnan importante den e region Caribense. Su forsa ta cu e ta publica storianan real di exito di e companianan di mas influencia y cu ta haci un diferencia, considera como e berdadero lidernan den negoshi den Caribe.

  • Powered by SETAR