Minister Venezolano ta contradeci Prome Minister di Aruba

Posted on 01/29/2018 4:45 pm AST | Updated on 01/29/2018 4:51 pm AST

CARACAS/ORANJESTAD – Ta Hulanda mes a tranca e deal entre Venezuela y e islanan ABC pa keda cla, ultimo biaha cu tabatin e reunion aki na Aruba. Asina minister di Comercio y Inversion Internacional di Venezuela, Jose Gregorio Vielma Mora a bisa den un programa televisa dialuna merdia riba e canal Venevision, titula ‘Entrevista Venezuela’. “Esun cu a pone e problema, tabata gobierno di Hulanda. Hulanda ainda tin e control di defensa y relacionnan exterior” Vielma Mora a bisa. Cu esaki e ta contradeci e declaracion recien di prome minister di Aruba Evelyn Wever Croes, cu recientemente a sigura cu no ta Hulanda a tranca e cos. Tabata NoticiaCla cu a bin cu e informacion aki anteriormente, citando fuentes di Venezuela. Pero awor tin un cara y nomber cu ta confirma e declaracion ey. Loke si e minister Venezolano no a bisa, ta ki dia ta habri frontera atrobe.

MORA

Den e programa, e presentador ta e.o. cita e presidente di asociacion Venezolano di exportadores Ramon Goya, cu ta papia cu comercio ta sufriendo perdida cu e ciere di frontera entre islanan ABC. Riba esaki Vielma Mora ta contesta cu no ta Venezuela ta e problema den e parti aki. E ta sigui splica di e reunion recien cu a tuma lugar na Aruba dia 12 di januari ultimo. “Ami a participa den e reunion ey, unda cu e ministernan di finanza y economia di e paisnan ey hunto cu e ministernan di husticia di Aruba, Corsou y Bonaire ta di acuerdo pa nos entrega tur mercancia di exportacion pa nan” e mandatario Venezolano a bisa. “Pero esun cu a pone e ‘traba’, tabata e gobierno di Hulanda”. E la sigui bisa cu esaki ta pasobra Hulanda ainda tin control di defensa y relacionnan exterior di e islanan ABC. “Pero nan ta bisando nos cu e ciudadanonan ta nativo (di eynan) y ‘por fabor bende nos e productonan’. Nos ta bay haci esey. Nos ta manehando esey” Vielma Mora a sigui bisa. Esaki pasobra ‘Venezuela, apesar di e situacion cu hende no ta bisa di e cosnan bon cu nos ta haciendo, ta haciendo edificio, hotel na Aruba p.e y nos ta bay yuda den e particularidad ey”, Vielma Mora a sigui bisa.

ARUBA SU REFUTA

Tabata 17 di januari ultimo cu prome minister Evelyn Wever Croes a reacciona riba e noticia di e portal aki, unda cu ta desmenti cu Hulanda a tranca cos. “Contrario na informacion for di Venezuela, cu Hulanda a tranca e acuerdo cu Venezuela diabierna ultimo, prome minister di Aruba Evelyn Wever a desmenti esaki publicamente”, a keda publica. Segun e mandatario, enfaticamente el a bisa cu no por papia di trancamento di Hulanda y a elabora mas riba con e reunion mes a bay bisando “Ningun momento por menciona cu e negociacionnan a wordo tranca pero esakinan ta partinan inherente na negociacionnan ora cu no tin tur hende sinta na mesa cu por tuma decision”. Algo cu awor ta keda ‘oficialmente’ desmenti pa un minister di Venezuela mes. Mientrastanto, e frontera ta keda cera pendiente e decision final di Venezuela. Foto cortesia www.elcomuneroregionales.

 

  • Compania Canades ta cera deal cu compania local pa produci marijuana na Aruba

    Compania Canades ta cera deal cu compania local pa produci marijuana na Aruba

    ORANJESTAD – Un compania Canades a cera deal cu compania local pa produci marijuana na Aruba den futuro. Asina prensa mericano incluyendo e portal Caribense NewsAmericasNow ta raporta. E compania, Affinor Growers Ltd a firma un acuerdo di licencia exclusivo cu e compania Vertical Designs Aruba Inc (VDA) pa produci marijuana y cuminda usando e toren vertical rotativo patenta di Affinor Growers. A cambio e comania lo ricibi 10% di propiedad den e compania. A cambio e compania local lo busca tur e toren nan pa su compania pa ta basa na Aruba. Den un reaccion cortico pa NoticiaCla, e CEO di e compania Affinor Growers, esta Nicholas Brusatore a sigura cu e compania na Aruba ta uno nobo y ta existi."Pero nos no por bisa mucho ainda. Noticia mas grandi ta na caminda. Nos ta sorry pero nos ta goberna pa leynan di seguridad na Canada" indicando cu mucho informacion ainda no por duna. 

  • Adrian awards a reconoce Aruba riba area di mercadeo y innovacion

    Adrian awards a reconoce Aruba riba area di mercadeo y innovacion

    ORANJESTAD – E siman aki, e premiacion anual di Hospitality Sales & Marketing Association International (HSMAI) a presenta Aruba Tourism Authority (A.T.A.) y nan agencia ‘The Concept Farm’, cu 11 diferente premio pa innovacion den e mercadeo di viahe durante e di 60 Adrian Awards. E categoria den cual e honornan a wordo nomina ta entre otro Social Media, Mobile Marketing, Virtual Reality y Website User Experience.

  • Jeon ta ricibi premio platinum pa produccion 'Machika' na Merca

    Jeon ta ricibi premio platinum pa produccion 'Machika' na Merca

    MIAMI- Diaranson atardi na Miami, Florida cu presencia di mas di 35 medio di comunicacion internacional Jeon, J Balvin y Anitta a ricibi un sorpresa sumamente grandi. Ehecutivonan di Universal Music a informa nan cu e cancion “Machika” a logra varios record tanto den imprecion riba youtube como den download y streams. Esaki ta conduci cu e exito “Machika” a bira Platina. Esaki ta un logro sumamente grandi Jeon kende pa promer biaha ta ricibi e premio aki. Tanto Jeon como J Balvin y Anitta no a spera esaki y despues di e ricibi e premio tabata hopi gradeci na e fanaticonan cu a hasi esaki posibel. E entrega a tuma lugar durante un asina jama “Press Day” organisa pa Universal Music unda diferente medio di comunicacion importante di Merca tabata presente pa asina entrevista e artistanan. Por a mira hopi interes pa Jeon mirando cu pa hopi e no ta un artista conoci. E number di Aruba sigur a wordo menciona na varios ocasion ilustrando cu Aruba, Colombia y Brazil a uni hunto pa e colaboracion musica di “Machika”. Ja caba Jeon tin varios presentacion tras di lomba cual tabata hunto cu J Balvin. Entre otro na Hulanda, Los Angeles, New York, Texas y pronto varios otro presentacion. Diahuebs anochi sigur tabata un anochi tambe sumamente special pa Jeon mirando cu despues di hopi aña tin un Arubiano cu a presenta den ‘Premio Lo Nuestro’ cual ta un programa/espectaculo di television unda cu tur artista Latino ta anhela pa duna su presentacion. Ta trata di miyones di televidente cu ta sigi e programa aki pa mira cua ta e artistanan a destaca durante aña y cu lo ricibi un premio. Esaki tambe tabata e promer biaha cu e tres artistanan esta J Balvin, Jeon y Anitta a presenta e cancion den forma Bibo hunto. Riba e fotonan por mira e momento cu a entrega e tres artistanan e premio y tambe un foto di e ensayo di Premio Lo Nuestro na American Airlines Arena.

  • Aruba a biba cu Jeon durante premio Lo Nuestro

    Aruba a biba cu Jeon durante premio Lo Nuestro

    ORANJESTAD/MIAMI - Aruba a biba cu e presentacion di e Arubiano Jonathan 'Jeon' Thiel diahuebs anochi durante su presentacion den e premio cotisa 'Premio Lo Nuestro' na Miami. For di e parti di red carpet, cu e presentadornan di e canal Univision a cuminsa entrevista Jeon, Facebook a luci cu comentarionan di orguyo di Arubianonan. Despues ora cu e programa mes a cuminsa, Aruba a warda 50 minuut pa porfin e artista J Balvin presenta e exito grandi Machika, en vivo como cancion di momento hunto cu Jeon. Pa un artista local cu den apenas algun siman di a keda lansa internacional y ya caba presenta den un programa internacional di nivel manera Premio Lo Nuestro, sigur tabata un logro grandi pa un yiu di tera. 

  • Doñonan di hotelnan RIU ta sigura nan inocencia di cargonan sospecha

    Doñonan di hotelnan RIU ta sigura nan inocencia di cargonan sospecha

    MIAMI – E compania hotelero internacional RIU ( cu tin dos hotel na Aruba) ta sigura cu su ehecutivonan ta ‘absolutamente inocente di cargonan cu nan ta wordo sospecha di dje’. Asina un comunicado emiti pa e compania ta bisa. Asina nan ta reacciona riba e hecho cu dialuna e doño Luis Riu y su vice presidente regional Alejandro Sánchez del Arco a entrega su mes na autoridad Mericano, keda deteni brevemente riba cargo di cu el a ofrece camber gratis a cambio di fabornan na director di construccion na Miami. Despues cu Riu y Sanchez a entrega nan mes, a presente e cargonan, Riu la paga un fianza y a keda den libertad. “ Nos ta confia cu e sistema hudicial Mericano lo conclui cu e acusacionnan aki ta totalmente infunda, y nos ehecutivonan ta desea impacientemente pa proba nan inocencia” e comunicado ta sigui bisa.

  • CNE: Dia 22 di april ta e fecha pa eleccion presidencial na Venezuela

    CNE: Dia 22 di april ta e fecha pa eleccion presidencial na Venezuela

    CARACAS – E poder electoral Venezolano a oficialmente pone fecha pa e proximi eleccion presidencial di e pais pa dia 22 di april 2018. Asina CNE (Conseho Nacional Electoral a anuncia diaranson. Esnan inscribi dia 20 di februrari, por participa na e eleccion. E organismo comicial ta activa un ‘jornada’ special di actualisacion di dato entre 10 y 20 di februari proximo. A duna como lapso pa candidatonan postula nan mes, pa entre dia 26 y 27 di februari proximo. E admision mientrastanto y rechazo di e postulacion lo ta entre 26 di februari pa 1 di maart. E campaña electoral pa e cargo di presidente ta cuminsa dia 2 di april y ta caba dia 19 di april, cu ta 17 dia pa e candidatonan por ofrece na e electorado, nan proyecto y plan na e pais.

  • Powered by SETAR