ORANJESTAD - Tin biyete falso di 100 florin den circulacion. Banco Central di Aruba (BCA) pa medio di un comunicado a informa cu recientemente a constata esaki. E falsificacion aki tin e debido atencion di BCA. Ta importante pa e publico keda alerta y pone bon atencion riba e siguiente informacion y e diferencianan entre e biyete legitimo y esunnan falsifica:
Por nota cu tur biyete falsifica haya te awor ta visibelmente falso. E biyetenan falso ta copia riba un papel di calidad inferior y e colornan tambe ta di un calidad inferior. E biyetenan falso no tin number di serie. E biyetenan falsifica aki no tin e watermerk di electrotype y no por wak e logo di BCA den e watermerk. Ora tene e biyete contra luz mester bira visibel e dibuho di e Watapana/Dividivi den tononan cla y scur den e papel. E Watapana/Dividivi riba e biyetenan falsifica ta imprimi directamente riba e papel, y door di esei e tononan cla y scur no ta visibel. E folie di plata ariba e biyete falso no ta optimalmente lombrante ni visibel. E hilo di seguridad na e banda dilanti di e biyete ora bo tene contra lus no ta bira visibel manera ta e caso den e biyete legitimo.Conforme articulo 19 inciso 1 di “Landsverordening regeling geldstelsel” (Lrg) (AB 1991 no. GT 34) cualkier persona cu tin sospecho cu e biyetenan ta falso ta obliga pa inmediatamente trece nan na BCA pa verifica e autenticidad.
Conforme e ‘Wetboek van Strafrecht’ di Aruba persona (nan) haya culpabel di falsificacion di biyetenan di florin por haya un sentencia penal di maximo nuebe aña di prison.
Foyeto tocante e caracteristicanan di autenticidad di e biyetenan di florin ta obtenibel na Banco Central di Aruba y ariba e website di Banco Central di Aruba (www.cbaruba.org), como tambe na tur banco comercial. Pa mas informacion of pa organisa sesion special di informacion por tuma contacto cu departamento di Kas & Kluis di Banco Central di Aruba na telefon 525-2139 / 525-2141.
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.