Reunion diabierna mester resolve problema serio entre Venezuela y islanan ABC

Reunion diabierna mester resolve problema serio entre Venezuela y islanan ABC

Posted on 01/11/2018 6:56 pm AST | Updated on 01/11/2018 6:56 pm AST

ORANJESTAD – Mayan diabierna tin un encuentro hopi anticipa entre   gobiernonan di Aruba, Corsou y Venezuela. Di parti di Reino lo ta presente e Embahador di Reino na Caracas. E necesidad di e reunion aki a surgi, segun Prome minister Evelyn Wever Croes, debi na e paso cu Venezuela a tuma unilateralmente y a anuncia cu e lo cera e fronteranan. Realisando for di e momento ey caba cu e comunicacion via telefoon cu ta papia un idioma y prensa cu ta papia otro idioma lo no yuda na nada pa sali for di e situacion aki, Gobierno di Aruba a propone un reunion caminda tur hende ta bin hunto.   Wever-Croes a elabora riba e reunion aki den e siguiente manera awe mainta: “Aruba a pasa door di un situacion hopi dificil y ainda e ta dificil y molestioso caminda cu tabata tin casi 200 pasahero pega na Venezuela. Gobierno di Aruba na e momento cu a wordo señala cu e motibo principal di Venezuela pa tuma un medida asina drastico, cu ta e importacion di koper, a duna e siguridad na e gobierno Venezolano cu lo atende cu esaki. Esaki a resulta cu Venezuela a kita e medida aki y nos a logra pa nos hendenan bin bek.”

TRANKILIDAD?

Segun e mandatario, aunke cu esaki a trece un trankilidad pa Gobierno, esaki no kiermeen cu esaki a caba. Segun Wever Croes, gobierno di Aruba no ta nada satisfecho con tur e asunto aki a bay pa cua motibo e reunion entre e mandatarionan di e paisnan aki ta hopi importante. Varios temanan ta programa pa wordo discuti den e reunion aki entre otro certificacion cu Aruba lo por exigi na momento di importacion. E indicacion aki nos lo mester haya for di autoridadnan di Venezolano. Productonan cu nan ta sinti cu Aruba no por importa, tambe lo ta un tema den e reunion.

 A mustra tambe cu gobierno di Aruba lo trece dilanti tambe cu cualkier sea ta e impase of discusion, ni cuanto tempo por a pasa, no por tene hende contra nan gusto na un pais. Venezuela ta keda insisti cu ta desde 2016 caba nan a haci peticion na Gobierno di Aruba, Gobierno di AVP e tempo ey. Tambe nan a bisa cu tabata tin reunionnan riba nivel tecnico na Aruba pa discuti e preocupacion di Venezuela pa purba di yega na compromisonan mutuo, sinembargo no a concretisa nada.

 Gobierno di Gabinete Wever-Croes a duna atencion mesora na e situacion aki y a concretisa e prome compromiso riba e preocupacion principal di Venezuela cu ta e koper. Compromiso y prioridad di Gobierno ta pa combati iligalidad y criminalidad y tambe combati contrabando. Pero pa nos ta importante pa sa kico ta e productonan cu tin prohibicion pa sali for di Venezuela y e contrabando riba esakinan. Gobierno di Aruba a haci tur lo posibel diplomaticamente for di distancia largo pa logra trece nos hendenan bek Aruba y awo lo bay finalisa e intentonan aki den un reunion mirando otro cara cara. Prome Minister un biaha mas a enfatisa cu e conseho di Reino pa loke ta trata biahamento pa Venezuela, “reis advies”, ta keda pa no bay Venezuela si no tin e necesidad pa bay te ora nos haya garantia cu e situacion aki ta resolve.

 

  • Aruba investigando informacion di articulo di Trouw riba contrabanda Venezolano

    Aruba investigando informacion di articulo di Trouw riba contrabanda Venezolano

    CARACAS/ORANJESTAD – Oro y diamanta for di Venezuela ta wordo transporta di contrabanda pa Corsou y Aruba na gran escala, y facilita pa ehercito Venezolano. Asina e corant Hulandes Trouw ta raporta den su edicion awe. E informacion cu periodistanan di e corant a haya, ta bin di ex general Cliver Alcalá. Prome minister Evelyn Wever den su prome reaccion awe riba e articulo a bisa di tabata na altura di e articulo en cuestiony cu mesora el a manda investiga si esaki ta conta enberdad pa Aruba, ya cu segun e articulo e enfoke tabata Corsou y no tanto Aruba. For di fuentenan gubernamental Venezolano, NoticiaCla a haya un reaccion inoficial indicando cu no ta duna mucho balor na e informacion ya cu Alcala ta conoci di ta un persona ‘malo’, osea no di confia. Mientrastanto, fuentenan periodistico di e portal aki ta mustra cu mientras cu e ex general tabata hopi cerca di ex presidente Chavez, el a distancia di Maduro pasobra e tabata critica hopi di su politica. Pues e reaccion di parti di fuentenan di gobierno, ta comprondible e ora. E articulo mes en cuestion ta di e periodista investigativo Bram Ebus, cu a haci un investigacion di e asunto aki. E ta bin na remarke net awor cu tin un impasse entre Aruba y Venezuela pa contrabanda di hopi material cu Venezuela tin problema cune. Ta netamente pa e asuntonan aki, Venezuela tin su frontera cu islanan ABC cera pa mas di un siman caba. Segun e presidente di e pais andino, Nicolas Maduro, e problema ta contrabanda di mafia. Diahuebs tin combersacionnan atrobe pa wak si ta sali di e impasse aki y si Venezuela ta dispuesto pa firma e acuerdo di concepto yega na dje diabierna anochi. Fuente: Trouw.nl.. foto cortesia REUTERS. 

  • Tin solucion pa reduci e ‘presion’ na Spoed Eisend Hulp

    Tin solucion pa reduci e ‘presion’ na Spoed Eisend Hulp

    ORANJESTAD – E introduccion di dos docter di cas extra na Spoed Eisend Hulp mester yuda reduci e tempo di espera ora cu un pashent ta na e departamento ey di hospital. Asina minister di Salud Dangui Oduber a bisa dialuna mainta den un conferencia di prensa. Segun Oduber, tin dos localidad habri na hospital unda cu AZV lo cubri dos huisarts cu ta specialmente atende y asisti tur caso di emergencia. E pashent cu yega, lo wordo trata. Esun cu resulta di no ta emergencia, e 2 docternan di cas lo trata. Asina e mandatario lo kier baha presion riba SHE, y reduci tempo cu pashent ta warda pa ayudo medico. Awor ta buscando si tin docter di cas disponibel cu por cuminsa di biaha, y si ta pa e minister, esaki por cuminsa dentro di un luna caba. “Pero por lo menos ya tin palabracion entre hospital i AZV pa cubri e gastonan” Oduber a bisa.

  • Wever: Integriteitskamer ta realidad prome cu fin di 2018

    Wever: Integriteitskamer ta realidad prome cu fin di 2018

    ORANJESTAD – Ta e intencion pa durante e prome aña di gobernacion Wever Croes, introduci e asina yama ‘integriteitskamer’ osea e ‘camber di integridad’. E camber aki tin cu scrutina tur proyecto y asunto di gobierno pa sigura cu esaki ta cumpli cu tur norma di integridad. Asina prome minister Evelyn Wever Croes a bisa dialuna durante conferencia di prensa. E structura di e camber aki sinembargo ta hopi curu ainda. E unico cos cu ta sigur, ta cu e ta bin e aña aki ainda, y cu e ta consisti di un grupo di persona ‘no politico’, sino e ta ‘beat the whole purpose’.

  • Gobierno a lamenta cu CITGO Aruba a nenga parlamentarionan Hulandes informacion

    Gobierno a lamenta cu CITGO Aruba a nenga parlamentarionan Hulandes informacion

    ORANJESTAD - Gobierno di Aruba ta lamenta cu Citgo Aruba a nenga informacion na parlamentarionan Hulandes. Esaki tabata e reaccion official un dia despues cu dos parlamentario Hulandes a reclama publicamente cu nan no a haya informacion di e refineria y a wordo prohibi entrada. Ta trata di parlamentarionan Hulandes van Raak y Bosman cu tabata na Aruba siman pasa pa atende reunionnan interparlamentario entre Aruba Hulanda y Sint Maarten. Pa cu e reunion aki e delegacion Hulandes a pidi Parlamento di Aruba pa por regla un bishita na refineria of por lo menos pa Citgo duna un presentacion na Parlamento. Lamentablemente Citgo a nenga di haci esaki, y e dos Parlamentarionan a bay busca informacion nan mes. Nan a bay na e refineria y locual nan a mira a decepciona nan. Nan a mira hopi hero bieu, y nan no a mira practicamente ningun actividad. Riba medionan social nan a cuestiona esaki masha hopi mes y un video di sr. van Raak “locual mi no tabata mag di wak na Aruba” a circula den henter Reino. A puntra Prome Minister di Aruba su reaccion, y sra. Wever-Croes a indica cu e ta lamenta cu Citgo no a duna e Parlamentarionan informacion tocante e proyecto. Pa gobierno tambe aparentemente ta dificil pa haya informacion. Tin reunionnan planea e siman cu ta bin pa haya mas informacion di e status di e proyecto. Mes momento Gobierno ta studiando e contractnan cu Gobierno di AVP a cera cu Citgo pa operacion di e refineria, pasobra indicacion ta cu e inversionnan no a tuma lugar y no tin claridad ki tempo nan lo tuma lugar. Gobierno di Aruba a anuncia siman pasa caba cu a institui un comision independiente pa studia e contract y conseha Gobierno kico pa haci cu n’e. Foto cortesia di gobierno su oficina di prensa.   

  • Knops: Prioridad ta pa tene bon relacion entre Aruba y Hulanda

    Knops: Prioridad ta pa tene bon relacion entre Aruba y Hulanda

    ORANJESTAD – Importante ta un bon relacion entre Aruba y Hulanda, segun secretario di estado Hulandes di Reino Raymond Knops. “Mi ta haye importante pa mantene un bon relacion cu gobernantenan pero tambe tur tipo di organisacion (tambe na Aruba), unda cu un relacion intensivo semper ta bon pasobra e ora den temponan bon y tambe malo, bo por atende miho cu otro” Knops a bisa durante su conferencia di prensa diasabra atardi. E mandatario a repasa su bishita cortico, unda cu a topa cu entre otro gabinete Wever Croes, lidernan di fraccion di cada partido, gobernador, haci varios bishita na instancia y tambe tene un recepcion diabierna anochi. E mandatario ta bolbe Hulanda diadomingo, clausurando un bishita di conocemento di islanan ABC cu a cuminsa dialuna ultimo na Bonaire. 

  • Knops ta sostene CAFT pa duna Aruba espacio pa drecha su finanzas

    Knops ta sostene CAFT pa duna Aruba espacio pa drecha su finanzas

    ORANJESTAD – Secretario di estado Hulandes pa asuntonan di Reino Raymond Knops ta di sostene e colegio di supervision financiero di Aruba CAFT cu mester duna e gobierno nobo di Aruba mas tempo pa regla su asuntonan financiero. Como tal e ta di acuerdo cu por desvia un poco di e ultimatum nan fiha. Aparte di esey, e mandatario no a haci ningun palabracion concreto durante su bishita cortico di 3 dia. Asina e mandatario a bisa durante un conferencia di prensa diasabra atardi. A compronde tambe di e premier di Aruba cu e ta contento cu el a haya e espacio pa por drecha e situacion financiero.

  • Powered by SETAR