Editorial : Caso de Vuyst; Prohibi pa lubida

Editorial : Caso de Vuyst; Prohibi pa lubida

Posted on 01/3/2018 10:12 am AST | Updated on 01/3/2018 5:34 pm AST

Aruba a habri un aña nobo (2018) cu e tradicion di semper, esta cende pagara, cos di bebe y come na cantidad, fiesta y tambe e parti di reflexion. Aunke no necesariamente tur hende ta celebra esaki den e orden ariba menciona. Mientras cu cada aña automaticamente ta diferente (gran parti), na esun anterior pa e motibonan obvio, mi ta spera cu e aña aki por ta sigur menos violento cu esun anterior. Y aki mi kier para keto un rato. Fuera di e racha di atraco cu dado momento a ‘bay fo’i man’ na 2017, te na un cantidad inusual di asesinato, tin mas cos cu mester frena, cu a bay malo. E unico cos ‘positivo’ den tur esunnan negativo ta cu p.e. e cantidad di e accidentenan di trafico fatal a keda reduci na un cifra bou di 5 y cu hopi caso a keda resolvi. Algo sublime…hopi bon! Aunke cu berdad cada un ta uno di mas. Pero, bek pa nos punto di awe.

E dos casonan cu a marca 2017 sigur ta esun di dia 3 di november, ora cu a haya e dama hoben Sarahi Sierra morto den su cas na De Vuyst. Un morto sumamente cruel, cu te ainda no tin solo pista di kico por a pasa, cu e dama mester a haya su morto di un forma asina cruel. Por lo menos e informacion riba e caso aki no ta conoci publicamente. Y mi sa, pasobra e famia a confirma cu nan ta den scuridad total riba esey.

Algun tempo despues, -exactamente 3 siman por cierto-, tambe riba un diabierna, ta raporta morto di un criatura di apenas 5 aña, consecuencia di violencia. Otro caso di violencia y tambe riba un diabierna. Cos no a para eynan, ya cu algun dia despues ta bin confirma cu e ruman di e criatura di 5 aña, -su ruman homber di 3 aña cu a keda raporta como perdi-, tambe tabata morto. Den e caso particular aki, e culpabel a confesa su actonan y e caso ta haya un tinte di ta un caso di asesinato practicamente soluciona. Pa e famianan ey, tin un consuelo, pasobra nan sa kico a pasa y pakico.

Awe nos ta dos luna despues, unda cu pa e famianan di e dama hoben Sarahi, no tin nada di consuelo pa nan ainda. Nada di pista, niun detencion, nada. Ainda e culpabel(nan) di e acto horendo aki ta cana liber. E mama, e dos rumannan, e yiu homber, e pareha y famia mester a pasa nan prome Pasco y Aña Nobo sin nan ser keri stima. Nan por a solamente consola otro cu lagrima y spera lo miho.

PRIORIDAD

Berdad cu e caso di e dos criaturanan a haya atencion halto, porta te hasta mas halto cu e caso di e morto di De Vuyst. Pa hopi esaki ta comprendibel, pasobra ta trata di dos criatura inocente asina chikito. E mortonan aki a impacta asina fuerte berdad, cu el a pone te hasta prioridad di e gabinete nobo Wever Croes cambia, unda cu e aña aki, en bez di pone finanzas publico como prioridad, a shift esaki pa e parti social pa percura ‘pa algo asina nunca mas sosode atrobe’. Tur ta comprendibel.

Como periodista, bo ta cubri hopi caso, violento, morto, tragedia y un cantidad mas. Pero personalmente, e caso di de Vuyst, mi a experiencia mas di cerca. Y esey a pone e perspectiva un poco mas diferente y mas ‘cerca di cas’. Ora cu durante un conferencia di prensa pa e caso di e dos criaturanan autoridad di husticia a anuncia cu e padrastro di e dos criatura a confesa su acto(nan) y responsabilisa su mes pa nan, tur hende a hala rosea cu ‘por lo menos e caso ta haya un ‘fin’. Ami tambe. Pero mientras mi tabata recoge mi aparatonan di trabou na e conferencia, mi a pensa mesora ki tristesa e famia di Sarahi mester ta sinti, cu nan caso si ainda no a haya un solucion. Nan ainda no por drumi ‘trankil’, sabiendo cu e culpabel(nan) ta tras di trali, of a haya un otro castigo. Nan ainda ta biba den temor, inseguridad, y intrankilidad. Nan ainda mester pensa, warda, spera cu pronto tin un solucion pa nan tambe. Mi a pensa mesora, cu esaki pa nan, no ta ‘fair’. Un solucion na e caso, berdad no ta trece Sarahi bek, pero por lo menos e famia ta haya sa cu esunnan cu a comete e acto aki, no por ripiti esaki nunca mas. Mi ta spera y tin tur confianza di curason, cu autoridad ta trahando duro pa e caso aki y mientras cu nos no ta tendiendo nada nada, spera cu dentro di nan seno, nan ta trahando cu alma y cuerpo pa resolve e caso. Den e caso aki, porta por uza e dicho, ‘no news is good news’ den sentido cu ta yegando na un solucion, pero pa no ‘daña’ e caso, no ta bisa nada ainda. Pero mi ta rechaza pa pensa cu autoridad ‘a lubida riba e caso aki’, of cu no por haci mucho cos cu e miedo cu e por bira un ‘cold case’. Ta prohibi pa lubida e caso horendo aki. Berdad cu ta parce cu e caso di e criaturanan a ‘lanta’ tur hende fo’i soño, pero e caso di de Vuyst, ta mes grave, sigur pa e famianan concerni e ta mas grave ainda, pasobra ta nan famia, y como tal pa nan, merece TUR atencion di autoridad. Mi ta spera di curason, cu pronto mi por raporta tambe cu e caso aki a haya un ‘solucion’. Un solucion den sentido cu e famia por haya contesta riba miles di pregunta cu nan ta haci nan mes tur dia. Pakico a mata Sarahi. Pakico a hacie asina, y kico por a bay robez. Y ken(nan) por a tribi den nan mente pa haci algo asina horendo. E mama y e dos rumannan di Sarahi merece e contestanan aki. Nan tambe merece trankilidad bek den nan bida. Mientrastanto, Sarahi lo ta e angel cu ta cuida nan di ariba y guia nan. Feliz Aña 2018 y ban traha duro pa un bon Aruba. 

  • Vd Berg: Ta pone bestianan na afmaakhok drumi di forma humano

    Vd Berg: Ta pone bestianan na afmaakhok drumi di forma humano

    ORANJESTAD – Servicio veterinario ta pone tur bestia cu keda laga atras na e asina yama ‘afmaakhok’ of ‘kill cage’, drumi den un forma responsabel, humano y segun standard internacional. Asina hefe di e departamento Riem vd Berg a sigura durante un conferencia di prensa dialuna atardi. E conferencia tabata uno di urgencia, den un intento pa evita cu diamars awor un grupo di persona tene un accion di protesta na e sitio. Vd Berg a purba sigura na varios momento cu ta e unico forma cu tin aworaki pa resolve e problema di sobre poblacion di bestia. E otro forma segun vd Berg, ta concientizacion pa ta un doño responsabel di bestia.

  • Kock: Protesta mester cambia maneho di Kill Cage na Wayaca

    Kock: Protesta mester cambia maneho di Kill Cage na Wayaca

    ORANJESTAD – E forma con departamento veterinario ta pone cacho y pushi drumi, ta cuestionable. Como tal un di e fundacionan cu ta rescata bestia riba caya, Crijojo Trappers ta protesta diamars atardi 5’or na e ‘popularmente’ yama Kill Cage of ‘Afmaakhok’ di veterinaire dienst na Wayaca. E meta segun e lider di proyecto Mervine Kock, ta pa concientiza nos hendenan kico ta tuma lugar eynan y pa trece cambio na e proceso cu ta pone e bestianan drumi. Asina Kock a bisa den e programa NoticiaCla LIVE riba Facebook.

  • Segun Venezuela, cambio di ultimo ora di Hulanda a tranca acuerdo

    Segun Venezuela, cambio di ultimo ora di Hulanda a tranca acuerdo

    ORANJESTAD - 'Debi cu Hulanda a haci dificil na ultimo ora, e acuerdo entre esnan cu a reuni diabierna pa mas di 6 ora largo, no a keda aproba'. Fuentenan na Caracas di NoticiaCla y prensa Venezolano cu tabata presente, a bisa despues di nan regreso diabierna anochi. Tabata durante e ultimo parti di e negociacion, cu Hulanda kier a trece cambio den un paragrafo, pa cual e delegacion Venezolano a bisa cu nan mester haya aprobacion na Caracas prome, ya cu e cambionan di 'ultimo ora', nan no ta autoriza pa aproba riba nan mes. Esey a pone cu mester a para e reunion y keda pendiente pa un aprobacion pa despues nan firma e concepto di acuerdo, definitivamente diahuebs awor durante un otro reunion na Aruba. Kico e cambio ta, no ta conoci. Foto ta di delegacion Venezolano durante e reunion di diabierna ultimo.

  • ATA a firma acuerdo cu hotel management school Maastricht

    ATA a firma acuerdo cu hotel management school Maastricht

    ORANJESTAD - ARUBA TOURISM AUTHORITY A FIRMA ACUERDO CU HOTEL MANAGEMENT SCHOOL MAASTRICHT ORANJESTAD – Recien, Oficina di Turismo di Aruba a firma un acuerdo cu Hotel Management School Maastricht (HMSM) un acuerdo pa asina eleva e nivel di servicio aun mas den nos sectornan di hospitalidad y turismo, den su totalidad. Esaki mas cu claro por medio di e Aruba Certification Program (ACP).HMSM, un institucion reconoci mundialmente, ta bay desaroya conhuntamente cu ACP diferente modulo di curiculo di servicio, como tambe entrena nos profesionalnan local pa asina consecuentemente sigui transmiti e conocemento aki na nos forsa laboral riba tur nivel. Pa haci esaki posibel, HMSM a bin ta haci desk research den december y awo a bishita Aruba pa combersa cu nos socionan riba diferente topico pa por identifica y compronde miho e contexto cultural, comercial y turistico di nos sociedad. Consecuentemente lo crea y incorpora un standard di calidad den nos servicio cu ta den linia internacional y di es manera aki lo desaroya un programa conforme necesidadnan den nos mercado y bao di nos hendenan. Mediante e acuerdo aki, Aruba Certification Program lo conta cu manualnan di entrenamento y materialnan relevante pa e curso, entrenamento di nan personal y un curiculo di servicio. Introducion di e cursonan nobo lo tuma luga den e luna di maart / april proximo. Esaki ta nifica cu banda di e programa actual, pronto ACP lo expande locual ta ofrece na cursonan y lo ahusta e programa actual asina tumando e oportunidad pa update un cu e otro. Expansion di e cursonan ta wordo desaroyo a base di feedback cu a ricibi e siman aki. Hotel Management School Maastricht ta forma parti di e ZUYD University of Applied Sciences na Hulanda. E ta consisti di tres departamento cu ta: e scol mes cu tin mas di 65 aña di trayectoria educacional, produciendo rond di 250 hoben profesional pa aña, hobennan cu ta wordo selecta pa forma parti di e skol; e Teaching Hotel Chateau Bethlehem reconoci internacionalmente como un centro di aprendisahe y desaroyo maneha door di studiantenan; y e HMSM Hospitality Consultancy cu ta un grupo di profesionalnan cualifica cu ta conecta e conocemento di HMSM cu e mundo di hospitalidad internacionalmente. E ultimo aki ta esun encarga pa desaroya e programa pa Aruba Certification Program. Aruba Certification Program a wordo crea na 2011 cu e proposito pa eleva e nivel di servicio. Awe orguyosamente ACP a logra certifica alrededor di 4000 particpante . Oficina di Turismo y ACP a haya den Hotel Management School Maastricht un socio cu cual ta desaroya e componente specifico di servicio den e programa existente y cu cual lo amplia e oferta di cursonan bao di ACP. E desaroyo aki ta den linea cu e plan ‘Cu Mira Pa Futuro’, unda ta delinea tambe e necesidad di enfoca riba mehoracion di e servicio cu nos ta brinda nos bishitantenan en general.

  • Delegacion Venezolano a yega Aruba pa reuni riba impasse

    Delegacion Venezolano a yega Aruba pa reuni riba impasse

    ORANJESTAD - Un delegacion Venezolano a yega Aruba diabierna atardi como parti di e reunion pa resolve e impasse cu tin entre Venezuela y islanan ABC. Fuera di e yegada di e delegacion, tin tambe representante di Hulanda y Corsou. Keda pendiente pa e resultado di e reunion. Manera NoticiaCla a raporta caba, diabierna mainta Venezuela a informa cu a prolonga e medida contra islanan ABC. Pero  siman pasa cu e presidente Venezolano a sorprende tur e islanan y Hulanda cu e desicion pa cera frontera cu islanan ABC pa motibo di contrabanda entre e islanan y Venezuela. A duna e islanan 3 dia pa resolve e problema, pero esaki no a logra. A prolonga esaki pa tres dia pa diabierna atrobe cu 3 dia. 

  • Directora di impuesto a entrega keho awe riba caso falsificacion sticker pa auto

    Directora di impuesto a entrega keho awe riba caso falsificacion sticker pa auto

    ORANJESTAD – Directora di departamento di impuesto Luenne Gomez Pieters a entrega keho oficial na recherche awe merdia. E keho ta basa riba un post riba Facebook cu lo a duplica un sticker di motorrijtuigbelasting. A actua mesora y a haci keho na polis. A mustra cu no por duplica esaki y e ta bira illegal. Cu e entrega di keho aki, departamento di impuesto kier a manda un señal hopi cla cu no ta tolera nada di esaki. “Nos ta haci keho di cualkier keho di algo (asina) cu sosode” Gomez a bisa. E post en particular ta e sticker di e color fuxia. A duna e oferta pa bende e sticker aki pa 100 florin, cu ta duna e indole cu bo ta haci negoshi cu un documento oficial di departamento di impuesto. Tin e team di control y tambe di FIOT cu ta haci investigacion riba tereno di cualkier asunto di falsificacion manera nummerplaat, aangifte di belasting of cualkier otro cos asina. Ta prohibi pa ley pa reproduci algo asina den un forma illegal. E keho oficial a keda entrega awe merdia.

  • Powered by SETAR