DCA ta recorda co-compositor di nos himno nacional, Rufo Wever

Posted on 12/7/2017 5:52 pm AST | Updated on 12/8/2017 6:49 am AST

ORANJESTAD – Departamento di Cultura Aruba ta recorda sr. Rufo Wever d.f.m., un baluarte den nos mundo cultural na Aruba. Un dia manera diabierna 8 di december e lo a cumpli 100 aña di edad. Rufo Wever tabata un musico, compositor y areglista conoci, kende a toca y skirbi hopi cantica. El a compone: danza, tumba, mazurka, polka, bolero, calypso, mambo, porro y zamba.

BIOGRAFIA:

Riba 8 di december 1917 sr. Rufo Wever a nace. E tabata yiu mayo di su mayornan y tin cuater ruman mas. Nan a yam'e: Rufo Inocencio Wever y miho conoci den nos comunidad como Rufo Wever, kende a biba den Wilhelminastraat nr. 33 na Oranjestad. Su mayornan sra. Maria Annette Lampe-Babijn y sr. Civiles Marcial Wever-Everts. Rufo a bay ULO na Dominicus College na Oranjestad.Su interes pa musica a cuminsa for di mucha, na edad di 5 aña, unda e tabata toca musica popular cu su harmonica, cual el a haya for di su tata pa su hacimento di aña. Den un par di dia el a cuminsa toca e cantica: ‘Amor de Cinco Años’, un cancion hopi popular den e tempo ey. Su tata a stimul’e door di cumpra un piano segunda mano. E piano tabata un compra exitoso y pa e hoben Rufo e tabata mustra hopi agradabel tocando piano, kende tabata sa di toca un par di melodia simpel. Tata di Rufo tabata impresiona di su talento y a percura pa Rufo cuminsa haya les di piano. Rufo tabatin 6 aña y akinan tabata e comienso di su carera musical. E tabata toca saxofon, guitara, cuarta, clarinet y tur otro instrumento ritmico el a siña. Esaki a influencia su bida pa mey siglo. Na su edad di 10 aña Rufo a haya un tristesa grandi pa anda cu ne, ora cu su tata, Civiles Wever, diripiente ta fayece. E tristesa tabata asina grandi cu Rufo a stop cu su musica. Dos aña largo e no a toca nada. Cu su 12 aña di edad el a cuminsa toca atrobe. Hunto cu su rumannan homber y muhe, tabata invit'e pa e fiestanan y eynan pa e toca piano. E tabata toca principalmente musicanan popular di e tempo ey, manera hitnan Mericano y nos tumbanan. Ora Rufo tabatin 13 aña, el a haci presentacion pa prome biaha den exterior. Esaki tabata na Corsou y Boneiro, caminda el a causa exito. Na edad di 15 aña Rufo a lanta su banda ‘The Melody Boys’. E banda tabata mesora un gran exito y nan tabata presenta den club y teatronan y tabata biaha hopi pa nos isla ruman Corsou pa mustra nan talentonan musical y plama esaki riba isla di Corsou. Den ultimo añanan di existencia di e banda, Juan Chabaya ‘Padu’ Lampe tambe tabata toca cu nan. E tempo ey caba Padu tabata amigo di Rufo. Mas despues el a lanta e otro banda cu yama ‘Los Travadores Musicales’.

Cu su 18 aña Rufo ta haci conoci cu e Cubano famoso, Carlos Pous, kende cu su banda riba Aruba a bin presenta. Ora un di su violinistanan a bira malo, nan a pidi Rufo como reemplasante riba saxofon. Rufo a bay di acuerdo cu esaki, pero prome mester a adapta e areglonan pa toca riba saxofon. E adaptacion Rufo mes a haci. E resultado a bira di ta un gran exito. Asina grandi mes cu e Cubano a duna Rufo un contract. Pero Rufo a nenga esaki. El a haya cu e ta mucho jong. Rufo tabata toca mas instrumento banda di piano; manera ya menciona saxofon, clarinet, guitara y cuarta. Banda di tur esaki e tabata traha cilinder di ‘Caha’i orgel’, pero despues lo trata esaki.

Riba e mesun aña ey Rufo y e Cubano tabata toca, el a skirbi su prome wals: ‘Arubanita’. E wals aki a bira asina conoci y e añanan despues Reina Juliana y Prinses Beatrix a baila su wals.

Den aña 1975 Rufo a ricibi e condecoracion di ‘Ridder van Oranje Nassau pa su aporte na musica y cultura Arubano.

E composicion di ‘Arubanita’ a haci Rufo consciente di su talento como compositor. Esaki a hiba Rufo na traha hopi mas composicion. Un total di mas o menos 400 den diferente ritmo Latino y un par Mericano. Di e cantidad aki tin un 60 riba LP y CD. (Padu Lampe tin algun piesa di Rufo riba su CD), tanto nacional como internacional. Rufo tin mas o menos 80 produccion di dje mes y otro nan di importancia pa musica y cultura Arubano poni riba papel. Esakinan el a entrega na Gobierno di Aruba y di Antiyas, di manera nan lo ta warda como rikesa cultural pa futuro. Su prome disco cu a produci na 1964 tabata hopi particular, pasobra e tabata produci cu e composicionnan Arubano. Un par di e produccionnan tabata:

‘La Encantadora’, su di dos wals.

‘Aruba’, un bunita wals elegante.

‘Soñando’, un wals cu a ser graba na Merca hunto cu un piesa Mericano, ‘While I am away’.

‘Algun día seré’, un bolero romantico.

‘Annette’, un wals complica, cu el a dedica na su mama.

Rufo a traha hopi cu otro artistanan Arubano, manera su amigo Padu Lampe.

Algun di e canticanan cu nan a traha hunto ta: ‘Chanita’, un tumba. ‘Carnaval’, un Calypso (1954).

Y sin lubida naturalmente: nos himno nacional, ‘Aruba Dushi Tera’ na 1950.

Rufo a duna aporte den otro forma tambe na nos cultura. Esakinan tabata den 1938 y a dura 30 aña y mas ainda riba e trabou cu Caha ‘i orgel. Rufo tabata compone special pa Caha ‘i orgel y e tabata traha cilinder pa caha di orgel. E tabata na comienso pa un tempo largo e unico cu tabata haci e sorto di trabou aki tanto na Aruba como na Corsou. Tur esaki a haci Rufo special, pero tin algo cu no a ser conta dje, cu ta haciele mas special ainda. Tabata den december 1944 cu tur cos a cuminsa. Esaki tabata durante 2da guera mundial. Aruba tabata den e temporada di guera door di e refinaderia Lago, cu tabata entrega azeta na e aliadonan. P’esey tabatin scuridad total riba e isla pa e bira no visibel pa e enemigo. Riba un anochi Rufo tabata core hunto cu un par di amigonan den auto. Rufo tabata sinta patras cu su man pafo di ventana y diripiente a aparece un auto di marinier riba nan. Esaki a pasa asina cerca bay, cu el a dal e auto cu Rufo tabata core aden. E hoben P. Habibe cu tambe tabata den e auto a perde su bida durante e accidente aki y Rufo a perde su brasa robes te na su elleboog. Despues cu Rufo a sali fo’i hospital, el a laga e bida social, y door cu el a haya un accident. E tabatin 24 aña e tempo ey. Pero kende por a pensa cu esaki lo tabata e final di su carera musical, a dal su dede. Cu apoyo y ayudo di su famia y amigonan y casi un motivacion inhumano, Rufo a cuminsa despues di e bira bon atrobe cu su musica. El a siña riba su mes con pa traha riba caha di orgel cu un man. E tabata haya ayudo si cu e clabamento di cilinder, pero e parti musical artistico e mes tabata haciele. El a cuminsa practica cu su man drechi di tal manera cu tabata parce cu e tin dos man. E tabata bisti un brasa artificial pa e por a toca cu man robes riba piano. Cu su man drechi e tabata toca e melodia y cu su man robes e tononan abou. Despues di train hopi, e tabata toca mescos cu antes, te hasta miho. Na 1954 el a toca pa e apertura di stacion di radio ‘Voz di Aruba’. E tabata ser ricibi cu hopi calor di su hopi fanaticada nan cu haya su falta. El a cuminsa cu su propio programa di radio na 1963. E tabata un exito grandi cu nan a dicidi na 1964 pa graba un longplay na Maracaibo, Venezuela. Esaki a duna Rufo e oportunidad pa presenta na radio y television na Venezuela. Na su regreso na Aruba el a cuminsa su propio programa di television cu su ‘combo’ nobo, cu a ser lanta entre famia y amigonan. E grupo aki a existi den e periodo di 1964-1967 y tabata consisti di e siguiente personanan: Lucio Wever(Ruman), Chibi Wever(primo), Chemy Coronel, Humphry Kelly y Ebby Peterson, amigonan di Rufo.

E ultimo añanan di su bida el a pas'e hunto cu su ruman muhe, Maria Eusebia Lampe-Wever, den skirbi y compone musica. Den e periodo aki Rufo a retira fo’i publico. Rufo Inocencio Wever a fayece riba 30 di december 1977 na edad di 60 aña, door di un malesa di pulmon.

Stacionnan di Radio y planta di television a tene un minut di silencio na honor di e gran musico Arubano. Riba 2 di januari 1978 a bini e Gobernador di Antiyas na Aruba pa hunto cu e famia, amistad y fanaticonan, tuma despedida di e gran genio musical aki. E orkesta Sinfonico di Aruba a guia e entiero, esaki segun e deseo di Rufo mes.

Rufo a laga atras un tesoro na musica cultural, cu nos mester warda y uza. Mas cu tur siña nos generacionnan nobo conoce ken ta Rufo Wever. Nos tin awendia Scol di Musica Rufo Wever.

 

 

 

  • DS Relationship Coaching/DS Love Coach a habri su portanan

    DS Relationship Coaching/DS Love Coach a habri su portanan

    (ADVERTORIAL)

  • Mas di 300 hende a forma parti di e Girls Night Out di Fifty Shades Freed

    Mas di 300 hende a forma parti di e Girls Night Out di Fifty Shades Freed

    ORANJESTAD - The Cinema y Tropical Bottling Co. a organisa un Valentine’s Night Event specialmente p’e hendenan muhe pa asina set e mood pa Valentine’s Day. The Cinema a haci un evento chikito cu e pelicula di Fifty Shades Freed, caminda e prome 100 persona cu a cumpra nan ticket, a ricibi un goodiebag for di sextasy.

  • Sports Illustrated ‘swimsuit’ edition 55 a enfoca riba Aruba

    Sports Illustrated ‘swimsuit’ edition 55 a enfoca riba Aruba

    ORANJESTAD – Pa e di 55 edicion di e revista internacional renombra Sport Illustrated su edicion di trahe di baño, nan a scohe Aruba como un di e sitionan principal. E edicion a keda revela diamars ultimo, ilustrando beyesanan internacional usando paisahenan romantico di Aruba y Bahamas (for di cual a saca e portada). NoticiaCla a raporta e momento caba ora cu e photo-shoot tabata tuma lugar aña pasa. Ta trata di un serie di modelonan internacional Kate Upton, Aly Raisman, Alexis Ren, Sailor Brinkley (yiu muher di ex modelo di SI, Christie Brinkley), Paige Spiranac y mucho mas. Segun CEO di ATA Ronella Tjin Asjoe, tabata un privilegio pa ta anfitrion di e edicion aki. E revista tin mas di 70 miyon lector adulto internacional anualmente y ta un marca internacional sin igual. Entre e logronan, fuera di e yiu muher di Christie Brinkley, tabatin e storia di Kate Upton cu durante e toma di potret, a cay den laman ora cu un ola a bente abou mientras cu e tabata topless. Tambe tin e prome photoshoot di un atleta paralimpico.

  • Empleadonan di MetaCorp contento cu imagen nobo di Chill

    Empleadonan di MetaCorp contento cu imagen nobo di Chill

    (ADVERTORIAL)

  • Interpark Coney Island tin sorpresa pa fin di siman!

    Interpark Coney Island tin sorpresa pa fin di siman!

    (ADVERTORIAL)

  • Giovanni Bermudez awor na cabes di Tropical Bottling Co.

    Giovanni Bermudez awor na cabes di Tropical Bottling Co.

    (ADVERTORIAL) ORANJESTAD - E no ta un desconoci den e industria comercial. Giovanni Bermudez, desde dia 2 di januari 2018 tin e funcion di Gerente General di Tropical Bottling Company, e compania responsabel pa e liña di bebida mas varia riba nos isla, cu ta inclui e cerbesnan netamente Arubiano, Balashi y Chill, refresconan Coca Cola, Tropical, Malta Balashi y un liña extenso di bebidanan no alcoholico y tambe alcoholico di marcanan internacionalmente renombra. Giovanni Bermudez ta conoci den e industria aki, despues cu for di aña 1994 a start su carera na Licores Aruba y asina a gana hopi experencia den e industria di bebida y restaurantnan rapido. A acerca su persona a base di su experiencia y Giovanny Bermudez a tuma e reto aki. “Mi a tum’e cu hopi gana, pasobra mi ta un persona cu ta gusta un reto nobo”, asina el a expresa. Den un empresa manera Balashi, cu ta uno grandi, un empresa sofistica y cu hopi structura. El a tuma e reto pa hiba e empresa na e siguiente nivel. Despues di casi 25 aña di experencia den posicionnan den gerencia, e ta completamente prepara pa hiba e Tropical Bottling Company na e siguiente nivel di crecemento, desaroyo y exito den e mercado local y internacional. Tropical Bottling Company ta precisamente memey di un proyecto miyonario di expansion di su facilidadnan na Balashi, den cual ta construyendo un warehouse gigantesco. E inversion a inclui adkisicion di un mashin nobo y sofistica pa label boter di cerbes y den futuro otro boternan. Tur esaki den un proyecto pa conkista mas mercado den tur area di e industria di bebida riba nos isla. Cu e conocemento di mercado di Giovanni Bermudez, e ta capaz pa haci e cambio aki, hunto cu un ekipo relativamente nobo den gerencia y hunto cu un ekipo di empleadonan profesional, dedica y experencia den e industria aki. Giovanni Bermudez a expresa cu cerbes Chill semper ta un di e cerbesnan grandi den mercado na Aruba. Nan vision ta pa bira lider absoluto den mercado y e enfoke ta completamente grandi pa asina crece e market share di e producto. Asina aki e otro marcanan lo keda irelevante.

  • Powered by SETAR