Aruba riba lista gris di Union Europeo pa evasion di impuesto

Aruba riba lista gris di Union Europeo pa evasion di impuesto

Posted on 12/6/2017 10:13 am AST | Updated on 12/6/2017 10:15 am AST

BRUSELAS – Aruba y Corsou ta riba e lista ‘gris’ di paisnan cu ta un paraiso pa evasion di impuesto, segun un lista cu Union Europeo a publica diamars. Nan (Aruba y Corsou) tin te otro aña pa adapta leynan di impuesto, pa asina keda elimina di e lista. Por lo menos nan ta cooperando y a priminti pa sea adapta of elimina e ‘existencia di un regimen dañino di impuesto y tin cu haci esaki prome cu fin di 2018. Aparte di esey Union Europeo a publica un lista preto (blacklist) di 17 pais cu no ta cooperando cu esaki, unda cu tin paisnan manera Panama, Barbados y Sur Korea. Na e paisnan aki, e ley di impuesto ta di tal forma cu hende y compania por evadi nan obligacion fiscal. Segun ministernan di finanza di union europeo, nan ta ‘poco dispuesto’ pa yuda combadi evasion di impuesto. Straño ta cu paisnan cu ta conoci pa evasion di impuesto, manera Bahamas y Islanan Cayman, no ta aparece riba e lista preto aki. Fuente Union Europeo/NOS. Mira e lista completo AKI

  • Doñonan di hotelnan RIU ta sigura nan inocencia di cargonan sospecha

    Doñonan di hotelnan RIU ta sigura nan inocencia di cargonan sospecha

    MIAMI – E compania hotelero internacional RIU ( cu tin dos hotel na Aruba) ta sigura cu su ehecutivonan ta ‘absolutamente inocente di cargonan cu nan ta wordo sospecha di dje’. Asina un comunicado emiti pa e compania ta bisa. Asina nan ta reacciona riba e hecho cu dialuna e doño Luis Riu y su vice presidente regional Alejandro Sánchez del Arco a entrega su mes na autoridad Mericano, keda deteni brevemente riba cargo di cu el a ofrece camber gratis a cambio di fabornan na director di construccion na Miami. Despues cu Riu y Sanchez a entrega nan mes, a presente e cargonan, Riu la paga un fianza y a keda den libertad. “ Nos ta confia cu e sistema hudicial Mericano lo conclui cu e acusacionnan aki ta totalmente infunda, y nos ehecutivonan ta desea impacientemente pa proba nan inocencia” e comunicado ta sigui bisa.

  • CNE: Dia 22 di april ta e fecha pa eleccion presidencial na Venezuela

    CNE: Dia 22 di april ta e fecha pa eleccion presidencial na Venezuela

    CARACAS – E poder electoral Venezolano a oficialmente pone fecha pa e proximi eleccion presidencial di e pais pa dia 22 di april 2018. Asina CNE (Conseho Nacional Electoral a anuncia diaranson. Esnan inscribi dia 20 di februrari, por participa na e eleccion. E organismo comicial ta activa un ‘jornada’ special di actualisacion di dato entre 10 y 20 di februari proximo. A duna como lapso pa candidatonan postula nan mes, pa entre dia 26 y 27 di februari proximo. E admision mientrastanto y rechazo di e postulacion lo ta entre 26 di februari pa 1 di maart. E campaña electoral pa e cargo di presidente ta cuminsa dia 2 di april y ta caba dia 19 di april, cu ta 17 dia pa e candidatonan por ofrece na e electorado, nan proyecto y plan na e pais.

  • Video clip di 'Machica' ta sigui score bon internacionalmente

    Video clip di 'Machica' ta sigui score bon internacionalmente

    DEN HAAG – E video clip di e cantica Machika di J Balvin, Jeon y Dj Chuckie ta sigui draai bon riba YouTube. E number a wordo mira 56 miyon biaha caba den dos siman di tempo. Y  siman pasa a drenta e American Hot Latin Songs chart na posicion number 10, pero a baha despues na # 14. Prensa Hulandes ta positivo riba e cancion y e storia rond di dje. Ta papia di e.o. Jeon su encuentro cu J Balvin, y cu DJ Chuckie a yuda cu e produccion. Pa J Balvin, ta di 11 biaha cu e cantante ta logra un cancion riba top 10. Recientemente e tabatin un exito grandi cu ‘Mi Gente’. Jeon mientrastanto a haci un bon papel den un entrevista cu e FunX-dj Fernando Halman riba e portal Nandoleaks.com. E bon ta cu Jeon (Jonathan Thiel) ta haya reconocemento como e autor di e version original di Machika, canta na papiamento.

  • Mama di Natalee Holloway ta demanda TV Mericano pa manipulacion

    Mama di Natalee Holloway ta demanda TV Mericano pa manipulacion

    ALABAMA – Mama di Natalee Holloway cu a desaparece na Aruba na 2005, esta Beth Holloway a demanda e canal di television Oxygen. Holloway su argumento ta cu e compania a manipule den obtene su DNA bou di e pretexto cu nan a haya resto di su yiu muher. E canal tabata pa produci un serie di 6 programa, basa riba e hecho cu nan ‘lo a haya e restonan’. “Ningun resto a wordo haya” Holloway a bisa den su demanda, y cu e lo no a duna su DNA si e canal no a manipule. Holloway a yama e serie un farce pre planea cu ta indignante. Di otro banda, Holloway a sa di uza media den su beneficio for di momento cu su yiu muher a disparce y a gana basta placa cu programanan televisa.

  • PAWA tin te awe pa cumpli cu centenares di pasahero ‘desampara’

    PAWA tin te awe pa cumpli cu centenares di pasahero ‘desampara’

    SANTO DOMINGO – E Junta di Aviacion Civil (JAC) a duna e aerolinea PAWA (Pawa Dominicano te awe pa entrega un propuesta di con e tin pensa di resolve e situacion di centenares di pasahero perhudica, cu a cumpra pasashi pero cu ta pega cu esaki awor. Tur esey ta bin despues cu a suspende e operacion di e aerolinea pa 90 dia. Si e aerolinea no cumpli, e por haye den problema mas serio ainda legal, civil y penal. E aerolinea tin un debe di 7 miyon di dollar di cual 3 miyon ta pa autoridad local dominicano. Y pa completa e obra, diasabra autoridad dominicano a detene e presidente ehecutivo di e compania Gary Stone. Fuente y potret: Listin Diario

  • Merca evaluando sanccion petrolero severo contra Venezuela

    Merca evaluando sanccion petrolero severo contra Venezuela

    BUENOS AIRES/CARACAS – Merca ta menasa cu sanccion petrolero contra Venezuela. Asina e minister di relacionnan exterior Mericano Rex Tillerson a declara durante un bishita na Argentina. E motibo ta, pasobra Venezuela ta bayendo mas y mas den direccion di un dictatura. “Nos no por mira e caida di e democracia di Venezuela mas den un forma pasivo” Tillerson a bisa. Te cu awor, a solamente aplica sanccion contra cierto persona di Venezuela. Fuente y potret ANP.

  • Powered by SETAR