Gobierno di Aruba ta decreta dia nacional di luto

Gobierno di Aruba ta decreta dia nacional di luto

Posted on 11/29/2017 10:24 pm AST | Updated on 11/30/2017 7:27 am AST

ORANJESTAD:- Conseho di Minister y a yega na algun conclusion rond di e caso lamentabel di e morto di e dos criaturanan e ultimo dianan aki y a informa di nan decision riba e tema aki. Na prome luga gobierno di Aruba lo decreta un dia nacional di luto e dia di entiero di e dos muchanan pa asina e comunidad di Aruba completo para keto y reflexiona riba loke ta sosodiendo den nos pais y riba con y unda nos kier hiba e pais aki y kico nos por haci pa evita cu algo asina sosode atrobe. Gobierno di Aruba ta haci un apelacion pa tur departamento di Gobierno pone nan bandera halfstok.

Ta haci tambe un apelacion na Departamento di Enseñansa pa instrui scolnan pa trata e tema di abuso di mucha pa asina tur e hobennan cu ta bayendo scol nunca lubida e storia doloroso aki. Y pa tur nos muchanan y hobennan cu ta pasando den un situacion similar sinti cu tin hende cu tin oido na nan dolor y cu ta cla pa yuda nan. Especialmente, nos muchanan mester sinti y realisa cu biba den abuso no ta algo normal. Y cu nan por tin e confiansa cu ora nan wordo abusa, nan por haya e curashi y papia sin miedo di nada.

Prome Minister Evelyn Wever-Croes ta haci un invitation na pueblo pa bin hunto riba e dia nacional di luto pa convivi cu e famia y henter comunidad den e dolor profundo cu e hecho aki a laga atras y tambe pa expresa e deseo cu nos tur tin cu nos kier pa algo mas wordo haci pa stop abuso di mucha.

  • Gobierno: Prome equiponan “fia” for di Bestuurskantoor a cuminsa yega bek

    Gobierno: Prome equiponan “fia” for di Bestuurskantoor a cuminsa yega bek

    ORANJESTAD – E prome equiponan cu a worde “fia” for di Bestuurskantoor a cuminsa yega bek. Asina un comunicado di gobierno dialuna atardi a bisa. Hunto cu e comunicado, a bin algun potret cu equiponan di cual ta referi na dje. E equiponan ey a bolbe Bestuurskantoor awe den dia segun e comunicado. Awe mainta ainda prome minister Evelyn Wever Croes durante un conferencia di prensa a pidi tur esnan cu por tin ekipo ainda, pa trece nan bek. No ta conoci si ta basa riba e peticion aki, algun di e equiponan aki a bolbe Bestuurskantoor. Segun e comunicado, esaki ta un parti hopi chikito cu awe mainta a worde entrega pa un coordinador di Ex Minister Mike de Meza.

  • Lampe: Na januari ta implementa plan multiligual pa tur scol na Aruba

    Lampe: Na januari ta implementa plan multiligual pa tur scol na Aruba

    ORANJESTAD – Entrante 1 di januari 2018, gobierno lo implementa e plan di scolnan multilingual pa tur scol na Aruba. Asina Minister di Enseñansa, Rudy Lampe, a anuncia durante un conferencia di prensa semanal di gobierno. Banda di esaki, Lampe a anuncia tambe cu basa riba peticion di Fundacion Lanta Papiamento, gobierno di Aruba a decreta 2018 como e aña di Papiamento.

  • Wever: Comision nobo di gobierno pa mehora caya Betico Croes

    Wever: Comision nobo di gobierno pa mehora caya Betico Croes

    ORANJESTAD – Un comision lidera pa Prome Minister Evelyn Wever Croes lo ta encarga cu mehoracion di Caya Betico Croes. Wever a anuncia esey awe mainta den un conferencia di prensa semanal di gobierno. E intencion ta pa tin tur stakeholder di tur ministerio eyden, cu ta toca Caya Betico Croes. E comision mester percura pa trece entre otro bida bek den caya, manera tabata e compromiso di campaña. E idea ta pa tin ambiente henter dia, y mester desaroya e caya como un centro cu hende ta bay cumpra. Pa loke ta e structura di e organisacion actual Obid, Wever no tabata mucho sigur di esaki y como tal mester reuni cu nan y wak con por yega na otro. E intencion por lo menos ta cu mester por logra loke cu Obid tabatin den mente. E problema, segun e prome mandatario ta, cu nunca nan (Obid) a haya sosten di e gobierno anterior. Si mester cambia con Obid tabata structura, esaki lo wordo haci. “ Lo atende cu varios comerciante pa hunto yega na e miho solucion,” Wever a finalisa bisando.

  • Oduber: Tin solucion pa Dump Parkietenbos den 90 dia

    Oduber: Tin solucion pa Dump Parkietenbos den 90 dia

    ORANJESTAD – Un comision grandi (steering committee) tin 90 dia pa bin cu un solucion concreto pa e problema di Dump na Parkietenbos. Despues gobierno tin 2 aña y mey pa instala y resolve e problema. Asina minister di medio ambiente Otmar Oduber a bisa den conferencia semanal di gobierno.

  • Oduber: Containernan cu decoracion pa rotonde, pega na China

    Oduber: Containernan cu decoracion pa rotonde, pega na China

    ORANJESTAD – Motibo cu varios of mayoria di e rotonde nan na Aruba e aña aki no ta dorna ainda pa temporada di fiesta, ta pasobra ‘”decoracion pa rotonde cu tabata den container a keda pega na China”. Asina minister di infrastructura Otmar Oduber a duna NoticiaCla como contesta. Pues esey ta e motibo cu e 60 mil florin na decoracion no ta ‘decorando’ e rotonde nan ainda. Por lo menos mayoria di nan. Esey a pone cu e mandatario a duna orden pa saca esnan di aña pasa, drecha nan y pone riba e rotonde nan. “Asina caya grandi a bin haya decoracion, asina e plaza nan a bin haya algo cu por a wordo decora e aña aki ainda” Oduber a sigui bisa. Mientrastanto Oduber ta sigura cu un 70% di e rotonde nan tin sponsor di companianan pa algun aña, den forma di adopta esaki. “Danki Dios sino nos lo a pasa cu hopi decoracion menos” Oduber a finaliza bisando. Nota: e fotonan ta ilustra dos rotonde, esun di Tarabana y esun di Wayaca cu si ta dorna caba. 

  • Bikker: Otro siman tin decision riba futuro di korpschef

    Bikker: Otro siman tin decision riba futuro di korpschef

    ORANJESTAD – Otro siman tin claridad riba e posicion di ‘korpschef’, esta Dolfi Richardson, cu por trece claridad y trankilidad bek den e cuerpo di polis di Aruba. Asina minister di husticia Andin Bikker a bisa despues di a reuni cu e sindicato di polis SPA diahuebs merdia. Segun Bikker, sindicato a informe cu e inseguridad riba e futuro di Richardson den e cuerpo y despues cu e bandona cuerpo, ta parti grandi di e problemanan den cuerpo actualmente. E no ta dunando e cuerpo e atencion mereci, y esey ta un problema segun e sindicato. Como tal a informa cu pa otro siman lo tin un decision, cu asina por enfoca riba e otro temanan y trece trankilidad bek den cuerpo.

  • ULTIMATE1
  • BDC3
  • Powered by SETAR