OM: Sugerencianan di psiquiatra Enahoro ta incorecto

OM: Sugerencianan di psiquiatra Enahoro ta incorecto

Posted on 11/29/2017 10:01 pm AST | Updated on 11/30/2017 7:22 am AST

ORANJESTAD - Ministerio Publico a tuma nota di e declaracionnan cu señora R. Zecher Enahoro a duna na prensa na Hulanda. Señora Zecher Enahoro a yega di traha como psychiater na Aruba. Procurador-General di Aruba Alexander van Dam no ta reconoce su mes at all den e imagen di Aruba cu ta wordo pinta den e noticianan aki. E ta lamenta profundamente cu NOS y otro medionan di comunicacion na Hulanda no a haci uzo di e regla periodistico di scucha ambos banda di un medaya, prome cu sigui cu publicacion.

E imagen cu señora Zecher Enahoro ta pinta di e situacion Arubiano, ta incorecto y no ta basa riba hechonan. Loke señora Zecher Enahoro ta sugeri, esta, cu fiscalnan di husticia lo tin miedo pa persigui un sospechoso, ta puro nonsense. Tambe e imagen cu Aruba lo ta un destinacion di sex pa turistanan pedofil ta algo cu Ministerio Publico no ta reconoce at all. No ta existi ningun sorto di prueba cu esey lo a pasa of lo ta pasando.

Segun OM, señora Zecher Enahoro a traha na Aruba di 2008 te 2010. Ta berdad cu JZP no tabata bon na ordo den e añanan ey. Tanto Ministerio Publico como Cuerpo Policial di Aruba a haci nan maximo esfuerso den e añanan despues pa traha riba casonan di moralidad y persigui sospechosonan di moralidad.

Generalmente por bisa cu casonan di moralidad hopi biaha ta dificil, pasobra frecuentemente ta trata di casonan one-on-one, den cual e declaracion di e victima ta para liñea recta contra esun di e sospechoso. Esey ta nifica cu mester haci uzo di capacidad grandi di recherche pa, den cuadro di haya sa e berdad, yega na un caso penal cu por wordo persigui. Te aki e reaccion di OM riba e caso. 

 

  • Manera anticipa pa Noticiacla: Ex minister Besaril a recobra su libertad

    Manera anticipa pa Noticiacla: Ex minister Besaril a recobra su libertad

    ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes. 

  • Ex minister Besaril por recobra su libertad diabierna

    Ex minister Besaril por recobra su libertad diabierna

    ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan. 

  • Corte: Radioemisoranan mester paga DUCAPRO pa toca musica, y lo dicidi tarifa den dos luna

    Corte: Radioemisoranan mester paga DUCAPRO pa toca musica, y lo dicidi tarifa den dos luna

    ORANJESTAD – Radioemisoranan na Aruba mester paga pa por toca musica di artistanan. Esey ta un hecho!. Loke mester wordo determina ainda, ta e tarifa cu e fundacion DUCAPRO por cobra. Asina e huez cu a trata e caso sumario diabierna mainta den corte cu DUCAPRO a cuminsa contra di Q-Waves NV, conoci comercialmente como HITs 100FM, di e propietario Aldrich Croes. DUCAPRO a cuminsa e caso pasobra e radio lo no kier paga e suma mensual cu ta rekeri pa e paga pa haya derecho pa toca musica tur luna.  E propietario di e radio a sigura cu no ta cu nan no kier paga, sino cu nan tin problema cu e suma/tarifa. 

  • Ex minister Besaril ta keda encarcela pa 16 dia mas!

    Ex minister Besaril ta keda encarcela pa 16 dia mas!

    ORANJESTAD – Ex minister Guilfred Besaril su detencion awe merdia a keda prolonga cu 2 biaha 8 dia. Esaki kier men cu despues cu e la sinta su prome 8 dianan, huez comisario a haya ta necesario pa prolonga esaki un biaha mas, debi cu mas probable, no ta cla cu sea e interogacion of cu e investigacion, cu ta rekeri su detencion. Esaki pa evita cu e lo por influencia e loke ta investiga aworaki. E la keda deteni dia 13 di februari ultimo, relaciona cu e caso Tulipan unda cu ta acuse di corupcion y abuso di poder como minister tempo cu e tabata minister plenipotenciario na Hulanda. Despues dia 16 di februari a prolonga e detencion cu 8 dia mas. Awe, manera noticiacla a raporta anteriormente, e HC mester a dicidi si ta prolonga esaki. Y esey a sosode tambe. 

  • Awe ta dicidi si ta prolonga detencion di ex minister Besaril cu 8 dia mas

    Awe ta dicidi si ta prolonga detencion di ex minister Besaril cu 8 dia mas

    ORANJESTAD - Ex minister Guilfred Besaril ta ketobay deteni, y awe ta finalisa e 8 dia detencion conforme e proceso di detencion. E prome dos dianan siman pasa tabata den asina yama ‘in verzekering’, y despues a prolonga e detencion cu 8 dia mas. E 8 dianan aki ta vence awe, y e huez comisario tin cu dicidi si ta prolonga e detencion aki cu 8 dia mas of ta manda e persona cas, te ora cu su caso (Tulipan) keda presenta. Por ta cu ta dicidi cu mester mas tempo pa cual por prolonga e detencion cu 8 dia mas. Y si aun mester mas tempo, por prolongue cu 8 dia mas. Despues si mester prolonga atrobe, esaki ta bira 60 dia mas. Si awe ora cu e keda presenta dilanti e huez comisario, dicidi cu ta prolonga e detencion, esaki no kier men necesariamente si cu e tin cu keda (manera tabata e caso e siman aki) e 8 dianan completo deteni. E ex minister ta wordo acusa di entre otro corupcion y abuso di su poder tempo cu e tabata minister plenipotenciario na Hulanda durante e ultimo dos periodonan di Gabinete Wever Croes I y parti di II.

  • 'Caribisacion' di nos magistratura: Di 11 hues actual na Aruba, 6 tin pasado local

    'Caribisacion' di nos magistratura: Di 11 hues actual na Aruba, 6 tin pasado local

    ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “

  • Powered by SETAR