ORANJESTAD – Un fayo den un breaker durante trabou rutinario den planta di produccion di WEB, tabata e causa inicial pa e interupcion nan multiple di coriente ayera 22 di november. E fayo a trece un desbalance den produccion y demanda, unda e sistemanan di proteccion a saca 2 turbina y 2 boiler for di servicio na diferente ocasion. Den casonan asina operadornan mester por reacciona hopi lihe pa por mantene e generacion di coriente stabil. E compania di awa y energia ta ofrece su disculpa pa e inconveniencia cu comunidad a sufri ayera. Alaves ta informa cu e proyecto IGMS den futuro lo yuda operadornan maneha e produccion pa asina limita situacionnan di desbalance den produccion di coriente.
SITUACION
E situacion ayera a bira critico na momento cu tabatin un desbalance entre demanda y capacidad di produccion di WEB na e momento ey. Pa e motibo aki y pa evita cu full Aruba keda sin coriente, WEB no tabatin otro opcion di interumpi algun liña di ELMAR. Esaki a pone cu den oranan di mainta e areanan di Santa Cruz y Savaneta y parti merdia Noord y Oranjestad a keda sin coriente. Pa 3.50 or di atardi finalmente WEB y ELMAR a logra stabilisa e suministro di coriente.
TRABOU
Durante henter aña trabou rutinario di mantencion ta tuma lugar den plantanan di WEB. E trabou nan aki ta esencial y ta consisti di reemplazo di ekipo y piesanan cu ta midi y controla e sistemanan di produccion. Considerando cu no por pone full e planta di produccion abou, e trabou rutinario tin cu sosode durante e produccion. Mayoria biaha clientenan no ta ripara nada di esaki.
CORIENTE
E proceso di generacion y suministro di coriente ta consisti di operacion di entre otro boiler, turbina, generador nan RECIP, molina di biento y panel solar, hunto cu cabel pisa di coriente, transformadornan y substacionnan. Esakinan ta maneha pa operadornan di forma cu tur ekipo ta reacciona segun e demanda di coriente di nos isla ta cambia. Si diripiente e demanda subi of baha, operadornan mester por reacciona hopi liher pa por mantene e generacion di coriente stabil. E proyecto di IGMS (Intelligent Generation Management System) lo facilita e maneho di e combinacion di ekipo di operacion. E proyecto lo keda cla den curso di aña 2018.
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.