ORANJESTAD - Pa mas di 20 aña, no a traha un rapport riba problema di Dump. Esaki a bira conoci durante bishita recien di e minister nobo di medio ambiente Otmar Oduber. Segun Oduber, un prioridad di Gabinete Wever-Croes sigur ta e solucion pa desperdicio di sushi aki na Aruba. E problema di dump Parkietenbos ta un problema grandi. Durante di e encuentro cu Oduber tabatin Cu e ‘Raad van Toezicht’, a papia di e rol amplio di Serlimar. Involucrando e control cu mester tuma lugar di e diferente dumpnan ilegal.
Na e momentonan aki e cantidad di sushi cu normalmente tabata bay Parkietenbos a reduci drasticamente. Esey kiermen cu sushi ta wordo benta otro camindanan rond di Aruba, consecuentemente aumento den e cantidad di dumpnan ilegal. Pa cual mester busca rapidamente solucion pa esaki, Oduber a enfatisa. “Mi a insisti hopi riba e rapportnan cu tin pa soluciona e problematica aki. Y e lo sorpresabo si mi bisa cu durante di e ultimo 20 añanan aki, niun rapport a wordo traha pa Serlimar, pa loke ta e problema aki. E ultimo rapport cu a wordo traha tabata cu WEB. E tempo ey sr. Jossy Lacle tabata esun encarga, y te awe esey ta e rapport cu Serlimar ta aplica keto bay. Mi a compronde for di Presidente di e hunta di e Raad van Toezicht, cu lo tin un otro rapport cu a wordo traha door di diferente instancianan, pero cu Serlimar no tabata esun cu a lidera esaki directamente. Y cu nan a yame un PPP Project (mas o menos 4-5 aña pasa).” Ultimo añanan a papia hopi riba desperdicio di sushinan y problematica di Parkietenbos, y ta p'esey ta strañami cu practicamente 20 aña pasa ta e ultimo biaha cu a traha un rapport pa por atende cu esaki. Nos ta na altura cu tin hopi otro instancianan cu tin ideanan y pensamentonanan. Sinembargo, un “Business Plan” y rapport riba estudio di con ta soluciona esaki lamentablemente no ta existi, y mester wordo haci rapidamente, Oduber a indica. Ademas, tin hopi ideanan di parti companianan existente na Aruba cual tambe Oduber lo bay hiba combersacion cu nan den e dianan nos dilanti pa mira kico nan pensamento y ideanan ta encera.
Concluyendo sr. Oduber a enfatisa cu e solucion lo ta encera cu nos tur lo mester ‘tira awa den biña’. Esta, cu tur hende cu ta biba na Aruba y pues usuarionan y comerciantenan cu ta produci desperdicio, tur hende mester bira parti di e solucion.
ORANJESTAD – Presion di e colegio di supervision financiero CAFt a pone gobierno di Aruba kita 16 miyon florin presupuesta pa e planta di RWZI. Asina e mandatario a confirma diabierna despues di su reunion cu director di DOW, Marlon Croes. Durante e reunion cu a trata mas tema, tambe a trata e tema importante di RWZI, no solamente e plantanan na Bubali, sino tambe RWZI Parkietenbos y RWZI Zeewijk. A papia riba e retonan cu tin cu esakinan y e importancia y e urgencia cu tin pa e privatisacion.
ORANJESTAD – Manera cu Noticiacla a raporta anteriormente caba, diabierna 26 di april, un dia prome cu Dia di Rey, 18 ciudadano di pais Aruba a ricibi un Condecoracion di Rey Willem Alexander. E momento aki, ta conoci como Ocasion General, y ta relaciona cu e cumpleaño di Su Mahestad, Rey Willem-Alexander, cu ta esun cu ta otorga e condecoracion na e personanan cu a duna un contribucion special na e sociedad. Riba e mainta aki, 16 di e condecoradonan tabata presente pa ricibi nan Condecoracion Real di Gobernador di Aruba, señor Alfonso Boekhoudt, kende a splica dicon e personanan aki a bin na remarke pa un reconocemento asina importante. Dos persona no por a ricibi nan condecoracion, entre nan Nicole Hoevertsz cu ta den exterior pa compromiso deportivo. Potretnan cortesia di gobierno di Aruba.
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.