- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
- E careda di ciclista ‘12 Hours di Aruba’ ta bolbe na 2024!
- Coredornan di Aruba ta cla pa e marathon di Londen pa diadomingo
Italia ta domino durante ITF Aruba Open 2017
ORANJESTAD - Diadomingo ultimo, a yega su final, e evento mas grandi di deporte na Aruba y alabes e evento number uno di mundo, esta Beach Tennis Aruba Open 2017. Eagle Beach un biaha mas a keda chikito, cu sigur un alrededor di 2 mil hende riba e anochi final di e torneo aki
Despues di un tardansa chikito debi na e yobida fuerte cu Aruba a experiencia, e semi-final nan a cuminsa riba center court. Den e categoria femenino 3 ekipo di Italia mas uno di Brazil a pasa pa e semi-final, di cual 2 ekipo di Italia a bai final. Ta trata aki di Federica Bacchetta (3) y Giulia Gasparri (3) contra di Eva D’Elia (9) y Veronica Visani (8). Den 2 tremendo set Federica y Giulia a bay cu e titulo di campeon pa loke ta categoria PRO Women’s Doubles.
Pa loke ta categoria masculino, e campeon nan di 2016, a bin por la goma pa asina retene nan titulo. Tambe por a wak di comienso cu nan 2 tabata e faboritonan ya cu nan ta desfila nan mes sigur den e ultimo aña nan como e top nan den e deporte di Beach Tennis. Aki nos ta papia di Michele Cappelletti (1) y Luca Carli (4). Nan a bai final contra di un otro cu no ta desconoci na Aruba, esta Marco “Polo” Garavini (2), hunto cu su partner Luca Cramarossa (3). Marco a recorda tur presente dicon e tin 6 aña ta bin Aruba pa participa den e torneo aki y tambe cu tur 6 aña e tabata den final, sea a keda como ganador of na di 2 lugar. Mirando e ranking di e 4 hungadornan aki di Beach Tennis nos por unicamente saca nos conclusion cu nos a presencia un final entre e mihor 4 hungadornan di Beach Tennis di henter mundo.
E 2 ekipo nan aki a lanta cada un persona presente riba Eagle Beach. Loke por remarca di e wega aki cu e tabata conta cu un defense increibel di Luca Gramarossa, kende por cierto ta prome biaha e ta na Aruba pa e Aruba Open, pero e la expresa caba cu lo no ta e ultimo y cu e lo t'ey bek otro aña pa defende su titulo
Asina ey e anochi e termina, cu e ceremonia di entregamento di premio, cual nan a wordo entrega pa su excelencia Minister di Deporte, Sr. Dangui Oduber y despues di esaki a sigui cu e after party, cual varios persona ta unicamente bin e torneo aki pa presencia esaki. Nos di Beach Tennis Aruba kier a gradici cada un di nos sponsornan, cada un cu a participa, cada un cu a bin wak e weganan y asina aki aporta pa a haci e evento aki uno sumamente exitoso.
E careda di ciclista ‘12 Hours di Aruba’ ta bolbe na 2024!
ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.
Coredornan di Aruba ta cla pa e marathon di Londen pa diadomingo
LONDEN – Un grupo basta grandi di por lo menos 10 coredor di Aruba ta participa diadomingo na e marathon di London, considera como un di e marathon crucial internacional. Diabierna nan a registra nan mes oficialmente y a haya nan number y bib (e registro electronico) pa nan por participa. For di e portal deportivo 297 Sports, noticiacla a compronde cu tin por lo menos 50 mil participante diadomingo awor. Esnan di Aruba cu ta participa ta e.o. e docter di cas Joaquin van Trigt y e coredor conoci Shariska Winterdaal, Ana Mujica, Jeanette Croes, Lili Mejia, Edeline Weller, Filomena Paesch, Esther Colina, Carla Fingal y Ricky Refunjol. Potret cortesia 297 Sports.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Cantidad record di persona ta den Ronde van Aruba awe
SAVANETA – Un cantidad record di persona ta den Ronde van Aruba (RVA) awe. Segun informacion di e portal 297Sports, un total di 726 coredor ta subi caminda, cual por cierto ta un record. Tur e lunanan di preparacion lo keda demostra awe riba caminda unda e demas participantenan lo duna un show di coremento riba e careteranan di nos dushi isla di Aruba. Lo tin un total di 16 coredor single e aña aki, 57 duo teams cual ta e cantidad mas grandi den historia di RVA. Por ultimo e 149 estafette lo ta den e gruponan di 4 relay, pues 596 persona lo core e 72km rond di nos isla. E fiebre di Ronde van Aruba ya a wordo sinti y lo bay ta grandi awe full rond di nos isla cu hopi mirones canto di caminda. Tin varios happening prepara na e diferente post.
Seleccion cu a conkista 54 medaya den Carifta Aquatics Championship 2024 a bolbe Aruba
ORANJESTAD - Diabierna atardi den un esfera ameno, Minister Endy Croes a ricibi nos Seleccion di Landamento y Seleccion di Landamento Artistico den e VIP room di Aeropuerto Internacional Reina Beatrix. Manera ta conoci, siman pasa nos atletanan a competi den Carifta Aquatics Championships 2024 cu a tuma luga na Nassau, Bahamas y Fort Lauderdale, Florida. Carifta ta e competencia di e mihonan di Caribe. E aña aki alrededor di 400 atleta di 21 pais a participa. Famia y amistad tabata ansioso sperando e yegada di nos atletanan. E hobennan a conkista un total di 54 medaya den dos diferente disciplina acuatico: landamento y landamento artistico. Den e disciplina di landamento a logra 30 medaya y landamento artistico 24 medaya. Pais Aruba a keda na di 7 luga den 21 pais. Den nomber di Gobierno di Aruba, Minister Endy Croes a felicita e atletanan cu nan excelente prestacion den Carifta. Alabes, a gradici e atletanan pa carga nomber di Aruba y laga nos pais briya riba plataforma internacional.
Cantidad di hungadornan internacional den baseball Major League na Merca a baha
NEW YORK — E percentahe di hungadornan internacional hungando baseball professional na Merca, a baha te na 27.8% cu ta e nivel di mas abou desde 2016. Aworaki tin 264 hungador di 19 pais, entre e 949 hungadornan activo total ora cu e temporada 2024 a habri siman pasa. E pais internacional cu tin mas hungador na Merca, ta Republica Dominicano cu 108 hungador, sigui pa Venezuela cu 58 sigui pa Cuba cu 18. Corsou tin 4 mientras cu Aruba tin 1 (oficialmente) cu ta Xander Bogaerts. Actualmente e tin un hungador riba ‘standby’ cu Atlanta Braves, esta Chadwick Tromp. Pa loke ta e ekipo cu tin mas hungador internacional, Houston Astros ta lidera e grupo aki cu 16 hungador, sigui pa San Diego cu 15, Boston cu 14, Miami cu 14 y Cleveland cu 12.
Follow NoticiaCla
