- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
Departamento Verlos y Kraam a uni como uno den New Bed Tower
ORANJESTAD - E mudamento di e departamentonan di Hospital a continua y riba dia 15 di november a muda e departamento di Kraam y Verlos. Renita Blindeling, zorgmanager di e departamentonan a duna di conoce cu e proceso di preparacion tabata uno largo y cu hopi trabou, pero na final a logra pasa tur pashent riba e dia ey mes.
Un di e cambionan grandi cu tin den e edificio nobo ta cu e dos departamento a bini hunto. Anteriormente departamento di Kraam tabata riba piso 5 y Verlos riba piso 1. Den e edificio nobo ambos departamento ta riba e prome piso. Esaki ta pone cu nan mester bay funciona desde awo hunto como un team y alabes cu e departamento a bira mas grandi. Nan lo bay tin cu comunica na un manera completamente otro. “Esey ta algo cu nos tur tin cu bay custumbra cun’e”, el a duna di conoce.
P’e pashentnan esaki ta hopi mas cumbiniente. Tambe tin hopi mas espacio y privacidad ya cu tin sea 1 of 2 pashent lo ta drumi den un camber, di cual antes tabata 4 den un camber. Tambe e pashentnan lo ripara cu e baby semper lo ta hunto cu nan, hasta den sala di parto nan por keda un tiki mas largo pasobra e departamento aki tin tur cos pa keda cu e baby eyden.
Nurse di verloskamer, Jackeline Geerman a duna di conoce cu e mudamento tabata hopi trabou cu diferente adaptacionnan y mester a prepara pa un otro manera di traha. E cambio grandi cu tin ta cu e baby ta ricibi e cuido banda di e mama, di cual e por mira kico tur e nursenan ta haci cu e baby despues di e parto y esaki ta un diferencia grandi. Tambe e camber ta mas grandi, tin mas espacio, mas colorido y pashent por ta mas relaha.
Awo no tin e separacion mas unda cu ta haya yiu na Verlos abou y despues di parto e pashent ta bay ariba na Kraam y lo tin un otro nurse cu ta duna cuido eynan. E departamentonan aki a bini hunto y asina e pashent lo ricibi un cuido completo prome y despues di parto riba un solo piso. Tambe a amplia e verloskamers di 4 pa 5 y a bin acerca e badkuip, unda cu pashentnan por haya yiu bou awa.
Xochi Woorts, partera di Duna Luz, tabata hopi entusiasma cu e mudamento. E edificio nobo ta bunita y di basta tempo nan tabata wardando p’e dia yega, asina el a duna di conoce. E mudamento a bay structura, unda cu e prome pashent di Kraam a drenta caba y tabata falta e resto di cosnan. “Nos ta entusiasma pa cuminsa na e edificio nobo”, asina Xochi Woorts a duna di conoce. Un di e cambionan ta e badkuip y den pasado tabatin caso cu hende a haya yiu na cas cu badbevalling, pero awo no mester haci esaki mas na cas.
Michael Quant, Partera di Baby Love Aruba, tabata den e departamento di hospital bieu, mientras cu Xochi Woorts tabata den e parti nobo pa cualkier caso di emergencia y nan tabata standby pa asina duna e pashent e servicio di biaha. E prome cambio cu pashentnan ta haya den e verloskamer ta e colornan cu a cambia pa colornan mas trankil y tambe un espacio mas trankil y mas grandi. Tin mas privacidad y e departamento di maternidad tambe ta eynan mes dus tur cos ta den un solo caminda y esaki lo ta mas trankilidad p’e pashent.
HOH: Ocupacion di cama poco poco ta bek na normalidad na hospital
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
Stampiaaruba cu exposion di stampia na Aruba pa celebra 17 aniversario
Oficina principal di DIMP ta cera awe diaranson pa mantencion
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
Den cuadro di reposicionamento, FPNA ta cambia su nomber pa Aruba Conservation Foundation
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
Parlamentario Ryçond Santos Do Nascimento ta invitado den Noticiacla LIVE awe nochi
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
AZV: Contracto cu dentista Mayra Rosales ta termina
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.
Follow NoticiaCla
