Rafini: PayPal no ta haci su mes acesibel pa uz'e na Aruba

Rafini: PayPal no ta haci su mes acesibel pa uz'e na Aruba

Posted on 11/6/2017 3:44 pm AST | Updated on 11/7/2017 11:04 am AST

ORANJESTAD – Aruba no ta cla pa uza e facilidad di pago conoci como ‘PayPal’, mientras cu e ta un forma hopi polular rond di mundo, y particularmente na Merca, Aruba su sistema no ta cla pa por uza esaki, segun vice presidente di asociacion di banker Pierre Rafini. “Lastimamente (PayPal) no ta haci su mes accesibel pa nos den e region aki, pa nos por adapta nan y uza nan,” Rafini ta sigui bisa. Pa bo bin cu PayPal, mester haya autorisacion di PayPal, e tin cu pasa door di e screening rigoroso y aprobacion di reguladornan, manera Banco Central.

MERCA

“Hopi biaha e companianan aki ta haci nan mes accesibel solamente Mericano” Rafini a sigui bisa. Bo mester tin un cuenta (bancario) of un credit card pa bo por tin acceso, y nan (PayPal) ta limita su mes na ‘cross border risk’, esta e risico di cruza frontera. E ta un bon forma di pago, pero e ta limita y como tal no por uz'e na Aruba. A haci mencion di PayPal como posibel reemplasante di uzo di check y asina e plataforma aki a drenta den e combersacion.

KICO TA PAYPAL

PayPal ta un compania Mericano, cu ta opera un sistema mundial di pago online, cu a sostene transferencia di placa y ta fungi como un alternativo manera check y money order. Pero pa straño cu e ta zona, Aruba no ta cay den e red aki.

  • Modelo nobo “Lexus F-Sport Hybrid” ta den showroom caba

    Modelo nobo “Lexus F-Sport Hybrid” ta den showroom caba
  • Arends: Dos aña prome cu por transferi placa entre banco den 'real time'

    Arends: Dos aña prome cu por transferi placa entre banco den 'real time'

    ORANJESTAD - Lo dura por lo menos 2 pa 3 aña ainda prome cu banconan na Aruba por tin e sistema electronico instala y operando pa un cliente por experencia transferencia di placa entre dos diferente banco, den 'real time', osea instantaneo. Asina Richard Arends a bisa NoticiaCla den su ultimo entrevista como minister di Economia recientemente. E proceso ta canando, pero no ta cla ainda pa por implementa e sistema manera cu tin otro parti di mundo. Banco Central ta liderando e proceso di cambio, sostene pa gobierno y banconan comercial local. 

  • Clientenan di DIMAS por paga tur cos awor ey enbes di na dept di Impuesto

    Clientenan di DIMAS por paga tur cos awor ey enbes di na dept di Impuesto

    ORANJESTAD - Clientenan di DIMAS entrante awe, por haci tur nan pagonan necesario na e edificio di DIMAS mes, envez di na departamento di impuesto y of un di e hulpbestuurskantoornan/MFA. Segun e directornan di tanto DIMAS como di impuesto Kathy Paskel y Luenne Pieters, e intencion ta pa duna miho servicio centralisa y evita cu e cliente tin cu bay dos caminda pa keda cla cu su tramitenan. Entre awor y fin di aña, clientenan tin e oportunidad ainda pa acudi na e otro sitionan di custumber menciona. Pero pa januari e unico sitio unda cu por haci e pagonan (Leges, retributie, waarborgsommen), ta na e loket di departamento di impuesto na Dimas mes. Otro punto cu a haci mencion ta cu si antes (te cu fin di aña, por a paga cu placa cash esta placa di papel, esaki lo no por mas, y ta acepta solamente debit card. Un di e motibonan ta e cantidad grandi di placa cu tin cu cana cune, mirando cu e sumanan cu tin cu paga, ta varia entre 100 pa 2500 florin. E intencion ta pa na comienso di aña, clientenan logra paga online tambe. 

  • Edificio di Riu Antillas a cumpli 40 aña di existencia

    Edificio di Riu Antillas a cumpli 40 aña di existencia

    ORANJESTAD - E edificio di Riu Antillas a cumpli 40 aña di existencia y esaki ta algo historico. “Nos ta kere cu ta husto manera nos ta traha duro tur dia, pa celebra e fecha pero tambe pa reconoce esunnan cu tabata tey desde e prome dia y ainda ta trahando den e mesun edificio aki”, asina Juan Blanco, Gerente General di Riu Antillas a expresa. Den e team di Riu Antillas tin empleadonan cu a cuminsa traha den e edificio aki tempo di Aruba Concorde Hotel cu a habri su portanan na 1977. Freddy Molina y Leo Tromp ta empleadonan cu 40 aña pasa a traha na Aruba Concorde Hotel y gerencia di Riu Antillas ta contento di tin empleadonan cu a cuminsa den e edificio aki hopi aña atras. Freddy Molina ta Assistant Beverage Manager y e tin 40 aña trahando den e edificio di Riu Antillas, unda el a cuminsa su carera cu Aruba Concorde Hotel. Alfonso Ariza, Beverage manager, ta traha cu Freddy Molina pa e ultimo 10 añanan cu Riu Antillas y a indica cu Freddy Molina ta un persona tremendo, e ta un bon ehempel. Su dedicacion na servicio, e ta un bon ehempel pa sigui pa tur esunnan cu ta bin despues. E trayecto di Freddy Molina ta uno largo unda el a cuminsa cu Aruba Concorde Hotel. E ta corda con el a pone su pia den e hotel di cual tabata e inicio di Aruba Concorde Hotel y despues di 40 aña e ta den e mesun edificio. “Riu a tuma over e edificio cu un concepto y mi ta agradecido. Mi ta asina contento y poco emociona cu Riu a habri e portanan y tin e portanan habri ainda”, asina el a indica. Ta hopi importante cu e porta di e edificio ta habri ainda y Freddy Molina ta contento cu e por forma parti di nan. Ta hopi importante pa su persona di ta 40 aña den e industria di turismo cu ta e pilar di Aruba. E ta gradicido na Riu Hotel cu e por ta cu nan, na gerencia di e hotel cu por a bin cu un cambio cu ta algo positivo pa Aruba. Carlos Marquez, Assistant Manager di Mantenimiento, ta traha cu Leo Tromp, un trahado di mantenimiento kende ta bay cumpli 40 aña trahando den e edificio di Riu Antillas cu antes tabata Concorde Hotel. “E conoce e edificio mas miho cu nos mes”, asina Carlos Marquez a expresa contento. Leo Tromp ta un persona profesional y ora e traha den tur ramo di mantenimiento, e ta haci un funcion hopi bon. Leo Tromp ta un empleado di departamento di mantenimiento y a recorda su añanan cu el a cuminsa cu Concorde Hotel. Tabatin hopi cos bon y malo, pero el a sigui traha den e mesun edificio pa 40 aña largo. Durante su trayecto den e mesun edificio, el a mira hopi cambio tuma luga. E ta gusta su trabou y tambe yuda su coleganan. “Tur ta bisa pa yuda Leo pa nan tambe siña. Pa asina nan tambe por sigui traha 40 aña”, Leo Tromp a indica. Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion "all inclusive". Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka. Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

  • Crystal Pool Services N.V. a gana bid pa renoba Piscina Olimpico Rolly Bisslik

    Crystal Pool Services N.V. a gana bid pa renoba Piscina Olimpico Rolly Bisslik

    ORANJESTAD - St. Fundacion Lotto pa Deporte a reuni cu Fundacion Facilidadnan Deportivo y Fundacion Arubiano pa Maneho di Facilidadnan Deportivo unda a anuncia e compania cu lo renoba Piscina Olimpico Rolly Bisslik. E compania Crystal Pool Services N.V. a gana e bid despues di un evaluacion y a ricibi e aprobacion di ACE Engineering. E proyecto aki lo tin un balor di 1.050.000 florin y tin un duracion di 180 dia, esta 6 luna. Tambe tin cierto condicionnan hancra cu e acuerdo aki y pa cu esaki e compania lo mester cumpli cu nan.

  • Catochi Merdia cu premio di 22.000 florin

    Catochi Merdia cu premio di 22.000 florin

    ORANJESTAD - Rosario P. a pasa busca su premio e dialuna. Ela buska un premio di 22 mil florin, cu e la gana cu wega di Catochi Merdia. Numbernan ganado tabata 1204 cu Pick 4 y Last 3 *204. Sr. Rosario a cumpra su numbernan na Thode Lottery

  • Powered by SETAR