ORANJESTAD - Diabierna 3 di november ultimo presidente di Parlamento Guilfred Besaril a bishita korpschef di Cuerpo Policial di Aruba Dolfi Richardson. E bishita di presidente di Parlamento ta pa conocemento y orientasion. Como colega den Cuerpo Policial di Aruba tabata un honor pa Sr. Besaril den su posicion nobo como presidente di Staten pa hasi un di su prome bishita na Centro di Husticia na Macuarima. Alto Comisario a keda masha contento cu bishita di Sr. Besaril na Cuerpo Policial. Sr. Besaril ta e prome polis den historia di Aruba pa bira e voorzitter di parlamento. Esaki tabata un momento oportuno pa felicita Sr. Besaril mirando cu e ta forma parti di Cuerpo Policial y ela acepta e reto aki pa un funcion importante pa pais Aruba, na Alto Comisario richardson a subraya.
Desde aña 1994 cu Sr. Besaril a drenta Cuerpo Policial di Aruba na unda ela crece, siña y sirbi nos comunidad. awe ta mira un polis den un puesto di presidente di Staten y ta yena nos cu sumo orguyo pa wak nos hendenan ta sigui crece y sirbi nos pais.
PITTSBURGH - Pa mehora e habilidad riba e crimen cibernetico y fortalese e lasonan cu diferente departamentonan investigativo, commisario di polis Robert Candelario hunto cu diferente coleganan den region a forma parti di e congreso “ Disruption 2024” cu a tuma lugar na Pittsburgh Pennsylvania na Merca.
ORANJESTAD - Ayera durante oranan di merdia Wardacosta a bai cu un boto local na e punto di sosten di Wardacosta pa un control abordo. Durante di e control riba e boto dor di e agentenan di Wardacosta y e K-9 unit di Cuerpo Policial di Aruba, a bin encontra diferente pakete cu droga aden. En total a haya 237 kilo di droga di cual 57 kilo marihuana y 180 kilo cocaina. E droga y e dos hombernan, di cual unu local y unu Venezolano a keda entrega na Cuerpo Policial di Aruba.
ORANJESTAD – Diasabra atardi, Aruba a conoce su di 3 morto di trafico pa 2024. Segun informe oficial di polis, awe despues di 4’or atardi Central di Polis a dirigi patruya di Noord, ambulance y cu maximo urgencia pa un accidente pisa na altura di e supermercado NG y e restaurant Yen Yen situa na Kamay. Na yegada di e prome unidad a mira dos auto involucra den e accident. Un auto marca Nissan, modelo almera color shinishi numera A-24490 y un Honda, modelo CRV, color cora numera A-52927.
ORANJESTAD - Den ora nan di atardi, Centro Operacional Maritimo (MOC) di Wardacosta, a ricibi un mensahe pidiendo asistencia medico. Ta trata di un pasahero Aleman di 66 aña di edad riba un barco crucero, biniendo for di dirección nort di Aruba. Inmediatamente a tuma contacto cu doctor na warda di CITRO, cu a constata (despues di a evalua e situacion cu e team di medico riba barco) cu ta trata di un atake (stroke). Inmediatamente a manda e helicopter pa evacua e persona. Miembro nan di ambulance a ricibi e pasahero na Queen Beatrix International Airport i a hiba e turista hospital, pa ricibi tratamento medico.
ORANJESTAD - Wardacosta ta informa doñonan di boto y seadoo pa tene cuenta pa nan tin nan documentonan valido a bordo cual ta, ‘vaarvergunning’ y ‘vaarbewijs’ di e capitán. Zorg pa tin vest di salbabida pa tur tripulacion y pasahero abordo; no por bai ku dimas pasahero abordo di e boto pa evita situacion peligroso.